Ci čakajuć Ukrainu žachlivaj siły ŭdary z pavietra ŭsioj masaj rasijskaj avijacyi?
Rasijskija Pavietrana-kaśmičnyja siły majuć vialikuju kolkaść srodkaŭ, jakaja niesuvymiernaja z tym, što jość va Ukrainy. Ale ci zmoža Maskva ich vykarystać dla taho, kab nie dapuścić advajavańnia zachoplenych ukrainskich terytoryj? Pra heta źjaviŭsia artykuł u francuzskaj haziecie Le Monde.
Viertalot Ka-52 «Alihatar», źbity ŭ kastryčniku 2022 hoda ŭ Chiersonskaj vobłaści. Fota: tvitar Siarhieja Čumaka @Serg19992
Aŭtar artykuła nahadvaje, što na papiery patencyjał Pavietrana-kaśmičnych sił (PKS) Rasii praktyčna nie źmianiŭsia ad pačatku vajny. Ličycca, što rasijskaje kamandavańnie nikoli nasamreč nie imknułasia zavajavać ukrainskaje nieba jak ź mierkavańniaŭ daktryny, tak i ź mierkavańniaŭ mahčymaściaŭ.
U jakim stanie rasijskija PKS
Vynikam takoha padychodu, pa źviestkach sajta Oryx, na jakija spasyłajecca aŭtar artykuła, stała strata «tolki» 82 bajavych samalotaŭ, u asnoŭnym Su-25 i Su-34, i 87 viertalotaŭ, asabliva Ka-52 «Alihatar». Heta sapraŭdy niaznačnaja kolkaść, kali ŭličvać, što pierad vajnoj, zhodna z danymi štohodnika Military Balance, jaki vydajecca brytanskim analityčnym centram Mižnarodnaha instytuta stratehičnych daśledavańniaŭ, u Rasii było bolš za 1300 bajavych samalotaŭ.
U artykule pryvodziacca słovy palitołaha i stvaralnika błoha «Čyrvony samavar» (Red Samovar), pryśviečanaha rasijskaj vajennaj tematycy, Bienžamena Hravisa (Benjamin Gravisse):
«U toj čas, jak rasijskija Suchaputnyja vojski z pačatku bajavych dziejańniaŭ zapłacili vielmi vysokuju canu, PKS, niahledziačy na značnyja straty, usio jašče majuć patencyjał, blizki da taho, jaki byŭ da lutaha 2022 hoda».
Pry hetym, jak ličyć ekśpiert, Rasija moža kamplektavać svaje eskadrylli z novych samalotaŭ sa svaich avijacyjnych zavodaŭ.
Vydańnie adznačaje, što takaja zachavanaść patencyjału rasijskich PKS vyklikaje vialikuju zakłapočanaść. Tym bolš što ŭkrainskaja supraćpavietranaja abarona z vosieni 2022 hoda pastajanna znachodzicca ŭ dziejańni. Navat kali ŭdary rakiet i bieśpiłotnikaŭ majuć nievialiki stratehičny efiekt, jany ŭpłyvajuć na ŭkrainskija zapasy bojeprypasaŭ.
Jak vyhladaje situacyja Ukrainy
Aŭtar sa spasyłkaj na dakumienty, jakija ŭ krasaviku patrapili na płatformu Discord, nahadvaje, što ŭ kancy lutaha Pientahon padličyŭ, što
«zdolnaść Ukrainy zabiaśpiečvać supraćpavietranuju abaronu siaredniaj dalokaści dla abarony [linij frontu] budzie całkam vyčarpana da 23 maja».
U artykule adznačajecca, što z toj pary zachodnija sajuźniki paskoryli svaje pastaŭki bojeprypasaŭ «ziamla — pavietra», ale arsienał Kijeva znachodzicca ŭ napružanym stanie. U paćviardžeńnie hetych słoŭ aŭtar cytuje navukovaha supracoŭnika Fondu stratehičnych daśledavańniaŭ Vensana Ture (Vincent Tourret):
«Ukrainie zaŭtra, mahčyma, daviadziecca vybirać pamiž abaronaj svaich haradoŭ i abaronaj svajho kontrnastupleńnia».
Tym nie mienš, adznačaje aŭtar, vajennyja analityki davoli skieptyčna staviacca da zdolnaści PKS pieraškodzić bujnomu kontrnastupleńniu. U adroźnieńnie ad zachodnich dziaržaŭ, dla jakich kantrol nad niebam źjaŭlajecca nieabchodnaj umovaj dla lubych dziejańniaŭ na ziamli, rasijskija vajskoŭcy razhladajuć PKS pierš za ŭsio jak dapamožny srodak dla svajoj artyleryi.
Takim čynam, jany nie pravodzili masiravanych udarnych kampanij u pačatku kanfliktu, jakija dazvolili b źniščyć pavietranyja i supraćpavietranyja mahčymaści Ukrainy.
U takoj situacyi rasijskim samalotam budzie ciažka manieŭravać. Vydańnie cytuje daśledčyka Karaleŭskaha abjadnanaha instytuta abaronnych daśledavańniaŭ Ëhana Michiela (Yohann Michel):
«Rasijskim piłotam zaŭsiody budzie składana nablizicca da linii frontu, kali nie ŭdasca chacia b častkova dla ŭkraincaŭ zakryć nieba».
