Pucin: My pakul jašče surjozna ničoha nie pačynali
Uładzimir Pucin 7 lipienia padčas sustrečy z kiraŭnictvam Dziarždumy RF i kiraŭnikami frakcyj zajaviŭ, što Rasija va Ukrainie «surjozna jašče ničoha nie pačynała». Ad hetaj sustrečy, jak i ad inšych padobnych sustreč Pucina, čakali mahčymych prahramnych zajaŭ, čahości novaha, ale ŭsio ŭ vyniku źviałosia da rableńnia dobraj miny pry nie vielmi dobraj hulni i čarhovaha ahučvańnia ŭžo šmat razoŭ skazanych pierad hetym prapahandysckich tezisaŭ.
«Siońnia my čujem, što nas chočuć pieramahčy na poli boju. Što tut skažaš, chaj pasprabujuć. My ŭžo šmat razoŭ čuli, što Zachad choča vajavać z nami da apošniaha ŭkrainca. Heta trahiedyja dla ŭkrainskaha naroda, ale, padobna, usio da hetaha idzie. …
Usie pavinny viedać, što my pa vialikim rachunku surjozna pakul jašče ničoha nie pačynali. Pry hetym my nie admaŭlajemsia i ad mirnych pieramovaŭ. Ale tyja, chto admaŭlajucca, pavinny viedać, što čym dalej, tym składaniej im budzie z nami damaŭlacca», — skazaŭ rasijski prezident.
Adkaznaść za raźviazvańnie ŭzbrojenaha supraćstajańnia Pucin užo zvykła ŭskłaŭ na lidaraŭ zachodnich krain. Pa jahonych słovach, mienavita jany pačali hety kanflikt, padtrymaŭšy «dziaržpieravarot va Ukrainie ŭ 2014 hodzie».
Pry hetym Pucin nie vyklučyŭ, što padtrymka Ukrainy zachodnimi palitykami była tolki nahodaj. A na samaj ža spravie, maŭlaŭ, meta była inšaj: raźviazać kanflikt mienavita z Maskvoj, kab «pierajści da novaha etapu baraćby z Rasijaj», — i heta ŭdałosia.
Jon taksama zajaviŭ, što «Zachad užo prajhraŭ hetuju bitvu, pakolki pačatak śpiecapieracyi va Ukrainie staŭ pačatkam razhromu śvietaparadku, zasnavanaha na praviłach ZŠA, i pierachodu da šmatpalarnaha śvietu».
