U Varšavie źbili viadomaha biełaruskaha błohiera i jaho dziaŭčynu. Što zdaryłasia?
Biełaruski błohier Marcin Kram, jaki ŭžo kala 5 hadoŭ žyvie ŭ Polščy, apublikavaŭ videa, dzie raspaviadaje, jak u subotu 13 žniŭnia jaho razam ź dziaŭčynaj pabili pjanyja ŭ Varšavie.
Marcin Kram. Fota: skrynšot ź videa
Voś jak vyhladaŭ kanflikt. Pa słovach chłopca, jany ź dziaŭčynaj byli na tancplacoŭcy i niezrazumieła, z čaho ŭsio pačałosia. Pieršaj, kaho ŭdaryli, była dziaŭčyna Kacia. Jaje niechta ŭdaryŭ pa hałavie zzadu — nie jasna, vypadkova ci naŭmysna. Biełarusy pajšli vyśvietlać, chto heta byŭ. Kali jany pabačyli taho nieznajomaha mužčynu, stali razmaŭlać ź im. Błohier zhadvaje, što ŭ peŭny momant toj pramoviŭ pa-polsku «śpierdalajcie z Polski» — «valicie z Polščy».
Jany pajšli za tym mužčynam, kab toj nie źbieh, zdymali jaho na videa. Kali ŭ kadr trapiŭ inšy ŭdzielnik kampanii, jon pabieh u bok biełarusaŭ i staŭ chapać i bić błohiera, jak raskazvaje Marcin.
Častku kanfliktu vidavočcy zapisali na videa. Ciapier błohier šukaje śviedak incydentu. Jak vidać z uryŭkaŭ videa, napadniki byli mocna pjanyja.
Kram raspaviadaje, što zvaniŭ u palicyju, ale jamu było składana patłumačyć, dzie jany znachodziacca, pakolki heta adbyvałasia nie pa kankretnym adrasie, a pobač z tancplacoŭkaj adnoj z ustanoŭ na bierazie Visły. Paźniej z dapamohaj haradskoj achovy im udałosia zatrymać adnaho z napadnikaŭ. Paśla pryjezdu palicejskija zapisali ŭsie danyja i mužčynu vyzvalili, pakolki palicyjanty paviedamili, što heta, chutčej za ŭsio, budzie hramadzianska-pravavaja sprava. Pryjści napisać zajavu Marcinu prapanavali na nastupny dzień, pakolki sam chłopiec i jaho dziaŭčyna taksama ŭžyvali ałkahol.
Poŭny raskaz Marcina pra toje, jak raźvivaŭsia kanflikt i što było dalej, možna pahladzieć na jaho jutub-kanale.
Chto taki Marcin Kram?
Marcin — były biełaruski milicyjanier z Hrodna, kala piaci hadoŭ tamu syšoŭ ź milicyi i źjechaŭ u Polšču, dzie, pracujučy achoŭnikam, paralelna zapisvaŭ humarystyčnyja videa dla Instagram. Šyrokuju papularnaść chłopiec nabyŭ u 2020 hodzie, kali pačaŭ rabić roliki na palityčnuju tematyku. Marcin zdymajecca ŭ videa dla svaich kanałaŭ u Instagram i Youtube, u prahramie «Viečarovy špil» na kanale «Biełsat».
