Što takoje Discord — płatforma, na jakoj byli apublikavanyja sakretnyja amierykanskija dakumienty, i jak joj karystacca
Jak viadoma, na minułym tydni ŭ sacyjalnyja sietki patrapiłi sakretnyja dakumienty ZŠA i NATA. Chutka stała viadomaja i asoba taho, chto heta zrabiŭ. Dakumienty na praciahu hoda raźmiaščalisia na dyskusijnaj płatformie dla hiejmieraŭ Discord.
Pra toje, što heta za płatforma, raspaviadaje Le Monde. Adznačajecca, što jana była stvoranaja ŭ 2015 hodzie i na siońnia štomiesiac maje kala 190 miljonaŭ karystalnikaŭ. Pieršapačatkova stvoranaja dla palahčeńnia hałasavoha abmienu pamiž hulcami ŭ videahulni, hetaja płatforma nabyła vialikuju papularnaść padčas pandemii, kali joj stali karystacca studenty, vučni, nastaŭniki i vykładčyki dla anłajn-zaniatkaŭ.
Discord sa štab-kvateraj u San-Francyska stała siabie pazicyjanavać jak univiersalny instrumient dla aŭdyja, videa i tekstavych čataŭ, kštałtu Skype. Prahrama maje viersiju jak dla kampjutara, tak i dla smartfona. Ekśpierty ličać, što pa svaim funkcyjanale jana pieraŭzychodzić takija miesiendžary, jak Telegram ci WhatsApp.
Płatforma raźmiaščaje supołki z kolkaściu ŭdzielnikaŭ ad niekalkich čałaviek da niekalkich tysiač. Jany zasnavanyja na pryncypie sierviera, jaki karystalnik Interneta moža adkryć biaspłatna. Jon moža zrabić jaho pryvatnym abo ahulnadastupnym i zaprasić inšych ludziej razmaŭlać u roznych adkrytych kanałach unutry samoha sierviera.
Pośpiech płatformy niekatoryja daśledčyki tłumačać stomlenaściu ad bujnych sacyjalnych sietak, takich jak Twitter ci Facebook, jakija złučajuć miljony karystalnikaŭ Interneta i majuć šmat niepradbačanych pabočnych efiektaŭ. Tamu ludzi imknucca da ŭdziełu ŭ mienšych supołkach, dzie abjadnanyja adnadumcy.
Adnak płatforma chutka pryciahnuła ludziej z devijantnymi schilnaściami. Naprykład, u 2017 hodzie niekalki rasśledavańniaŭ vyjavili isnavańnie šmatlikich siervieraŭ, źviazanych ź nieanacysckimi i ŭltrapravymi hrupami. U 2022 hodzie stała viadoma, što na joj abmiarkoŭvaŭ svaje płany budučy zabojca naviedvalnikaŭ supiermarkieta ŭ Bufała (ZŠA).
Jak pakazała rasśledavańnie, pieršyja dakumienty byli raźmieščanyja na sierviery Thug Shaker Central, jaki abjadnoŭvaŭ kala dvaccaci čałaviek i byŭ dastupny tolki pa zaprašeńniach. Adzin z udzielnikaŭ hetaha sierviera ŭ pačatku sakavika pierapościŭ niekatoryja z kanfidencyjnych dakumientaŭ na inšym sierviery. Zatym druhi karystalnik raźmiaściŭ fotazdymki ŭ trecim, značna bolš papularnym sierviery, pryśviečanym kartam dla videahulni Minecraft.
Čat-hrupy Discord nielha raźmiaščać na pryvatnych siervierach karystalnikaŭ. Usie razmovy, pierapiska i adpraŭlenyja fajły zachoŭvajucca na siervierach kampanii. U adroźnieńnie ad inšych miesiendžaraŭ, takich jak Telegram, usie razmovy ŭ Discord nie šyfrujucca, a sama płatforma maje mocnuju kamandu maderataraŭ. Jany sočać za tym, kab karystalniki prytrymlivalisia praviłaŭ servisu. U vypadku parušeńniaŭ vydajucca papiaredžańni i vydalajucca jak ulikovyja zapisy, tak i cełyja čaty.
Usio heta daje śledčym mahčymaść spadziavacca na toje, što kampanija zmoža nadać nieabchodnuju infarmacyju ŭ ramkach rasśledavańnia ŭciečki infarmacyi, jakaja tyčycca abmienu fajłami i IP-adrasaŭ karystalnikaŭ, u pieršuju čarhu ŭdzielnikaŭ hrupy Thug Shaker Central.
Čytajcie jašče:
Element: što za miesiendžar, jakim karystajucca Bundeśvier, finy i biełaruskaja apazicyja
«Niebiaśpiečny». Jeŭrakamisija zabaraniła svaim supracoŭnikam karystacca TikTok na ŭsich pryładach
Technałohii, jakija pryjšli ŭ 2000-ja i zrabili nas ščaślivymi: internet, mabilniki, hulni. Nastalhujem
