U leksikonie Kačanavaj źjaviŭsia novy vyraz: «Prava ŭsich narodaŭ»
Z pramovaj na pasiadžeńni Rady PA ADKB u Minsku vystupiła staršynia Savieta Respubliki Natalla Kačanava. Na hety raz jaje śpičrajtar — abo niejrasietka, jakoj jon karystajecca — dadali ŭ tradycyjny nabor banalnaściaŭ, štampaŭ i słavasłoŭja na adras Łukašenki novy akcent.
Staršynia Savieta Respubliki Natalla Kačanava — najbližejšy čałaviek u atačeńni Łukašenki. U vypadku jaho śmierci (niehvałtoŭnaj), Kačanavaj, zhodna z łukašenkaŭskim zakanadaŭstvam, pierachodzić kiraŭnictva krainaj
Kačanava nazvała simvaličnym toje, što sustreča Rady PA ADKB prachodzić mienavita 18 maja. Bo heta «śvietłyja majskija dni, adznačanyja śviatkavańniem 78-j hadaviny Vialikaj Pieramohi», i «heta viečny napamin nam usim, nakolki važnyja biaśpieka, mir i zhoda ŭ našych krainach, u rehijonie i ŭ cełym na ŭsioj ziamli».
Kačanava zaŭvažyła, što «historyja padaje čałaviectvu ŭroki — vučyć, pamiatać i abaraniać praŭdu, kab nie dapuścić paŭtareńnia fatalnych pamyłak».
«Vidavočna, nie ŭsim, asabliva na Zachadzie, dadziena zrazumieć hetuju iścinu», — miarkuje jana. I raspluščvaje vočy: «Toje, što adbyvajecca ŭ našym rehijonie, u pryvatnaści va Ukrainie, — pramoje śledstva dzivackaha pierapisvańnia padziej minułaha. Heta adkryty i cyničny ździek sa śviatoha podźvihu hierojaŭ, jakija skłali svaje hałovy ŭ baraćbie za svabodu i niezaležnaść Radzimy, za prava ŭsich narodaŭ na ščaślivaje žyćcio pad mirnym niebam».
Kačanava ŭ charakternaj dla siabie maniery adznačyła, što
«Prezident Respubliki Biełaruś, hłybokapavažany Alaksandr Ryhoravič Łukašenka, jašče zadoŭha da kanfliktu va Ukrainie na mižnarodnych kanfierencyjach u Minsku pa pytańniach biaśpieki nieadnarazova padkreślivaŭ najvyšejšuju značnaść miru dla ŭstojlivaha raźvićcia luboj krainy, zaklikaŭ suśvietnuju supolnaść da dyjałohu, umacavańnia davieru i supracoŭnictva».
Tady słovy Łukašenki nie pačuli, ale «ciapier prychodzić usieahulnaje ŭśviedamleńnie ich hłybini i viečnaha sensu».
Čytajcie taksama:
«Pad mudrym kiraŭnictvam architektara suvierennaj Biełarusi». Kačanava zadaje novy kanon kulta asoby
Što za mužčyna supravadžaje Natallu Kačanavu?
Kačanava zajaviła, što biełarusam nie patrebnyja dalary
Kačanava choča arhanizavać «ulik sacyjalnaj karysnaści hramadzian»
Prava na maskavickuju akupacyju?