Rada biaśpieki zajaviła ab paśpiachovaj baraćbie z teraryzmam
Supracoŭniki Rady biaśpieki padrychtavali artykuł, u jakim analizujuć terarystyčnuju pahrozu ŭ Biełarusi. Admietna, što pa bolšaści spravaŭ, jakija siłaviki nazyvajuć paśpiachovymi, fihuranty jašče nie asudžanyja, ale ŭ Radzie biaśpieki ich užo nazyvajuć złačyncami, a dziejnaść biełaruskich i rasijskich pravaachoŭnikaŭ — biesprecedentnaj. Admietna, što da 2020 hoda nijakaha ŭsplosku teraryzmu ŭnutry Biełarusi nie było, ryzyki fiksavali z-za miažy.
Pavodle Rady biaśpieki, asnoŭnymi ŭnutranymi krynicami terarystyčnaj pahrozy źjaŭlajucca:
- atrymańnie asobnymi hramadzianami Biełarusi vopytu bajavych dziejańniaŭ na terytoryjach z pavyšanaj terarystyčnaj aktyŭnaściu ŭ zonach łakalnych kanfliktaŭ;
- stvareńnie mižnarodnymi terarystyčnymi arhanizacyjami «śpiačych» jačejek na terytoryi Biełarusi;
- uźniknieńnie pad upłyvam kryminalnych subkulturnych struktur, da jakich siłaviki adnosiać anarchistaŭ i fanackija ruchi, radykalnych hrup, što raspaŭsiudžvajuć ekstremisckuju ideałohiju i zakliki da hvałtoŭnych dziejańniaŭ;
- ździajśnieńnie złačynstvaŭ terarystami-adzinočkami, u tym liku ludźmi z asablivaściami psichiki.
Z 2014 hoda Biełaruś nakiravała ŭ zamiežnyja śpiecsłužby bolš za tysiaču zapytaŭ ab patencyjnych terarystach. Razam z zamiežnymi kalehami pravieryli bolš za dźvie tysiačy čałaviek, jakich padazravali ŭ takoj złačynnaj dziejnaści.
Biełaruskija siłaviki z 2014 pa 2020 hod vyjavili na miažy 109 bajevikoŭ i pasobnikaŭ terarystyčnych arhanizacyj, 28 ź ich znachodziliisia ŭ vyšuku. U 2021 hodzie vyjavili bolš za 20 čałaviek, dvoje ź ich byli ŭ miždziaržaŭnym vyšuku.
U 2020-m usio rezka mianiajecca. Jak adznačajuć u Radzie biaśpieki, «u suviazi z aktyŭnym zamiežnym umiašalnictvam va ŭnutranyja spravy biełaruskaj dziaržavy i sproby radykalizacyi taktyki prychilnikaŭ pieramien», byli vyjaŭlenyja i praduchilenyja ekstremisckija i terarystyčnyja pahrozy. Heta źjaŭlajecca pryjarytetnym kirunkam dziejnaści siłavikoŭ, padkreślivajuć supracoŭniki Rady biaśpieki.
Mikałaj Aŭtuchovič
Da paśpiachovych apieracyj siłaviki adnosiać zatrymańnie Mikałaja Aŭtuchoviča, Ihara Alinieviča i źviazanych ź imi ludziej.
«Jany rychtavali vybuchi i padpały, jakija mieli ŭsie šancy skončycca kryvioj i šmatlikimi achviarami, — raskazvajuć u Radzie biaśpieki. — Padčas rasśledavańnia znojdzienyja miescy zachoŭvańnia płastytu, vybuchovych prystasavańniaŭ, śpiecyjalnaj zbroi, pryznačanaj dla raźviedvalna-dyviersijnaj dziejnaści, dystancyjnyja srodki pa padryvu roznych abjektaŭ.
Ustanoŭlenyja pradstaŭniki «śpiačych» terarystyčnych jačejek byli źviazanyja z krainami Zachadu i Ukrainaj. Zatrymanyja prajšli surjoznuju padrychtoŭku, udzielničali ŭ roznych mierapryjemstvach na terytoryi dziaržaŭ, dzie prachodzili ŭzbrojenyja kanflikty».
Fihuranty spravy anarchistaŭ u sudzie
Nahadajem, što sud pa spravie Ihara Alinieviča prachodziŭ u zakrytym režymie, fihuranty atrymali ad 18 da 20 hod źniavoleńnia, pakul heta maksimalny termin pa spravach, źviazanych z palityčnaj pazicyjaj. Svajaki asudžanych zajavili, što tych pry zatrymańni katavali.
Suda pa spravie Mikałaja Aŭtuchoviča jašče nie było, jaho pieraviali ź Minska ŭ SIZA hrodzienskaj turmy. Nahadajem, što pa zakonie vynosić abvinavaŭčy prysud moža tolki sud, adnak Rada biaśpieki ihnaruje hety pryncyp.
Viačasłaŭ Malejčuk na videa paśla zatrymańnia
Jašče adna «paśpiachovaja apieracyja», pavodle Rady biaśpieki, — zatrymańnie Viačasłava Malejčuka. Pa viersii siłavikoŭ, jon rychtavaŭ dva vybuchi — u Minsku i ŭ Piečach pad Barysavam. Rodam Viačasłaŭ ź Pinska, u stalicu pryjechaŭ na zarobki. Svajaki i siabry kažuć, što jon nie cikaviŭsia piratechnikaj.