Jakija prablemy ŭ rasijskaha boku
Vydańnie adznačaje, što rasijskija lotčyki z pačatku kanfliktu prademanstravali značnyja niedachopy ŭ padtrymcy svaich naziemnych vojskaŭ. Jany staralisia trymacca dalej ad frontu i abstrelvać rakietami ŭkrainskija nieruchomyja pazicyi. Heta źviazana z adsutnaściu jak ahulnavajskovaj padrychtoŭki (što jość hałoŭnaj rysaj rasijskaj armii), tak i ź ciažkaściami ŭ naviadzieńni na pazicyi praciŭnika.
U paćviardžeńnie hetaj dumki aŭtar artykuła cytuje Vensana Ture:
«Srodkaŭ celeŭkazańnia ŭ rasijskaha boku mała, i jany časta zvodziacca da łazieraŭ, jakija pracujuć tolki ŭ jasnaje nadvorje i pablizu ad abjektaŭ. Tamu PKS majuć šmat prablem z naviadzieńniem na ruchomyja celi».
Jašče adzin faktar, na jaki źviartaje ŭvahu aŭtar, — heta adsutnaść kaardynacyi pamiž vojskami, što pavialičvaje ryzyku siabroŭskaha ahniu i vyklikaje strach u rasijskich piłotaŭ.
Na dumku analitykaŭ, adsutnaść daśviedčanych piłotaŭ taksama źnižaje mahčymaści PKS. Vydańnie cytuje spravazdaču Karaleŭskaha abjadnanaha instytuta abaronnych daśledavańniaŭ, apublikavanuju ŭ listapadzie 2022 hoda:
«Uličvajučy abmiežavanuju kolkaść hadzin palotaŭ i praktyku padrychtoŭki ŭ padraździaleńniach, PKS ustupili ŭ kanflikt ź mienš čym 100 całkam padrychtavanymi piłotami. U spałučeńni z vajennaj kulturaj, jakaja daručaje vykanańnie najbolš niebiaśpiečnych misij samym daśviedčanym ekipažam, straty asabovaha składu, jakija panieśli PKS, niepraparcyjna paŭpłyvali na hetyja kadry, źnižajučy ahulnuju efiektyŭnaść sił i ich zdolnaść navučać novych piłotaŭ».
Nastupnym strymlivajučym faktaram, jaki nazyvaje aŭtar artykuła, zjaŭlajucca rasijskija pravały ŭ płanie techničnaha absłuhoŭvańnia. Toje, što ŭ armijach nazyvajuć «zabieśpiačeńnie bojehatoŭnaści».
Zhodna z roznymi daśledavańniami, uzrovień bojehatoŭnaści samalotaŭ Rasii pierad vajnoj aceńvaŭsia jak mienšy, čym 50%. Aŭtar zaŭvažaje, što heta adnosna nizki pakazčyk u paraŭnańni z zachodnimi krainami. U jakaści prykładu jon spasyłajecca na danyja z apublikavanaj u lutym spravazdačy francuzkaha parłamienta, dzie adznačajecca, što ŭ 2021 hodzie ŭ francuzskich bajavych samalotaŭ hety pakazčyk składaŭ 81%.
Aŭtar cytuje mierkavańnie Ëhana Michiela:
«Vajna vysokaj intensiŭnaści, jakaja doŭžycca čatyrnaccać miesiacaŭ, vypraboŭvaje techniku i ludziej. Bojehatoŭnaść rasijskich samalotaŭ da kanfliktu nie była dobraj i, napeŭna, nie palepšyłasia paśla».
Vydańnie adznačaje, što zachodnija vajskovyja štaby ŭpeŭnienyja va ŭstojlivaści ŭkrainskich srodkaŭ supraćpavietranaj abarony. Pakazčyk pierachopu ŭ ich vyšejšy za 75%. Heta ličycca «vielmi dobrym».
Dziakujučy dapamozie Zachadu, ukrainskija vojski majuć kompleksnuju sistemu supraćpavietranaj abarony, jakaja składajecca z roznych typaŭ uzbrajeńnia i srodkaŭ. Takaja sistema zdolnaja być pahrozaj rasijskaj avijacyi praktyčna ŭ roznych scenaryjach i ŭmovach. Jana składajecca ź niekalkich uzroŭniaŭ ci słajoŭ abarony. Vajskoŭcy takuju sistemu nazyvać «šmatsłojnaj».
U kancy aŭtar cytuje słovy francuzskaj vajskovaj krynicy:
«Patrebny pavietrany katok, kab źniščyć ukrainskuju naziemna-pavietranuju abaronu, čyja sietka zastajecca tryvałaj, z ryzykaj kałasalnych strat dla rasijskaha boku».
Krynica adznačaje, što «navat daśviedčany piłot nie advažycca ŭstupić u supraćstajańnie z praciŭnikam, u jakoha majecca nadziejnaja supraćpavietranaja abarona».
Čytajcie jašče:
Pientahon paličyŭ košt vajskovaj dapamohi Ukrainie. Jaje pieraacanili na 3 miljardy
«Naša Niva» — bastyjon biełaruščyny
PADTRYMAĆ
