Byłyja siłaviki zajavili, što znajšli ahienta, jaki ŭdzielničaŭ u padrychtoŭcy «terakta» da 25 sakavika
Abjadnańnie byłych siłavikoŭ apublikavała rasśledavańnie pra sprobu arhanizavać terakt u Biełarusi sioleta na Dzień voli. 24 sakavika inicyjatyva paviedamiła, što ŭłady rychtujuć pravakacyju — vybuch na terytoryi adnaho z učastkaŭ milicyi. Aŭtary spasyłalisia na ŭłasnyja krynicy, nijakaha vybuchu ŭ vyniku nie było. 26 sakavika ŭłady zajavili, što praduchilili arhanizacyju niekalkich teraktaŭ — vybuchi kala doma ŭ Čyžoŭcy ŭ Minsku i kala vajskovaj častki ŭ Barysavie.
Tady zatrymali adnaho čałavieka, Viačasłava Malejčuka. Spravu za padrychtoŭku akta teraryzmu zaviali taksama na ŭdzielnikaŭ abjadnańnia byłych siłavikoŭ i lidaraŭ demakratyčnych siłaŭ Śviatłanu Cichanoŭskuju i Paŭła Łatušku.
Na videa dopytaŭ Malejčuk raskazvaje, što dziejničaŭ nie adzin, sa znajomym Jaŭhienam. Eks-siłaviki raskazali, što heta za čałaviek.
Viačasłaŭ Malejčuk adrazu paśla zatrymańnia
Što viadoma pra Viačasłava Malejčuka? Pa viersii siłavikoŭ, jon rychtavaŭ dva vybuchi — u Minsku i ŭ Piečach pad Barysavam. Rodam Viačasłaŭ ź Pinska, u stalicu pryjechaŭ na zarobki. Svajaki i siabry kažuć, što jon nie cikaviŭsia piratechnikaj.
Na videa paśla zatrymańnia Malejčuk kaža, što pajšoŭ na złačynstva, kab vyklikać davier abjadnańnia byłych siłavikoŭ i zaručycca ich padtrymkaj. Nivodnaje proźvišča jon nie nazyvaje. Kaža, što nie viedaŭ, jak rabić vybuchovyja rečyvy, maŭlaŭ, heta zrabiŭ jaho znajomy pa adnym z telehram-čataŭ.
Taksama Malejčuk ukazvaje, što byŭ nie adzin, a razam ź Jaŭhienam. Pra zatrymańnie hetaha čałavieka milicyja nie paviedamlała.
Pavodle abjadnańnia byłych siłavikoŭ, havorka idzie pra Jaŭhiena Prachareviča. Jon byŭ asudžany za machlarstva ŭ asabliva bujnym pamiery, na svabodu pavinien byŭ vyjści tolki ŭ žniŭni 2022 hoda. Adnak pryciahnuŭ uvahu apieratyŭnikaŭ.
Jaŭhien Pracharevič. Fota: sacyjalnyja sietki
Sprava ŭ tym, što Pracharevič pryniaŭ isłam. Takija ludzi — na kantroli HUBAZiK, jaki praviaraje ich datyčnaść da radykalnych isłamisckich hrupovak.
Pracharevič adbyvaŭ pakarańnie ŭ Ivacevickaj kałonii. Byłyja siłaviki śćviardžajuć, što apieratyŭniki prapanavali jamu supracoŭnictva — za heta pakarańnie zamianili na bolš miakkaje — «chatniuju chimiju», i jon vyjšaŭ na svabodu. Heta davoli raspaŭsiudžanaja praktyka, u siłavikoŭ chapaje «ahientaŭ» ź liku jak byłych asudžanych, tak i tych, chto ŭ ciapierašni čas adbyvaje pakarańnie ci znachodzicca pad śledstvam.
Jak Pracharevič paznajomiŭsia z Malejčukom? Apošni taksama adbyvaŭ pakarańnie ŭ Ivacevickaj kałonii, siadzieŭ za kradziež. Voś tam, za kratami, i zaviazałasia siabroŭstva. Rodnyja ŭ razmovie z žurnalistami paćviardžali hetaje siabroŭstva.
U rasśledavańni byłych siłavikoŭ jość aŭdyjazapis, na jakim supracoŭniki milicyi abmiarkoŭvajuć, jak vyciahnuć Prachareviča ŭ Minsk z Barysava, dzie toj musić znachodzicca pad nahladam na «chimii». Heta kaža pra toje, što asudžany dziejničaŭ nie samastojna. Pry hetym MUS nie paviedamlała ab zatrymańni saŭdzielnikaŭ Malejčuka, jaki padkreślivaŭ, što dziejničaŭ nie adzin.
Byłyja siłaviki miarkujuć, što pinčuk staŭ achviaraj pravakacyi. Ułady ž nazyvajuć jaho ŭdzielnikam padrychtoŭki akta teraryzmu, źviazvajuć jaho ź dziejnaściu eks-pravaachoŭnikaŭ, jakija paśla vybaraŭ pakinuli słužbu i krytykujuć pradstaŭnikoŭ ułady.
U liście rodnym Malejčuk pisaŭ, što ŭsio adno ličyć Jaŭhiena bratam, kaža, što ŭ minułym toj jamu vielmi dapamoh, «tady byli śvietłyja časy».
