«Heta nastolki niespraviadliva, što padobna da načnoha kašmaru»
Za kratami zaraz šeść advakataŭ, dziasiatki byli vymušanyja raźvitacca z prafiesijaj abo emihravać. Biełaruskaja asacyjacyja advakataŭ pravoŭ čałavieka prapanuje pisać listy źniavolenym advakatam.
Pa stanie na 14 maja 2023 hoda ŭ Biełarusi 1483 čałavieki pryznany palityčnymi źniavolenymi, ź ich nie mienš za 6 čałaviek — advakaty.
Usie advakaty, pryznanyja palitviaźniami, akazalisia ŭ niavoli praz žadańnie dapamahać svaim klijentam, niahledziačy na pahrozy, cisk i represii. Hetyja advakaty ŭdzielničali ŭ palityčnych pracesach, abaraniali palitviaźniaŭ, z pryčyny čaho sami stali palitviaźniami. Usie jany, jak i kožny čałaviek sa śpisa palityčnych źniavolenych, pavinny być vyzvaleny i reabilitavany, kryminalnyja spravy ŭ dačynieńni da ich pavinny być pierahledžany i spynieny.
Na žal, zaraz palityčnyja źniavolenyja sutykajucca ź nieabhruntavanym i vielmi mocnym abmiežavańniem mahčymaści vieści pierapisku, a ŭ šerahu vypadkaŭ svajaki i advakaty nie majuć da ich dostupu ciaham miesiacaŭ, što źjaŭlajecca hrubym parušeńniem jak mižnarodnych standartaŭ, tak i nacyjanalnaha zakanadaŭstva. Ale, niahledziačy na ŭsio heta, my pierakananyja, što navat pry adsutnaści chutkaj pramoj suviazi ź imi my ŭsio roŭna pavinny padtrymlivać ich i nahadvać inšym pra ich jak maha čaściej.
Biełaruskaja asacyjacyja advakataŭ pravoŭ čałavieka sumiesna z prajektam «Prava na abaronu» napiaredadni Dnia salidarnaści z palityčnymi źniavolenymi Biełarusi, jaki pravodzicca ŭžo druhi hod 21 maja, prapanuje dałučycca da akcyi «Napišy advakatu!».
U miežach hetaj akcyi my prosim usich i kožnaha, kamu nieabyjakavy los advakataŭ, jakija znachodziacca ŭ źniavoleńni, i niezaležna ad taho, ci byli vy ich klijentami, siabrami abo kalehami, ci asabista znajomyja nie byli — napisać na adras adnaho abo niekalkich ź ich adkryty list, raźmiaściŭšy jaho ŭ toj ci inšaj sacyjalnaj sietcy z chešteham #napišyadvakatu ci #napišiadvokatu. Akramia taho, kali publičnaje raźmiaščeńnie paviedamleńniaŭ u sietcy moža być dla vas niebiaśpiečnym, svoj list vy možacie dasłać na elektronnuju poštu asacyjacyi ([email protected]) albo na elektronnuju poštu prajekta «Prava na abaronu» ([email protected]) biez ukazańnia svajho imia, zachavaŭšy svaju ananimnaść u publičnaj prastory. 21 maja buduć apublikavanyja ŭsie atrymanyja ananimnyja listy i ŭsie listy z cheštehami ŭ sacyjalnych sietkach. Taksama listy buduć pieradadzieny svajakam advakataŭ.
«Pamiataju sudovyja pasiadžeńni, dzie ty vyznačaŭsia krasamoŭstvam, i doŭhija telefonnyja razmovy pra pierśpiektyvy spravy, stratehii dalejšych dziejańniaŭ pa joj. Tvaje razmovy z klijentami, supracoŭnikami suda, pravaachoŭnikami. Stolki ŭ hetym było hodnaści, što było niemahčyma adarvać pohlad! Mianie zachaplała tvaja vytrymka. U mianie tak nie atrymlivałasia, tempieramient nie toj.
Viedaješ, ja ŭpeŭnieny, što da nas vierniecca i naša lubimaja vulica, i naša prafiesija. Bo toje, što adbyvajecca z taboj, — heta nastolki niespraviadliva, što padobna da načnoha kašmaru.
Viedaju, što jon rana ci pozna skončycca. Čym raniej, tym lepš dla ŭsich nas», — napisaŭ adzin z advakataŭ asudžanamu na 10 hadoŭ Alaksandru Danileviču.
Na hety momant u źniavoleńni pa palityčnych matyvach znachodziacca advakaty:
- Maksim Znak (6 vieraśnia 2021 hoda vyniesieny vyrak — 10 hadoŭ pazbaŭleńnia voli);
- Alaksandr Danilevič (10 krasavika 2023 h. vyniesieny vyrak — 10 hadoŭ pazbaŭleńnia voli);
- Vital Brahiniec (2 lutaha 2023 h. vyniesieny vyrak — 8 hadoŭ pazbaŭleńnia voli);
- Nastaśsia Łazarenka (11 maja 2023 h. vyniesieny vyrak — 6 hadoŭ pazbaŭleńnia voli);
- Julija Jurhilevič (zatrymana 30 žniŭnia 2022 hoda; pavodle stanu na siońniašni dzień razhladu spravy jašče nie było);
- Alaksiej Barodka (zatrymany ŭ studzieni 2023 hoda, 15 maja pačaŭsia razhlad spravy).
Čytajcie taksama:
