«Heta samy strašny kašmar dla nas». Pažar u chostele ŭ Novaj Ziełandyi: šeść čałaviek zahinuli, 11 prapali bieź źviestak
Prynamsi šeść čałaviek zahinuli ŭ vyniku pažaru ŭ chostele Loafers Lodge ŭ stalicy Novaj Ziełandyi — Vielinhtanie. Los jašče 11 čałaviek nieviadomy, i premjer-ministr Novaj Ziełandyi Krys Chipkins nie vyklučyŭ, što kolkaść achviar moža ŭzraści, piša Bi-bi-si.
Kolki mienavita było ludziej u chostele padčas pažaru, pakul dakładna nie viadoma. Fota: Wellington City Council
Pažar u čatyrochpaviarchovym domie z 92 pakojami pačaŭsia kala poŭnačy na apošnim paviersie.
Pryčyna ŭzharańnia nie nazyvajecca, ale, jak pišuć ŚMI, budynak nie byŭ abstalavany raspylalnikami vady i ŭ im nie spracavała pažarnaja sihnalizacyja. Častka budynka razburanaja, ułady sprabujuć vyśvietlić pryčynu incydentu.
Bolš za 50 čałaviek udałosia vyratavać, ale jość niekatoraja kolkaść ludziej, miescaznachodžańnie jakich nieviadomaje.
«Heta samy strašny kašmar dla nas. Trahiedyja dla ŭsich paciarpiełych. Maje ščyryja spačuvańni tym, chto straciŭ blizkich», — prakamientavaŭ maštab biedstva hałoŭny pažarny Vielinhtana Nik Pajet.
Adzin z žycharoŭ Loafers Lodge Tała Sili raspavioŭ novaziełandskamu radyjo, što ŭnačy zaŭvažyŭ dym pad dźviaryma, adčyniŭ ich i ŭbačyŭ, što ŭvieś kalidor byŭ u dymie. Jon skoknuŭ z akna na dach najbližejšaha budynka, dvuma pavierchami nižejšaha.
«Heta było žudasna strašna, ale ŭ mianie byŭ vybar — abo skakać z akna, abo zhareć žyŭcom», — skazaŭ jon.
Kolki mienavita było ludziej u chostele padčas pažaru, pakul dakładna nie viadoma. Pa niekatorych danych, ich było kala 90.
Loafers Lodge zdaje pakoi jak na karotki, tak i doŭhi termin, čaściakom pasłuhami chosteła karystaŭsia piersanał balnic, vachtaviki, budaŭniki, a taksama ludzi ź nizkim uzroŭniem dastatku.
Čytajcie taksama:
«Sił bolš niama». Premjer-ministr Novaj Ziełandyi Džasinda Ardern abviaściła ab adstaŭcy
