Kiraŭnik MUS Litvy: Suprać nas Biełaruś viadzie hibrydnuju vajnu
Bolš intensiŭny patok mihrantaŭ ź Biełarusi ŭ Litvu pakazvaje, što suprać našaj krainy raspačataja hibrydnaja vajna, ale situacyja kiravanaja, skazała ministarka ŭnutranych spraŭ Litvy Ahne Biłatajcie. Pra heta piša Delfi.
Daradca prezidenta Litvy Asta Skajshirycie i kiraŭnica MUS Ahne Biłatajcie śćviardžajuć, što Biełaruś viadzie hibrydnuju vajnu ź Litvoj i akazvaje na jaje cisk.
«Apošnim časam biełaruski režym značna pavialičyŭ hibrydny cisk na našu krainu, adna z prykmiet takoha cisku — pavieličeńnie kolkaści nielehalnych mihrantaŭ», — skazała Skajshirycie.
«Za minułyja sutki my zatrymali 52 nielehalnych mihrantaŭ, za apošnija 5 miesiacaŭ kolkaść nielehalnych mihrantaŭ pavialičyłasia ŭ dva razy, kali paraŭnoŭvać sa źviestkami za minuły hod», — zajaviła Biłatajcie.
«Dla abarony miažy ŭ nas jość usie nieabchodnyja srodki, u heta ŭciahnutyja ŭsie viedamstvy, my kirujem situacyjaj. Kali situacyja budzie składanaj, kali jana pahoršycca, u nas jość płan A, B i V. my hatovyja da mahčymych vyklikaŭ», — zaŭvažyła ministarka. Pa słovach Biłatajcie, zhodna z płanam prykryćcia aktyvujuć i pryciahnuć vojska, kali patok nielehalnaj mihracyi značna vyraście. Jana zhadała, što kraina imkniecca źnizić pryvabnaść mihracyi. Ciapier bolšaja častka mihrantaŭ, jakija prosiać prytułku ŭ Litvie, paźniej źjazdžaje na zachad. Płanujecca zabaranić tym, chto prosić status biežanca, na praciahu peŭnaha času pakidać terytoryju Litvy.
«Pakul nie vyśvietlać asobu i nie buduć vykanany inšyja pracedury, ruch nie budzie dazvoleny», — skazała Biłatajcie.
Akramia taho, paskorany praces ustanoŭki sistem adsočvańnia na miažy. Ciapier jany achoplivajuć 38% miažy ź Biełaruśsiu. U 2022 hodzie płanujuć zaviaršyć ustanoŭku hetych sistem na ŭsioj miažy.
Pavodle źviestak sił achovy dziaržaŭnaj miažy, sioleta ŭ Litvu ź Biełarusi sprabavali patrapić kala 250 mihrantaŭ, u asnoŭnym hramadzian Iraka. Heta ŭ 3 razy bolš, čym za ŭvieś 2020 hod. U kancy maja Alaksandr Łukašenka zajaviŭ, što Biełaruś dahetul spyniała «narkotyki i mihrantaŭ» la miažy ź Litvoj, a paśla reakcyi na pasadku samalota ŭ Minsku i novych sankcyj, bolš nie budzie hetym zajmacca. «Voś ciapier sami budziecie ich łavić», — skazaŭ jon.
