U Dobrušy sudziać repiera za pieśniu z abrazaj Łukašenki
U Dobrušy 6 vieraśnia pačaŭsia sud nad 22-hadovym muzykantam Jaŭhienam Piatrovym, jaki abvinavačvajecca ŭ abrazie Alaksandra Łukašenki (art. 368), paviedamlaje «Homielskaja viasna».
U pieśni «Łukašenka, sychodź», na dumku abvinavačvańnia, utrymlivajecca radok z abrazaj Alaksandra Łukašenki. Praces zrabili zakrytym.
Jaŭhiena Piatrova zatrymali 4 červienia. Supracoŭniki HUBAZiK, kab znajści maładziona, jaki nie žyŭ pa miescy rehistracyi ŭ Dobrušy, stvaryli fejkavy akaŭnt. Ad imia dziaŭčyny napisali jamu ŭ asabistyja paviedamleńni i paprasili napisać pieśniu (maładzion padpracoŭvaŭ stvareńniem muzyčnych trekaŭ).
Na sustreču zamiest dziaŭčyny-klijentki pryjšli śledčyja. Chłopca dapytali i źmiaścili ŭ izalatar časovaha ŭtrymańnia na 72 hadziny, paśla jakich vystavili abvinavačańnie i adpuścili pad padpisku ab niavyjaździe.
Jaŭhien viny nie pryznaje. Jon ličyć, što ŭ pieśni, jakuju jon napisaŭ letaś padčas vybarčaj kampanii, nie było abrazy, bo paśla abraźlivaha słova stajaŭ pytalnik.
Ale ekśpierty, jakija pravodzili linhvistyčnuju ekśpiertyzu tekstu pieśni, pryjšli da vysnovy, što ŭ tekście ŭsio ž taki jość abraza.
«Mianie vielmi ŭschvalavała toje, što adbyvałasia ŭ Biełarusi padčas vybarčaj kampanii, — patłumačyŭ chłopiec. — Nierehistracyja kandydataŭ u prezidenty, zatrymańni aktyvistaŭ, palitykaŭ, błohieraŭ (Siarhieja Cichanoŭskaha). Brutalnyja dziejańni siłavikoŭ u dačynieńni da pratestoŭcaŭ. Usio heta padšturchnuła mianie da stvareńnia hetaj pieśni, za jakuju mianie sudziać».
23 žniŭnia za repost hetaj pieśni sud pakaraŭ hodam kałonii 22-hadovaha hamielčuka Siarhieja Bałachonava.