Viadučym «Konturaŭ» staŭ rasijanin, aŭtar kanśpirałahičnych filmaŭ pra dalar FOTA, VIDEA
Pa vynikach kastynhu na telekanale ANT abrany novy televiadučy prahramy «Kontury». Im staŭ 44-hadovy rasiejec Illa Kołasaŭ.
Fota Kp.by
Jon zmahaŭsia za miesca ź Viktoryjaj Jazierskaj (viadučaja BT, jakaja ŭ kryzis źjechała pracavać na rasijski «Łajfńjuz», a paśla viarnułasia ŭ Biełaruś) i adnym z top-mieniedžaraŭ ANT Rusłanam Paddubskim.
Intervju Kołasava sa śpikieram pałaty pradstaŭnikoŭ Uładzimiram Andrejčankam.
Apošnim časam Kołasaŭ pracavaŭ šefam jeŭrapiejskaha biuro rasiejskamoŭnaha mižnarodnaha telekanała RTVi i žyŭ u Bierlinie.
Paśla zakančeńnia Sankt-Pieciarburhskaha instytuta kino i telebačańnia pa śpiecyjalnaści «hukarežysior» (1995) jon pracavaŭ palityčnym ahladalnikam na «Radyjo Rasii», a ŭ 2000—2013 — viadučym navinovaj prahramy «Padziei» na rasijskim telekanale «TV Centr».
U 2000-ja jahonuju prahramu na «TV Centry» ličyli krytyčna nastrojenaj da rasijskaj ułady, adnak ź ciaham času jon staŭ prychilnikam žorstkaj palityki Uładzimira Pucina: «Patrebny toj, chto, uśviadomiŭšy, što niejki čałaviek pieraškadžaje dasiahnieńniu metaŭ, jakija stajać pierad krainaj, — pryniaŭ by hetaha čałavieka z palityki rašuča i žorstka. U hetym sensie ja radykał».
«Ja kansiervatar ŭ płanie žyćciovych kaštoŭnaściaŭ. Pry hetym, čort vaźmi, radykał ŭ płanie ich dasiahnieńnia. Naprykład, lublu revalucyju. Tamu što niekatorych ludziej, prabačcie, praściej zabić, čym rastłumačyć, čaho ad ich chočuć», — pierakanany Kołasaŭ.
Fota Kp.by
Televiadučy nazyvaŭ siabie prychilnikam Uha Čaviesa: «Prosta jon ź ludziej, jakija mnie simpatyčnyja. Ryzykujučy naklikać na siabie niepryjaznaść ludziej, jakija b nazvali siabie libierałami ci demakratami, skažu: asabista ja da Čaviesa staŭlusia z pašanaj. Tamu pryvioz sabie z Karakasa biejsbołku z profilem vieniesuelskaha Če. Paličyŭšy, što ŭ nas matrycy kaštoŭnaściaŭ supadajuć. Mnie hetaksama simpatyčny Alaksandr Ryhoravič Łukašenka».
Kołasaŭ — aŭtar kanśpirałahičnych filmaŭ «Bie$ciennyj dołłar» i «Bie$ciennyj dołłar — 2» pra amierykanskuju valutu, jakaja niespraviadliva zaniavoliła śviet.
U intervju televiadučaha časta ŭźnikaje tema nietradycyjnaj seksualnaj aryjentacyi. «Sučasnaja moda — heta ździek homasieksualistaŭ ź dziaŭčat. Tamu času na jaje ja nie marnuju», — raskazvaŭ jon.
Kołasaŭ chvaliŭsia, što siabar apisaŭ jaho nastupnym čynam: «Redki mužčynski tvar na našym błakitnym ekranie». «Pryhoža skazaŭ. Mnie było pryjemna. Pa-mojmu, mianie ciažka zapadozryć u niapravilnaj aryjentacyi», — prakamientavaŭ Kołasaŭ.
Ad pieršaha šlubu jon maje dvuch synoŭ, jany žyvuć u Rasii. U Biełaruś Kołasaŭ pierabraŭsia z novaj siamjoj.