Na videa paśla zatrymańnia Malejčuk kaža, što pajšoŭ na złačynstva, kab vyklikać davier abjadnańnia byłych siłavikoŭ i zaručycca ich padtrymkaj. Nivodnaje proźvišča jon nie nazyvaje. Kaža, što nie viedaŭ, jak rabić vybuchovyja rečyvy, maŭlaŭ, heta zrabiŭ jaho znajomy pa adnym z telehram-čataŭ.
Taksama Malejčuk ukazvaje, što byŭ nie adzin, a razam ź Jaŭhienam. Pra zatrymańnie hetaha čałavieka milicyja nie paviedamlała. Havorka idzie pra Jaŭhiena Prachareviča. Jon byŭ asudžany za machlarstva ŭ asabliva bujnym pamiery, na svabodu pavinien byŭ vyjści tolki ŭ žniŭni 2022 hoda, adnak pryciahnuŭ uvahu apieratyŭnikaŭ. Sprava ŭ tym, što Pracharevič pryniaŭ isłam. Takija ludzi — na kantroli HUBAZiK, jaki praviaraje ich datyčnaść da radykalnych isłamisckich hrupovak.
Pracharevič adbyvaŭ pakarańnie ŭ Ivacevickaj kałonii. Byłyja siłaviki śćviardžajuć, što apieratyŭniki prapanavali jamu supracoŭnictva — za heta pakarańnie zamianili na bolš miakkaje — «chatniuju chimiju», i jon vyjšaŭ na svabodu. Heta davoli raspaŭsiudžanaja praktyka, u siłavikoŭ chapaje «ahientaŭ» ź liku jak byłych asudžanych, tak i tych, chto ŭ ciapierašni čas adbyvaje pakarańnie ci znachodzicca pad śledstvam.
Jak Pracharevič paznajomiŭsia z Malejčukom? Apošni taksama adbyvaŭ pakarańnie ŭ Ivacevickaj kałonii, siadzieŭ za kradziež. Voś tam, za kratami, i zaviazałasia siabroŭstva. Rodnyja ŭ razmovie z žurnalistami paćviardžali hetaje siabroŭstva.
U rasśledavańni byłych siłavikoŭ jość aŭdyjazapis, na jakim supracoŭniki milicyi abmiarkoŭvajuć, jak vyciahnuć Prachareviča ŭ Minsk z Barysava, dzie toj musić znachodzicca pad nahladam na «chimii». Heta kaža pra toje, što asudžany dziejničaŭ nie samastojna. Pry hetym MUS nie paviedamlała ab zatrymańni saŭdzielnikaŭ Malejčuka, jaki padkreślivaŭ, što dziejničaŭ nie adzin.
Byłyja siłaviki miarkujuć, što pinčuk staŭ achviaraj pravakacyi. Ułady ž nazyvajuć jaho ŭdzielnikam padrychtoŭki akta teraryzmu, źviazvajuć jaho ź dziejnaściu eks-pravaachoŭnikaŭ, jakija paśla vybaraŭ pakinuli słužbu i krytykujuć pradstaŭnikoŭ ułady.
«Pad uździejańniem zaklikaŭ šerahu destruktyŭnych telehram-kanałaŭ ustupiŭ u kantakt z adnym z členaŭ zamiežnaha fondu pa padtrymcy prychilnikaŭ pieramien i pa ŭkazańni apošniaha vyrabiŭ vybuchovyja prystasavańni dla ažyćciaŭleńnia vybuchaŭ u znak pratestu i demanstracyi svajoj hramadzianskaj pazicyi», — rapartuje Rada biaśpieki pra dziejanńni Malejčuka.
Juraś Ziankovič, Alaksandr Fiaduta i Ryhor Kastusioŭ
Ale bolš za ŭsio siłaviki hanaracca «biesprecedentnaj apieracyjaj» biełaruskaha KDB i rasijskaj FSB pa zatrymańni hrupy asobaŭ, jakija, pa mierkavańni Rady biaśpieki, rychtavali vajskovy pieravarot i likvidacyju Łukašenki. Havorka idzie pra apazicyjanieraŭ Alaksandra Fiadutu, Ryhora Kastusiova, Jurasia Ziankoviča, sudovy praces pa ich spravie taksama jašče nie pačaŭsia, bolš za vosiem miesiacaŭ jany znachodziacca pad vartaj.
Źmieny ŭ zakanadaŭstvie, jakija pravaabaroncy nazyvajuć represiŭnymi, Rada biaśpieki nazyvaje adkazam na niebiaśpieku ŭnutry krainy. Havorka i pra ŭzmacnieńnie adkaznaści i samyja šyrokija traktoŭki pa ekstremiźmie, teraryźmie, abaronie nacyjanalnaj biaśpieki. Siłaviki ličać, što takim čynam abaraniajuć nie tolki Biełaruś, ale i vykonvajuć svaje mižnarodnyja abaviazalnictvy. Pry hetym adznačajuć, što vysiłkaŭ tolki biełaruskich śpiecsłužb niedaststkova. Paśla vybaraŭ 2020 hoda siłavikam składaniej atrymlivać infarmacyju i supracoŭničać z zamiežnymi kalehami, asabliva z zachodnimi.
«Vy chacieli, kab tam adny durni pracavali?» Jak biełaruskija siłaviki sprabujuć padmanuć Interpał
«Telegram zabłakavać vielmi prablematyčna». Śledčy raskazaŭ, što ŭskładniaje baraćbu z kibierzłačynstvami ŭ Biełarusi
Za hod kolkaść zapytaŭ Hienprakuratury ab mižnarodnaj pravavoj dapamozie vyrasła amal u dva razy
