Arhienciniec vykupiŭ damien Google za 3 dalary
Veb-dyzajnier z Arhienciny Nikałas Kurona nabyŭ damiennaje imia Google.com.ar usiaho za 3 dalary, u vyniku čaho 21 krasavika na terytoryi ŭsioj krainy pošukavaja sistema Google nie pracavała niekalki hadzin.
Fota Depositphotos.com
Pa słovach Nikałasa Kurona, 21 sakavika jon zajšoŭ na sajt Nic.ar, dzie pradajucca damieny, i zaŭvažyŭ tam miascovy damien Google. Nikałas adrazu ž nabyŭ jaho prykładna za 3 dalary, paviedamlaje BBC.
U svaich dziejańniach arhienciniec nie bačyŭ nijakaha parušeńnia zakonu, ale dumaŭ, što ŭ jaho ciapier buduć prablemy. Pra svaju paśpiachovuju pakupku Nikałas napisaŭ u Twitter.
Supracoŭniki Google chutka adreahavali na tvit, i dostup da arhiencinskaj staronki pošukavaj sistemy ŭdałosia viarnuć praź niekalki chvilin. Jak mienavita kampanii ŭdałosia pryjści da pahadnieńnia ź Nikałasam, nie paviedamlajecca.
Adno z tłumačeńniaŭ hetaj situacyi ŭ tym, što supracoŭniki Google, vierahodna, zabylisia praciahnuć termin dziejańnia licenzii na damien, u vyniku čaho damiennaje imia vystavili na prodaž. Adnak u kampanii pierakonvajuć, što heta nie tak, a termin dziejańnia licenzii skončycca tolki sioleta ŭ červieni.
Inšaja viersija — mahčyma, u pracy arhiencinskaha sajta Nic.ar adbylisia techničnyja prablemy, praź jakija damien Google byŭ vystaŭleny na prodaž. Pakul kampanija rasśleduje dakładnyja abstaviny incydentu.