Z-za sankcyj ekspart kalijnych uhnajeńniaŭ ź Biełarusi i Rasii ŭpaŭ na 20%
Pastaŭki kaliju ź Biełarusi i Rasii na zamiežnyja rynki ŭ pieršym kvartale hetaha hoda ŭpali na 20 pracentaŭ u paraŭnańni z tym ža pieryjadam minułaha hoda. Takija acenki pryvodzić kanadskaja kampanija pa vytvorčaści ŭhnajeńniaŭ Nutrien u kvartalnaj spravazdačy, zviarnuła ŭvahu «Zierkało».
«Biełaruśkalij». Skład hatovaj pradukcyi. Fota: kali.by
Finansavyja sankcyi i inšyja abmiežavańni, uviedzienyja ŭ dačynieńni da Biełarusi i Rasii, pryviali da źnižeńnia ekspartu kalijnych uhnajeńniaŭ z hetaha rehijona na 20 pracentaŭ u paraŭnańni z tym ža pieryjadam minułaha hoda. U zvyčajny čas vytvorčaść i pastaŭki ŭhnajeńniaŭ z hetych dźviuch krain składajuć 40% ad suśvietnaha rynku, havorycca ŭ kvartalnaj spravazdačy kampanii Nutrien.
Źnižeńnie doli kalijnych kampanij ź Biełarusi i Rasii na suśvietnym rynku dazvoliła Nutrien u razy pavialičyć vyručku i prybytak.
U Biełarusi statystyku pa eksparcie kaliju zakryli letaś paśla taho, jak halina patrapiła pad zachodnija sankcyi. U minułym hodzie ES uvioŭ zabaronu na pastaŭki i tranzit častki pradukcyi «Biełaruśkalija», ZŠA ŭviali sankcyi suprać samoj kampanii i BKK — aficyjnaha eksparciora pradukcyi. Da abmiežavalnych mier dałučylisia Kanada, Vialikabrytanija.
Na pačatku hetaha hoda Litoŭskaja čyhunka spyniła transparciroŭku kalijnych uhnajeńniaŭ ź Biełarusi dla pastavak u trecija krainy. Paźniej spyniłasia ich transparciroŭka da ŭkrainskich marskich partoŭ.
Siońnia stała viadoma, što ŭ šosty pakiet sankcyj ES mohuć patrapić «Biełaruśkalij» i jaho ekspartnaja kampanija BKK.