«Całkam adnoŭleny aryhinalnymi zapčastkami, jakija staranna źbiralisia pa ŭsim śviecie». Jakija retraaŭtamabili možna kupić u Biełarusi?
Pahladzieli, jaki staryja aŭtamabili možna nabyć u Biełarusi.
«Vołhi» ŭ asartymiencie
Samy papularny retraaŭtamabil u Biełarusi — heta HAZ-21. Ich u Biełarusi pradajecca kala 40. Samyja tannyja varyjanty kaštujuć kala 1000 dalaraŭ. Aŭtamabili ŭ bolš-mienš hodnym stanie pradajuć pa cenach ad 4 tysiač dalaraŭ.
Fota tut i dalej: av.by
Za samyja darahija prosiać 16—30 tysiač dalaraŭ, ale vyhladaje, što zvyčajnaja «Vołha», u jakim by stanie jana ni była, stolki nie kaštuje, bo abjavy ab prodažy visiać na sajcie z 2021—2022 hadoŭ.
Adzin z vartych uvahi varyjantaŭ pradajecca ŭ Vaŭkavysku. Za aŭtamabil 1960 hoda prosiać $10 000.
Pradaviec śćviardžaje, što aŭtamabil znachodzicca ŭ vydatnym stanie.
Chevrolet Corvette
Adzin z samych darahich retrakaraŭ, vystaŭlenych na prodaž u Biełarusi, — heta Chevrolet Corvette. Za lehiendarny maskłkar 1974 hoda vypusku prosiać 75 tysiač dalaraŭ. Pad kapotam u 49-hadovaha Corvette bienzinavy ruchavik abjomam 5,7 litra, jaki pracuje ŭ pary z aŭtamatyčnaj karobkaj pieradač. Zajaŭleny prabieh — 21 928 km.
Z apisańnia možna zrabić vysnovu, što pradaviec, chutčej za ŭsio, raźličvaje na kupcoŭ z Rasii. Jon hatovy dastavić aŭto ŭ luby horad RF i navat uziać hrošy na rachunak u rasijskich rublach.
«Całkam adnoŭleny aryhinalnymi zapčastkami, jakija staranna źbiralisia pa ŭsim śviecie, kab pryvieści aŭtamabil da stanu novaha. U praces adnaŭleńnia ŭkładziena šmat sił, času i srodkaŭ. Restaŭracyja pravodziłasia ŭ Biełarusi», — havorycca ŭ apisańni.
Čatyry hady ŭ prodažy
Za 50 tysiač dalaraŭ u Baranavičach pradajuć sapraŭdny ekskluziŭ Wanderer W22 L6 1933 hoda vypusku. Hety niamiecki vytvorca spyniŭ svajo isnavańnie jašče ŭ 1945 hodzie.
Jak paznačana ŭ apisańni, aŭtamabil adnoŭleny tolki na 80 adsotkaŭ. Tym nie mienš prosiać za jaho $50 000. Zychodziačy z daty publikacyi abjavy, mašynu pačali pradavać jašče ŭ 2019 hodzie. Ale pradaviec nie zdajecca i navat abnaŭlaje abjavu.
Pył u vočy
Za 31 900 dalaraŭ u Minsku pradajecca čyrvony Porsche 924. Heta aŭtamabil 1979 hoda vypusku. Pad kapotam u sportkara davoli ścipły pa abjomie ruchavik — usiaho 2 litry, mahutnaść — 125 k.s.
Ścipłyja techničnyja pakazčyki tłumačacca tym, što heta «replika» na Porsche 924 Carrera GT. Pa fakcie heta samy zvyčajny Porsche 924.
«Mašyna ŭ vydatnym stanie, byŭ maksimalna adnoŭleny vonkavy vyhlad aryhinała Porsche 924 Carrera GT», — havorycca ŭ apisańni.
Pieramožca ŭ naminacyi «Lepšaja restaŭracyja — 2022»
U Hrodnie za 18 999 dalaraŭ pradajuć Chevrolet Monza town coupe. Aŭtamabil, jak i čyrvony «Porš», byŭ vypuščany ŭ 1979 hodzie. Pad kapotam u jaho bienzinavy ruchavik abjomam 3,2 litra.
Jak paznačana ŭ apisańni, redki «amierykaniec» z 2012 hoda znachodzicca ŭ adnych rukach. Restaŭracyja była zavieršana tolki letaś.
«Udzielnik retravystaŭ, pieramožca ŭ naminacyi «Lepšaja restaŭracyja — 2022». Za ŭvieś termin vałodańnia aŭtamabilem, druhoha takoha ž na ŭsioj postsavieckaj prastory ja nie znachodziŭ», — zapeŭnivaje pradaviec.
«Jahuar» sa Štataŭ
Siarod inšych cikavych varyjantaŭ možna adznačyć Jaguar XJ. Za kupe 1975 hoda prosiać 23 tysiačy dalaraŭ.
Aŭtamabil znachodzicca ŭ Minsku. Pradaviec adznačaje, što jon ułaśnik hetaha aŭto.
«Pryvoziŭsia pad restaŭracyju. Ciapier niama času zajmacca (u pracy inšyja aŭtamabili)», — havorycca ŭ apisańni.
Vyhladaje, što hety aŭtamabil pryjechaŭ u Biełaruś u 2020 hodzie. Takuju infarmacyju možna atrymać praz aŭkcyjonny numar, naklejeny na łabavoje škło.
Atrymlivajecca, što tolki myty na hety aŭtamabil składali minimum kala 12 tysiač jeŭra.
«Žyhuli» ŭ kalekcyjnym stanie
Nie našmat tańniej za redkich «amierykancaŭ» u Biełarusi pradajuć «italjanku». Za VAZ-2102 1972 hoda vypusku prosiać 16 500 dalaraŭ ZŠA.
Pradaviec śćviardžaje, što aŭtamabil znachodzicca ŭ kalekcyjnym stanie i maje zavodskuju afarboŭku.
Zvanić jon prosić tolki realna zacikaŭlenych ludziej, a kab nichto nie padumaŭ, što ŭ canie niejkaja adrukoŭka, ułaśnik pradublavaŭ hetuju infarmacyju ŭ apisańni da aŭto.
Jość siarod retraaŭtamabilej i adzin mikraaŭtobus VW Transporter T2.
Za mikraaŭtobus 1975 hoda vypusku prosiać 9 tysiač dalaraŭ. Znachodzicca aŭtamabil u Kareličach.
Pradaviec śćviardžaje, što aŭtamabil da prodažu nie rychtavali, ale jon znachodzicca ŭ vydatnym stanie, jaki dazvolić samastojna prajści dziaržtechahlad.
Čytajcie taksama:
«Aŭtamabil ź niezabyŭnymi emocyjami». Jakija kabryjalety prapanuje biełaruski rynak
Pa canie dźviuch kvater u Minsku. Jakija kiempiery pradajuć u Biełarusi
