Tema doma i nočy paezii: zaŭtra startuje fiestyval knihi «Pradmova»
Fiestyval intelektualnaj knihi PRADMOVA pačynajecca 4 červienia i praciahniecca da 26 červienia. Sioleta jon projdzie ŭ Tbilisi, Krakavie, Varšavie i Vilni, a taksama anłajn.
U hetym hodzie vakoł fiestyvalu šmat sprečak i skandałaŭ nakont prahramy i vybaru ŭdzielnikaŭ, ale niahledziačy na heta, kamanda vyrašyła pravieści jaho, paviedamlajuć arhanizatary. Jany padrychtavali dla naviedvalnikaŭ i hledačoŭ bahatuju prahramu i zaprašajuć dałučycca da padziei. Uvachod na ŭsie mierapryjemstvy volny.
Tema
Temaj sioletniaha fiestyvalu PRADMOVA stała paniaćcie doma — takoje važnaje, bazavaje paniaćcie ŭ žyćci kožnaha čałavieka i takoje balučaje dla šmatlikich biełarusaŭ siońnia. U miežach mierapryjemstvaŭ arhanizatary zaklikajuć naviedvalnikaŭ «akunucca hłybiej u asensavańnie doma ŭ jaho šyrokim razumieńni».
Fiestyval projdzie pad słohanam «Doŭhaja daroha dadomu».
Udzielniki
Jak paviedamlajuć arhanizatary, prahrama abrała najbolš znanych aŭtaraŭ i jaskravych dziejačaŭ kultury Biełarusi i zamiežža. Svaje knihi na fiestyvali prezientujuć Alhierd Bacharevič, Volha Bubič, Źmicier Łukašuk, Uładzimir Niaklajeŭ, Natalla Stankievič, Alaksandr Chackievič, Jula Cimafiejeva, Alaksandr Čarnucha.
Voźmuć udzieł u imprezach taksama i miascovyja vydaŭcy i litaratary. Pra vydavieckuju dziejnaść u Hruzii raspaviadzie vydaviec Mamuka Chantadze, u Krakavie adbudziecca «Noč paezii» z čytańniem vieršaŭ biełaruskimi i polskimi paetami, u Varšavie naviedvalnikaŭ čakaje razmova pra revalucyi, vojny i inšyja ŭroki 20-21 st. z žurnalistam i hałoŭnym redaktaram «Gazeta Wyborcza» Adamam Michnikam, u Vilni možna budzie parazvažać pra kryzis uschodniejeŭrapiejskaj identyčnaści z palitołaham, prafiesaram fiłasofii Hintaŭtasam Mažejkisam.
Siarod biełaruskich udzielnikaŭ hetaha hoda — Andrej Adamovič, Valancin Akudovič, Siarhiej Bašłykievič, Sabina Bryło, Alaksandr Ždanovič, Sieviaryn Kviatkoŭski, Valžyna Mort, Dźmitryj Strocaŭ, Vika Trenas, Saša Filipienka, Andrej Chadanovič i šmat inšych.
Prahrama
Prahrama PRADMOVA uklučyła ŭ siabie mierapryjemstvy roznych farmataŭ: ad dyskusij i prezientacyj knih da litaraturnych premij i muzyčnych vystupaŭ. Kožny dzień padčas fiestyvalu na placoŭkach buduć pracavać knižnyja kirmašy.
Značnaja častka prahramy pryśviečanaja mierapryjemstvam na hałoŭnuju temu fiestyvalu — dom. Arhanizatary zaprašajuć naviedvalnikaŭ na dyskusii pra emihracyju i kryzisy ŭschodniejeŭrapiejskaj identyčnaści.
Na PRADMOVA zapłanavanyja imprezy nie tolki dla darosłych, ale i dla dziaciej i padletkaŭ. U Tbilisi na praciahu ŭsiaho fiestyvalu budzie pracavać placoŭka ad «Buślik-chaba». Dziciačyja mierapryjemstvy adbuducca taksama i na placoŭkach u Krakavie i Varšavie.
Placoŭki
Fiestyval projdzie z 4 pa 26 červienia na placoŭkach u Tbilisi, Krakavie, Varšavie i Vilni.
U kožnym horadzie, akramia Krakava, fiestyval budzie doŭžycca dva dni: 4-5 červienia Tbilisi (Instytut Hiote, Mikheil Zandukeli St. 16), 12 červienia Krakaŭ (Viła Decyjusa, ul. 28 Lipca 1943 roku 17A ), 18-19 červienia Varšava (Biełaruski moładzievy chab, plac Konstytucji 6), 25-26 červienia Vilnia (Imaguru, Vytenio g. 18).
Taksama z 4 pa 26 červienia adbudziecca anłajn-PRADMOVA — sieryja anłajn-sustreč i prezientacyj u miežach fiestyvalu.
Uvachod na ŭsie mierapryjemstvy prahramy fiestyvalu volny, na anłajn-imprezy patrabujecca rehistracyja.
Padrabiaznaja prahrama fiestyvalu sa spasyłkami na rehistracyju na anłajn-prahramu pa spasyłcy.
Sačyć za fiestyvalem mahčyma na staronkach Facebook PRADMOVA i Instagram PRADMOVA.
Čytajcie taksama:
«Čamu biełarusy pavinny ciaśnicca?» Fiestyval PRADMOVA paklikaŭ vystupić rasijskaha kinakrytyka — i sutyknuŭsia z krytykaj
Žbankoŭ ab Dolinie i «Pradmovie»: Mianie złuje, što rasiejskija stravy padajuć z asablivym «vostorhom»
Andrej Dyńko: Para dumak z nahody maleńkaj pieramožnaj vajny z Dolinym i Šandarovičam
Anton Dolin admoviŭsia ad udziełu ŭ fiestyvali «Pradmova»
