Za «Žyvie Biełaruś!» bieraściejcu dali try miesiacy aryštu
27 krasavika ŭ sudzie Maskoŭskaha rajona Bresta razhledzieli spravu Paŭła Falkoŭskaha, jakoha abvinavačvajuć u ździajśnieńni złačynstva pa artykule 341 «Apahańvańnie zbudavańniaŭ i psavańnie majomaści». Sudovaje pasiadžeńnie ŭznačaliła Maryja Alifieruk, piša Viasna.
Viadoma, što pad aryštam abvinavačany znachodzicca z 22 lutaha 2022 hoda — tym ža dniom jaho i zatrymali. Napiaredadni, unačy z 21 na 22 lutaha, pry dapamozie bałončyka z farbami Pavieł pakinuŭ na ścienach haradskich zbudavańniaŭ niekalki nadpisaŭ.
Na adnym z aŭtobusnych prypynkaŭ napisaŭ «Žyvie Biełaruś», na ścianie apornaha punkta milicyi ŭ mikrarajonie «Kavalova» — abrevijaturu «ACAB».
Zvyčajna hetuju abrevijaturu ŭ jakaści łozunhu vykarystoŭvajuć zachodnija dysidenty, jakija vystupajuć suprać palicyi. Na bałkonie i fasadzie jašče adnaho budynka abvinavačany napisaŭ niecenzurnuju frazu. Jakuju dakładna — na sudzie nie ŭdakładniałasia.
Paśla ździajśnieńnia złačynstva Paŭła znajšli i aryštavali praź niekalki hadzin. Da suda abvinavačanaha ŭtrymlivali ŭ Bresckim SIZA.
Viadoma, što na sudovym pasiadžeńni mužčyna całkam pryznaŭ svaju vinu.
27 krasavika sud Maskoŭskaha rajona Bresta chutka razhladzieŭ spravu Paŭła Falkoŭskaha i pryznaŭ jaho vinavatym u ździajśnieńni złačynstva pa artykule 341 «Apahańvańnie zbudavańniaŭ i psavańnie majomaści», prysudziŭšy abvinavačanamu try miesiacy aryštu.