«Adsiače tych, chto pieraśleduje kamiercyjnyja mety na škodu dziaržavie». Pryvatnyja škoły i sadki buduć prachodzić dziaržakredytacyju
Kamiercyjnyja ŭstanovy adukacyi buduć prachodzić dziaržakredytacyju, i ŭ płanach — praces licenzavańnia. Pra heta zajaviŭ u intervju sb.by ministr adukacyi Andrej Ivaniec.
Andrej Ivaniec
Pavodle ministra, ź vieraśnia 2022-ha ŭsie ŭstanovy adukacyi, uklučajučy pryvatnyja, buduć abaviazanyja prachodzić dziaržaŭnuju akredytacyju ŭžo na pieršym hodzie stvareńnia (abo źmieny vidu dziejnaści), nie čakajučy pieršaha vypusku.
Andrej Ivaniec padkreśliŭ, što baćki, addajučy dziaciej u takija ŭstanovy, pavinny sačyć, ci vykonvajecca navučalny płan, jakaja kvalifikacyja nastaŭnikaŭ, ci arhanizavanaje charčavańnie, akazańnie miedycynskaj dapamohi. «Baćkam, kab być upeŭnienymi ŭ svaich układańniach, varta pierakanacca ŭ najaŭnaści akredytacyi, vyvučyć ustanoŭčyja dakumienty, pahladzieć umovy», — miarkuje ministr.
Taksama rychtujecca prajekt zakona «Ab licenzavańni», jaki, na dumku čynoŭnika, adsiače tych, chto praśleduje vyklučna kamiercyjnyja mety «na škodu dziaržavie i asoby».
«U praces licenzavańnia buduć ŭciahnutyja ŭsie pryvatnyja ŭstanovy adukacyi — dziciačyja sadki, škoły, himnazii, daškolnyja centry raźvićcia dziciaci…
Heta dazvolić kantralavać vykanańnie standartaŭ adukacyjnaj dziejnaści, vykanańnie sanitarnych normaŭ i pravił, pravieryć hatoŭnaść u častcy materyjalna-techničnaha, kadravaha, vučebna-mietadyčnaha zabieśpiačeńnia», — zaznačyŭ ministr.
Praduhledžvajecca prypynieńnie ci navat spynieńnie licenzii, kali ŭstanova nie projdzie dziaržaŭnuju akredytacyju. Takim čynam, buduć uzajemaźviazanyja dźvie asnoŭnyja pracedury: licenzavańnie (daje prava na ažyćciaŭleńnie dziejnaści) i dziaržakredytacyja (dazvalaje vydaču vypusknikam dakumientaŭ ab adukacyi).
Prajekt płanujuć razhledzieć u druhim čytańni na vosieńskaj siesii, i paśla ŭstupleńnia zakona ŭ siłu ŭžo nie atrymajecca pa zajaŭnym pryncypie ažyćciaŭlać adukacyjnuju dziejnaść.
U adzinym dziaržrehistratary jurydyčnych asob i indyvidualnych pradprymalnikaŭ amal paŭsotni takich arhanizacyj: 35 arhanizujuć ahulnuju siaredniuju adukacyju, 14 — daškolnuju adukacyju. Dziaržakredytacyju, jakaja daje prava vydavać vypusknikam dakumienty ab adukacyi (paśviedčańni, atestaty), prajšli tolki 13 ustanoŭ.
Na dumku Ivanca, akredytacyja i licenzavańnie «buduć faktaram dyscyplinavańnia».