Refierendum va Uźbiekistanie: pavodle aficyjnych źviestak, 90% prahałasavali za abnuleńnie terminaŭ prezidenta Mirzijojeva
Vybarščyki va Uźbiekistanie, pavodle aficyjnych źviestak, pieravažnaj bolšaściu hałasoŭ padtrymali kanstytucyjnuju reformu, dziakujučy jakoj prezident Mirzijojeŭ zmoža zastavacca va ŭładzie da 2040 hoda, piša Bi-bi-si.
Šaŭkat Mirzijojeŭ. Fota: pres-słužba prezidenta Uźbiekistana
Vybarčaja kamisija abviaściła, što bolš za 90% vybarščykaŭ padtrymali reformu. Papraŭki pavialičvajuć termin prezidenctva ź piaci da siami hadoŭ i dazvalajuć prezidentu bałatavacca treci raz. Ciapier Šaŭkatu Mirzijojevu 66 hadoŭ, jon da 83 hadoŭ zmoža kiravać krainaj, jakuju ŭznačaliŭ u 2016 hodzie.
Mirzijojeŭ pryjšoŭ da ŭłady paśla śmierci pieršaha prezidenta Uźbiekistana Isłama Karymava, jaki kiravaŭ krainaj 26 hadoŭ.
Kanstytucyja Uźbiekistana była pryniataja ŭ 1992 hodzie. Siarod novaŭviadzieńniaŭ taksama zabarona śmiarotnaha pakarańnia.
U cełym źmieny datyčać 65% Kanstytucyi. Prezident śćviardžaje, što kardynalnyja reformy ŭdaskanalać kiravańnie krainaj i zabiaśpiečać bolš pravoŭ dla jaje žycharoŭ, ale jaho krytyki śćviardžajuć, što jany vyhadnyja pierš za ŭsio samomu Mirzijojevu.
Isłam Karymaŭ za dziesiacihodździ svajho kiravańnia pieratvaryŭ Uźbiekistan u adnu z samych represiŭnych krain u śviecie. Mirzijojeŭ raspačaŭ niekatoryja aściarožnyja kroki da palapšeńnia adnosin z Zachadam, u pryvatnaści, pry im u krainie stali pryciahvać turystaŭ z bahatych krain i admovilisia ad najbolš adyjoznych prykładaŭ represij. Admiena śmiarotnaha pakarańnia ŭ novaj Kanstytucyi ŭkładvajecca ŭ hetaje rečyšča.
Razam z tym, jaho apanienty adznačajuć, što parušeńni pravoŭ čałavieka praciahvajucca, u krainie niama realnaj apazicyi, a dziejnaść ŚMI žorstka kantralujecca.
