Ułady: Čyrvony kaścioł zastaniecca kaściołam, ale ciapier treba «kanstruktyŭna spracavacca»
14 kastryčnika ŭ Minharvykankamie adbyłasia sustreča pradstaŭnikoŭ Kaścioła z pradstaŭnikami dziaržaŭnaj ułady, na jakoj była abmierkavana aktualnaja situacyja parafii śviatoha Symona i śviatoj Aleny ŭ Minsku (Čyrvony kaścioł).
U sustrečy ŭziali ŭdzieł Upaŭnavažany pa spravach relihij i nacyjanalnaściaŭ Alaksandr Rumak, namieśnik staršyni Minharvykankama Arciom Curan, dyrektar KUP «Minskaja spadčyna» Alaksandr Kochan i inšyja dziaržsłužačyja. Kaścioł na sustrečy pradstaŭlali Apostalski nuncyj u Respublicy Biełaruś arcybiskup Ante Jozič, Mitrapalit Minska-Mahiloŭski arcybiskup Juzaf Stanieŭski, pres-sakratar Minska-Mahiloŭskaj archidyjacezii ksiondz kanonik Juryj Sańko.
Dyrektaram KUP «Minskaja spadčyna» byŭ akreśleny płan prac pa likvidacyi nastupstvaŭ zdareńnia ŭ Čyrvonym kaściole i pa praviadzieńni maštabnaha ramontu, kab praduchilić padobnyja zdareńni ŭ budučym. Pavodle Alaksandra Kochana, pakolki pracy praduhledžany va ŭsioj śviatyni, znachodžańnie ŭ joj niemahčymaje.
Upaŭnavažany Rumak padkreśliŭ, što «heta — kaścioł i im zastaniecca, tolki ciapier my pavinny kanstruktyŭna spracavacca, kab pravieści ramont».
Arcybiskup Stanieŭski vykazaŭ zakłapočanaść nie tolki tym, jak budzie vyhladać pieraniasieńnie ruchomych rečaŭ, ale i toje, dzie jany buduć zachoŭvacca. Ijerarch taksama źviarnuŭsia da kampietentnych uładaŭ z prośbaj ab vydzialeńni pamiaškańnia ŭ miežach parafii, dzie časova možna b było ździajsianiać nabaženstvy i arhanizavać parafijalnaje žyćcio.
Była vykazana prośba ab uklučeńni kaściolnaha pradstaŭnika ŭ skład kamisii dla daśledvańnia paškodžaniaŭ, jakija ŭźnikli ŭ vyniku ŭzharańnia i dla praviadzieńnia ramontnych prac.
Była ŭniesiena prapanova dla stvareńnia na vysokim uzroŭni dvuchbakovaj rady dla vyrašeńnia i abmierkavańnia pytańniaŭ, źviazanych z ramontam i rekanstrukcyjaj.
Nahadajem, jašče 5 kastryčnika kiraŭnik «Minskaj spadčyny» Alaksandr Kochan nakiravaŭ list «Ab ekspłuatacyi budynka» probašču Čyrvonaha kaścioła ks. Uładzisłavu Zavalniuku. Pakolki budynak kaścioła vyviedzieny z ekspłuatacyi, padobnyja ž kroki zroblenyja i ŭ dačynieńni da plabanii.
U kancy vieraśnia ŭłady skasavali damovu karystańnia Čyrvonym Kaściołam z supolnaściu «Rymska-katalickaja parafija śviatoha Symona i śviatoj Aleny». Adpaviednaje apaviaščeńnie atrymali kaścielnyja ŭłady. Da 12 kastryčnika vierniki pavinny byli pakinuć budynak.
Čytajcie taksama:
Biskup Kasabucki ksiandzu Zavalniuku: Na zdymkach padajecca, što vy adzin. Ale vy nie adzin
Viernikam na čale z ksiandzom Uładzisłavam Zavalniukom siłaviki zaminali malicca na prystupkach začynienaha Čyrvonaha kaścioła
papa ŭ pałajučuju Ukrainu nie zmoh pryjechać, žalačysia na chvoryja kaleni...
ale ž ništo nie pieraškodziła jamu prylacieć potym u Kazachstan...