Ministr enierhietyki Ukrainy: Da viečara čaćviarha ŭ damy ŭkraincaŭ vierniecca śviatło
Enierhietyki Ukrainy abiacajuć, što da viečara čaćviarha ŭ damy ŭkraincaŭ vierniecca elektryčnaść. Napiaredadni, z pryčyny čarhovaha masiravanaha rasijskaha rakietnaha abstrełu ŭ mnohich rehijonach krainy, uklučajučy Kijeŭ, adbyŭsia błekaŭt.
Bieź śviatła i ciapła zastalisia miljony čałaviek i sotni abjektaŭ krytyčnaj infrastruktury — balnicy, adździaleńni reanimacyi.
Avaryjna ad enierhasistemy byli adklučanyja try atamnyja elektrastancyi: Chmialnickaja, Paŭdniova-Ukrainskaja i Rovienskaja, abiastočany bolšaść ciepłavych i hidraelektrastancyj.
«Da 4 ranicy my zmahli abjadnać enierhasistemu, ciapier jana znoŭ adzinaja. Zabiaśpiečanyja abjekty krytyčnaj infrastruktury, i my budziem pavialičvać hienieracyju. My raźličvajem, što da viečara buduć pracavać atamnyja stancyi, pastaŭlać elektraenierhiju ŭ sietku, i heta značna skarocić deficyt», — skazaŭ Hierman Hałuščanka, ministr enierhietyki i vuhalnaj pramysłovaści Ukrainy.
Paškodžańni enierhasistemy adbylisia taksama ŭ Adesie, Charkavie, Dniapry, Lvovie, Mikałajevie i inšych haradach.
Sa słoŭ Hałuščanki, paškodžańni naniesienyja maštabnyja, i na adnaŭleńnie spatrebicca čas.
Ź piatnicy, kali nie budzie novych paškodžańniaŭ infrastruktury, Ukraina znoŭ piarojdzie da płanavych adklučeńniaŭ elektraenierhii, dadaŭ ministr.
