Samaje čytanaje za 2016. Domračava, Hleb, Hančarenka: jak spartyŭnaja elita abžyvaje bierah Minskaha mora
U Łaparavičach ziamlu razdajuć čempijonam, jak u Drazdach — čynoŭnikam.
U navahodnija śviaty «Naša Niva» ŭzhadvaje samyja papularnyja artykuły, jakija źjavilisia na sajcie za 2016 hod.
* * *
U siaredzinie 2000-ch pieršaje «pakaleńnie» łukašenkaŭskaj elity atrymała darmovyja ŭčastki ziamli ŭ Drazdach. Pałacyki tam uźviali čynoŭniki, biznesoviec Juryj Čyž, śviatar Fiodar Poŭny, a taksama chakiejny trenier Michaił Zacharaŭ. Na susiedniaj vulicy — chakieisty Uładzimir Cypłakoŭ i Rusłan Salej. Košt hetych katedžaŭ ciapier składaje kala $1 miljona.
U pačatku 2010-ch palityčnyja elity abnavilisia, i ich zasialili niepadaloku, u «Drazdach-2». Tut čynoŭnikaŭ i siłavikoŭ «razbavili» niekalkimi mastakami, što afarmlali Pałac Niezaležnaści, i śpievakom Anatolem Jarmolenkam. Chapiła prastory i dla spartsmienaŭ — miesca na pieršaj bierahavoj linii dastałasia tenisistcy Viktoryi Azaranka, tenisnamu trenieru Siarhieju Ciacierynu, a taksama bijatłonnamu funkcyjanieru Siarhieju Bułyhinu. Trochi mienš prestyžnyja nadzieły aformili na siabie frystajlisty-čempijony Alaksiej Hryšyn i Anton Kušnir.
U sistemie kaštoŭnaściaŭ biełaruskich elit najaŭnaść svajoj ziamli — nadzvyčaj istotny składnik. Heta svojeasablivaje pryznańnie, atrymanaje ad dziaržavy. A ŭ dadatak hety bonus možna pieradać dzieciam, zabiaśpiečyŭšy im biaźbiednaje isnavańnie.
«Elitnaja dziareŭnia»
Dla biełaruskich spartsmienaŭ masavym miescam razdačy ziamli stali Łaparavičy. «O, u nas dziareŭnia stała elitnaja», — chvalicca nam staražył Łaparavič, jaki kuryć la bramy svajoj staravataj chaty, čakajučy žonku.
Damy Vitala Radzivonava, treniera Viktara Hančarenki i abaroncy Alaksandra Jureviča.
Vioska znachodzicca na paŭnočnym bierazie Zasłaŭskaha vadaschovišča. (Minskaha mora). Ad kalcavoj — usiaho 10 km. U Łaparavičach ciapier žyvie kala 250 čałaviek, bolšaść ź ich pracuje ŭ stalicy.
Kaliści heta była zvyčajnaja vioska. Uzdoŭž adzinaj vulicy stajali draŭlanyja chaty, a da samaha bieraha vadaschovišča, u nizincy, išli aharody.
Adnak blizkaść da Minska ŭźniała ceny. Ciapier ziamla tut darahaja, za 15 sotak haspadary prosiać ažno $300 tysiač. «Dziaržaŭnaja» cana značna adstaje — kadastravy košt takoha ž nadzieła składaje ŭsiaho $25 tysiač.
Učastki pad pryvatnaje budaŭnictva ŭ Minsku nie dajuć, a voś u Łaparavičach z hetym praściej. U kancy 2000-ch kala 70 nadziełaŭ byli vydzielenyja dla achvotnych palepšyć svaje žyllovyja ŭmovy.
Niekalki hadoŭ tamu Papiarnianski sielsaviet vybraŭ bolš prahresiŭnuju schiemu razdačy ziamli — vystaviŭ učastki na aŭkcyjon. Vynikovaja cana pa roznych nadziełach vahałasia pamiž $50 tysiačami i $125 tysiačami ŭ zaležnaści ad prestyžnaści miesca.
Na spartsmienach vyrašyli nie zarablać. Choć chto-chto, a jany sa svaimi vialikimi kantraktami mahli pry žadańni nabyć luby nadzieł ziamli.
Miascovyja ŭłady vyrašyli nie rabić tajamnicu z prafiesii novych haspadaroŭ i nazvali vulicu Spartyŭnaj.
Zajechać u hości da Domračavaj i kampanii składana — rasstaŭlenyja niekalki darožnych znakaŭ z papiaredžańniem, što pajezdka pa pryrodaachoŭnaj zonie budzie kaštavać 20 bazavych vieličyniaŭ (4,2 miljona rubloŭ).
Pieršyja žychary — bijatłanisty
Pieršyja nadzieły stali vydavać elicie ŭ kancy 2010 hoda. Praviły hulni źmianialisia niekalki razoŭ.
Spačatku ŭznaharodzili bijatłanista Siarhieja Novikava. Mahiloŭski spartsmien nikoli nie chapaŭ zorak ź nieba, ale na Alimpijadzie ŭ Vankuviery zmoh skočyć vyšej za hałavu. Daskanałaja stralba ŭ indyvidualnaj honcy pryniesła jamu srebny miedal. A nieŭzabavie — i nadzieł u Łaparavičach. Novikaŭ atrymaŭ jaho ŭ pažyćciovaje spadčynnaje vałodańnie. Usie inšyja haspadary-spartsmieny vałodajuć ziamloj pa pravie ŭłasnaści.
Bijatłanist Novikaŭ užo skončyŭ karjeru. Na svaim nadziele ŭ Łaparavičach jon usio jašče buduje davoli ścipły dom.
Praź niekalki miesiacaŭ u jaho źjaviŭsia susied — učastak vykupiŭ trenier Adryjan Cybulski. U zamiežnych ŚMI jaho nazyvajuć «asabistym trenieram Darji Domračavaj». Cybulski ŭznačalvaje bijatłonnuju zbornuju Biełarusi i ŭ fiederacyi ličycca namieśnikam staršyni KDB Valeryja Vakulčyka.
Premija dla BATE
Najbolšaja kolkaść žycharoŭ dadałasia na vulicu Spartyŭnuju ŭ vieraśni 2011 hoda. Futbolnyja zaŭziatary śviatkavali pośpiech barysaŭskaha BATE — kamanda ŭ čarhovy raz prabiłasia ŭ Lihu čempijonaŭ.
Papiarnianski sielvykankam uznaharodziŭ troch čałaviek z kamandy. Nadzieły atrymali trenier Viktar Hančarenka (ciapier jon pracuje ŭ maskoŭskim CSKA), abaronca Alaksandr Jurevič (skančvaje karjeru ŭ salihorskim «Šachciory») i napadajučy Vital Radzivonaŭ, jaki dahetul zastajecca hałoŭnaj udarnaj siłaj BATE.
Dom Vitala Radzivonava — adnaho z najlepšych i samych papularnych u narodzie napadajučych Biełarusi.
Viktar Hančarenka karystajecca popytam na rasijskim rynku. Ale jaho dom staić na bierazie Minskaha mora.
Jurevič praciahvaje karjeru, ale ŭžo nie ŭ BATE. Dom Jureviča ŭ Łaparavičach.
Samaha viadomaha biełaruskaha futbalista, Alaksandra Hleba, u barysaŭskim kłubie tady jašče nie było. Jon mieŭ kantrakt ź ispanskaj «Barsiełonaj». Hleb — znany rybak. Mahčyma, viarnuŭšysia praz hod u Biełaruś, Alaksandr nasłuchaŭsia ad partnioraŭ raspoviedy pra rybnyja bierahi Minskaha mora. Tak ci inačaj, ale ŭ kancy 2014 hoda jon za svaje hrošy vykupiŭ adzin z susiednich damoŭ.
Samy vysokaapłatny biełaruski futbalist Alaksandr Hleb nabyŭ katedž za svaje hrošy. Kala doma — prastorny łužok.
Łatyfundyja Domračavych
Uvosień 2011 hoda ŭčastak na vulicy Spartyŭnaj atrymała i Darja Domračava. Na toj momant bijatłanistka ŭžo mieła status pryziora Alimpijady-2010.
Adnak sapraŭdnaje pryznańnie i narodnaja luboŭ pryjšli da jaje paśla nastupnaj Alimpijady. Nahadajem, u 2014 hodzie ŭ Sočy Domračava vyjhrała try załatyja miedali, a nieŭzabavie jašče i atrymała status Hieroja Biełarusi.
Hetaha, jak paličyli čynoŭniki, było dastatkova, kab uznaharodzić siamju Domračavaj jašče niekalkimi nadziełami ŭ Łaparavičach.
Bijatłanistka i tak mieła nadzieł, bližejšy da vady. A ciapier joj dali dadatkovyja 80 sotak «dla dobraŭparadkavańnia zony adpačynku». U takim vypadku ziamla pieradajecca ŭ arendu. Domračavaj daviadziecca płacić štohod pa $803. Damova zaklučanaja na tradycyjnyja 99 hadoŭ. Aproč taho, čarhovyja 20 sotak byli zapisanyja na jaje maci, Łarysu Mininu.
Prajekt budoŭli Domračavych vyhladaje samym admietnym, dom budzie padobny da futurystyčnaha kaśmičnaha karabla.
Prajekt budoŭli Domračavych vyhladaje samym admietnym, dom budzie padobny da futurystyčnaha kaśmičnaha karabla.
Lecišča Mulavina
Darečy, Łaparavičy akazalisia ŭ centry ŭvahi, kali ŭ vioscy źnieśli lecišča Uładzimira Mulavina. Mienavita adsiul jon jechaŭ na svajoj mašynie, kali raźbiŭsia ŭ aŭtakatastrofie ŭ 2002 hodzie. Budynak stajaŭ pustym bolš za dziesiacihodździe, i ciapier siamja pieśniara vyrašyła pradać jaho. Novy haspadar źnios sastarełaje lecišča, kab pabudavać na jaho miescy sučasny katedž.
Raniejšyja «kałonii» spartsmienaŭ
U kancy 1990-ch uzrovień dabrabytu biełarusaŭ byŭ značna nižejšym, a «bonusy» spartyŭnaj elicie — značna tańniejšymi. Čempijonam prapanavali pabudavać kvatery ŭ jarka rasfarbavanych šmatpaviarchovikach na vulicy Viasiołkavaj. Pryčym žyllo nie było padarunkam, a budavałasia dolevym sposabam. Kvatery, naprykład, zajmieli tenisist Maksim Mirny, kiraŭnik BATE Anatol Kapski.
Praź niekalki hadoŭ spartsmieny-čempijony zmahli raźličvać na katedžy. Ich najbolšaja kolkaść sabrałasia ŭ rajonie vulic Miastroŭskaja i Ržavieckaja, niepadaloku ad «Minsk-Areny». Tut pabudavalisia srebrany pryzior Alimpijady-2008 pa šturchańni jadra Natalla Michnievič, bronzavy pryzior Alimpijady-2004 pa viełahonkach Natalla Cylinskaja, dvuchrazovy pryzior Alimpijadaŭ frystajlist Dźmitry Daščynski i trenierka zbornaj Biełarusi pa mastackaj himnastycy Iryna Laparskaja.
