Bujny mabilny raspracoŭščyk Belka Games zvolniŭ minimum 20% piersanału
2023 hod byŭ składanym dla Belka Games.
Partał app2top.ru dniami zaŭvažyŭ, što ŭ LinkedIn pačali masava źjaŭlacca abjavy pra pošuk pracy ad supracoŭnikaŭ Belka Games. Skaračeńni pierš za ŭsio zakranuli liniejnych śpiecyjalistaŭ. Pavodle słoŭ hiendyrektara studyi, «pad nož» adpravili piatuju častku štata, piša Devby.io.
Siarod zvolnienych ličacca śpiecyjalisty pa naratyŭnym dyzajnie, rekrutynhu, techničnym i 2D-arcie, hiejm-dyzajniery, kamjunici-mieniedžary, a taksama niekalki cim-lidaŭ.
Usiaho vydańnie naličyła kala 30 profilaŭ z paznakaj Open to work. Na aficyjnym sajcie kampanii ciapier raźmieščany try vakansii.
Pa danych AppMagic, 2023 hod byŭ składanym dla Belka Games.Jaje mabilnaja vyručka ŭpała da $ 5-6 młn u miesiac — u pikavy dla studyi 2021 hod jana była $10-11 młn.
Miarkujučy pa analitycy, u druhuju pałovu 2023 hoda kampanija pačała naroščvać zakupki trafiku. U śniežni miesiačnyja abjomy dasiahnuli ŭzroŭniu 2021 hoda, ale heta nie pryviało da supastaŭnaha rostu zarobku.
U lutym mabilnaja vyručka studyi ŭpała da $ 4,6 młn. Apošni raz jana zarablała stolki ŭ siaredzinie 2019 hoda. Z ulikam taho, što ciapier dzionnaja vyručka Belka Games składaje prykładna $120-150 tysiač, jaje vyručka za krasavik moža skłaści prykładna 4 młn.
«Kampanija skarektavała stratehiju, u vyniku čaho my stali krytyčniej hladzieć na pradukty. Było pryniata składanaje rašeńnie ab skaračeńni 20% kamandy. My ŭdziačnyja kožnamu za nieacenny ŭkład u raźvićcio Belka Games, i vykarystoŭvajem usie našy resursy dla taho, kab chłopcy zmahli znajści novyja karjernyja mahčymaści», — adznačyŭ CEO Belka Games Alaksandr Bahdanaŭ u kamientary app2top. Jon dadaŭ, što kampanija płanuje zasiarodzicca na raspracoŭcy novych chitoŭ i padrychtavacca da nastupnaha etapu rostu.
Belka Games — adzin z najbujniejšych mabilnych raspracoŭščykaŭ ź biełaruskimi karaniami. Studyja źjaŭlajecca stratehičnym partnioram AppLovin — suśvietnaj mabilnaj rekłamnaj płatformy.
U pačatku lutaha stała viadoma, što Belka Games likviduje jurydyčnuju asobu ŭ Minsku. Aficyjna pracedura była zapuščana ŭ kancy minułaha śniežnia.
U sakaviku 2022 hoda kampanija stała pastupova sychodzić z Rasii. Ofis u Biełarusi na toj momant praciahvaŭ pracavać, ale jašče ŭ 2021 hodzie kampanija ŭviała maratoryj na najom u krainie. Žadajučym pierajechać davali mahčymaść uładkavacca ŭ Polščy, Litvie i Čarnahoryi. Šmat supracoŭnikaŭ ź Biełarusi sychodzili samastojna, chtości zhadžaŭsia na rełakiejt i pierajazdžaŭ, kahości skaračali.
Na luty 2024 hoda ŭ kampanii pracavała bolš za 300 čałaviek. U jaje adkryty padraździaleńni ŭ šaści krainach: u Litvie, Polščy, Ukrainie, Hruzii, Čarnahoryi i na Kipry.
