«Ja nie mahu dychać!» U ZŠA znoŭ paŭtaryłasia historyja z zadušeńniem ciemnaskuraha padazravanaha VIDEA
Aficery palicyi ŭ štacie Ahaja padčas zatrymańnia vypadkova zabili 53-hadovaha afraamierykanca, užyŭšy da jaho dušylny pryjom. Padobnaja historyja ŭžo zdarałasia ŭ ZŠA ŭ 2020 hodzie, što tady spravakavała adnyja z najbujniejšych masavych pratestaŭ pa ŭsioj płaniecie.
Kadr z nahrudnaj kamiery palicyjanta ŭ amierykanskim štacie Ahaja, na jakim bačny praces zadušeńnia ciemnaskuraha padazravanaha. Krynica: CBS News / Canton Police Department
Jak paviedamlaje ahienctva CBS News, jašče tydzień tamu palicyja horada Kantan u amierykanskim štacie Ahaja padčas zatrymańnia vypadkova zabiła 53-hadovaha afraamierykanca Frenka Tajsana, jaki pierad hetym źnios na mašynie elektryčny słup i ŭciok ad palicyjantaŭ u najbližejšy bar.
Pavodle aficyjnaj zajavy departamienta miascovaj palicyi, śmierć afraamierykanca adbyłasia paśla ŭžyvańnia da jaho palicyjantami dušylnaha pryjomu (adnak sam pryjom palicyja nie nazyvaje aficyjnaj pryčynaj śmierci).
Palicyja horada tolki ciapier vyrašyła padzialicca videa z nahrudnaj kamiery adnaho sa svaich aficeraŭ, dzie bačny sam praces zatrymańnia Frenka Tajsana i jaho zadušeńnie. Hetaje videa publikuje CBS News (aściarožna, žorstkija kadry!).
Na kadrach bačna, jak padčas zatrymańnia Frenk Tajsan sprabuje kryčać palicyjantam i inšym ludziam vakoł, što nie moža dychać i što jaho źbirajucca zabić. Aficer nie adrazu spyniŭ dušylny pryjom, praciahvajučy razmaŭlać sa svaim naparnikam i minakami, a kali skončyŭ, afraamierykaniec užo pierastaŭ adhukvacca na kamandy.
Palicyjanty stali vymiarać puls Tajsana i rabić jamu niepramy masaž serca, adnak mužčynu heta nie vyratavała, jaho paśla zabrała chutkaja. U balnicy kanstatavali śmierć mužčyny.
Z-za zdareńnia departamient palicyi abviaściŭ aficyjnaje rasśledavańnie, padčas jakoha dva patrulnyja aficery, jakija ŭdzielničali ŭ zatrymańni afraamierykanca, byli adchilenyja ad słužby i adpraŭlenyja ŭ adpačynak.
Cieła Tajsana było padvierhnuta anatamavańniu, a pareštki byli pieradadzienyja ŭ miascovaje pachavalnaje biuro. Siamja mužčyny pakul nie davała kamientaryjaŭ ŚMI, a mer horada Kantana ŭžo vykazaŭ joj spačuvańni.
Ahienctva CBS News taksama adznačaje, što Frenk Tajsan adbyvaŭ 24-hadovy termin u turmie za vykradańnie čałavieka i kradziež majomaści dy vyjšaŭ jašče ŭ pačatku krasavika pa ŭmoŭna-daterminovym vyzvaleńni. Mužčyna adrazu ž parušyŭ praviły previentyŭnaha kantrolu, nie paviedamiŭšy ŭ palicyju pra svajo vyzvaleńnie.
53-hadovy Frenk Tajsan, jaki byŭ vypadkova zabity palicyjaj padčas zatrymańnia. Pierad hetym mužčyna na mašynie źnios elektryčny słup, a zatym uciok ad palicyi ŭ najbližejšy bar. Fota: AP
Nahadajem, što padobnaja historyja adbyłasia ŭ ZŠA i ŭ 2020 hodzie, kali ciemnaskury Džordž Fłojd byŭ zatrymany palicyjantami ŭ Minieapalisie (štat Miniesota). Mužčynu tady zapadozryli ŭ vykarystańni falšyvaj kupiury ŭ kramie.
Pry zatrymańni palicyjanty pavalili Fłojda na asfalt, choć jon, pa słovach vidavočcaŭ, nie akazvaŭ supracivu. Adzin z palicyjantaŭ, Derek Šovin, nacisnuŭ kalenam jamu na šyju, druhi — Tomas Lejn — trymaŭ za nohi. Niahledziačy na prośby Fłojda pra dapamohu i skarhi na niedachop pavietra, Šovin nie adpuściŭ jaho — Fłojd pamior ad udušša.
Jahonaja śmierć vyklikała masavyja pratesty suprać žorstkaści i rasavaj dyskryminacyi ŭ palicyi nie tolki ŭ ZŠA, ale i ŭ mnohich krainach śvietu.
Siamja Fłojda atrymała kampiensacyju 27 miljonaŭ dalaraŭ, a aficery palicyi, jakija jaho zabili, atrymali turemnyja terminy.
Čytajcie taksama:
«Vy jaho prydušycie!» Jak «krucili» mužčynu, na hałavu jakoha ŭ Hancavičach kalenam nastupiŭ daišnik
Połacki kikbaksior źbiŭ amapaŭca, ale ŭ turmu nie siadzie
Vykanaŭcy teraktu ŭ centry Stambuła dali 7 pažyćciovych terminaŭ, ale 1794 hady ahułam
