Biez Wi-Fi i pieradačy źviestak: jak vyhladajuć smartfony ŭ Paŭnočnaj Karei
Skandynaŭski prahramist Kryścijan Krystensen pabyvaŭ u Paŭnočnaj Karei, dzie ŭ jakaści suvieniru kupiŭ smartfon. U svajoj natatcy na sajcie hackernoon.com jon pryvodzić charaktarystyki pryłady i raspaviadaje niekatoryja ŭražańni ad naviedvańnia krainy. My publikujem pierakład jahonaha tekstu ŭ skaročanym varyjancie.
Trapić u Paŭnočnuju Kareju akazałasia davoli lohka. Usio było vielmi najhrana. Vidavočna, što było zahadzia vyrašana, jakich ludziej i jakija miescy my mahli ŭbačyć, pryčym usie jany zaŭziata kazali ab bahaćci i roskvicie krainy.
Voś tolki schavać žachlivuju haleču im usio-tki nie ŭdałosia. Jany nie zmahli schavać pieraboi elektraenierhii, niedachop vady, vazy z bykami, na jakich sialanie vazili zasochłaje ziernie, i babulu, jakaja źbirała reštki ŭradžaju na rysavym poli.
Kožny etap našaj pajezdki, zdavałasia, prachodziŭ pa praviłach, bieź jakoje-kolviek impravizacyi: na śniadanak, abied i viačeru zaŭsiody padavali kimčy (karejskaja strava z marynavanaje ŭ vostrym sousie harodniny — red.), u kožnym numary abaviazkova była ladoŭnia, a ŭ kožnym miescy prypynku — suvienirnaja krama. Nam pastajanna prapanoŭvali kupić roznyja tavary: ad śviatočnych marak u honar zapusku mižkantynientalnaj balistyčnaj rakiety da vielizarnych dyvanoŭ na ścianu z vyjavami lvoŭ i inšych žyvioł, jakija nie nasialajuć hety rehijon. Adnak maim lubimym suvieniram stała toje, što nielha było kupić u zvyčajnaj kramie, — smartfon, vyrableny nibyta na terytoryi Paŭnočnaj Karei.
Smartfon Arirang 151 źjaviŭsia na śviet u 2016 hodzie. Vonkava jon padobny da standartnaha telefona na Android. U jaho jość kamiera, Bluetooth, 3G, unutranaje schovišča na 4 Hb i słoty pad MicroSD i micro-SIM.
Adzinaje, čaho ŭ jaho niama, — heta mahčymaści padłučycca da Wi-Fi, što całkam narmalna, bo za čas svajoj pajezdki pa Karei ja ni razu nie bačyŭ adkrytych punktaŭ dostupu.
Apieracyjnaja sistema ŭjaŭlaje saboj značna źmienienuju viersiju Android 4.4.2. Telefon pradajecca nie tolki z tematyčnym afarmleńniem, ale i z 500-miehabajtnym rekłamnym rolikam (cikavaje rašeńnie, uličvajučy mały abjom pamiaci), a taksama ŭstalavanymi dadatkami. U asnoŭnym heta hulni, takija jak Super Mario, Plants vs. Zombies i piać roznych viersij Angry Birds, Cut the Rope i inšych. Pakolki mnie dastaŭsia telefon, jakim užo karystalisia, to ŭ im ja znajšoŭ jašče i dadatak dla fitnies-trekiera ad Huawei. Ja bačyŭ, jak niekatoryja miascovyja žychary nasili takija trekiery. Nie viedaju, ci chacieli jany hetym pakazać, što zajmajucca sportam abo što ŭ ich jość hrošy, ale ja liču davoli niezvyčajnym toje, što hramadzianam Paŭnočnaj Karei dazvalajuć vykarystoŭvać kitajskuju elektroniku, uličvajučy palityku krainy, nakiravanuju na impartazamiaščeńnie.
Akramia hulniaŭ, u smartfonie taksama byŭ ustalavany App Locker, jaki nibyta pavinien dazvalać błakavać dostup da dadatkaŭ i «šyfravać» dadzienyja tekstavych paviedamleńniaŭ i kantaktaŭ.
Praŭda, małaimavierna, što hetaja prahrama čym-niebudź adroźnivajecca ad prostaha ekrana błakavańnia. Šyfravańnie paviedamleńniaŭ tam, chutčej za ŭsio, skraznoje, a dostup da dadatkaŭ błakujecca zvyčajnym čatyrochznačnym ličbavym parolem. Napeŭna, hety dadatak ustalavali ŭ smartfon, kab dać karystalniku padmanlivaje pačućcio pryvatnaści i prymusić jaho bolš volna vykazvać svaje dumki ŭ pierapiscy.
Ale hałoŭnaj asablivaściu karejskaha smartfona było toje, što ja nie zmoh padklučyć jaho da inšych pryład. Možna było ŭstalavać złučeńnie z kampjutaram praz Bluetooth, ale nielha było abmieńvacca infarmacyjaj, a kali ja ŭstaviŭ u telefon SIM-kartu, toj prosta vyklučyŭsia. Mnie ŭdałosia padklučyć smartfon da kampjutara praz USB i vyhruzić ź jaho dadzienyja, ale voś, naadvarot, pierakinuć što-niebudź z PK na telefon u mianie nie atrymałasia — fajły prosta źnikali pry adkryćci.
Mianie ŭraziła, kolki vysiłkaŭ pryjšłosia prykłaści raspracoŭščykam, kab karystalnik nie moh abmieńvacca dadzienymi z zamiežnymi pryładami.
Niadziŭna, što smartfon vyjšaŭ z apieracyjnaj sistemaj piacihadovaj daŭniny. Ja nie vieru, što sama pryłada była zroblena ŭ Paŭnočnaj Karei, ale liču, što ŭsie hetyja źmieny ŭnieśli miascovyja prahramisty.
