Dastupnyja pieršyja piać tamoŭ zboru tvoraŭ Vasila Bykava ŭ elektronnym farmacie
Biblijateka na sajcie Sajuza biełaruskich piśmieńnikaŭ papoŭniłasia pieršymi piaćciu tamami poŭnaha zboru tvoraŭ Vasila Bykava. Kožny žadajučy moža biaspłatna spampavać knihi ŭ farmacie.ePub.
Padčas układańnia tamoŭ ŭličvałasia mierkavańnie samoha aŭtara, jaki paśpieŭ spłanavać praśpiekt vydańnia svajho 8-tomnaha zboru tvoraŭ.
U pieršy tom uvajšli apovieści «Afhaniec» i «Vaŭčynaja jama» (1998), a taksama apaviadańni i prypavieści, napisanyja u 1990-ch i 2000-ch hadach. Druhi tom uklučaje apovieści «Znak biady» (1982), «U tumanie», «Abłava» (1988), «Pakachaj mianie, sałdacik» (1995), «Bałota» (2001). Treci tom składajecca z apovieściej «Miortvym nie balić» (1965), «Praklataja vyšynia» (1968), «Sotnikaŭ» (1970), «Ściuža» (vyd. 1993). U čaćvietrym tomie znachodziacca «Apošni bajec» (nadr. 1958), «Žuraŭliny kryk» (1959), «Zdrada» (1962), «Treciaja rakieta» (1961), «Pastka» (1964), «Alpijskaja bałada» (1966). U piatym — apovieści «Kruhlanski most» (1968), «Dažyć da śvitańnia» (1972), «Voŭčaja zhraja» (1974), «Jaho bataljon» (1975).
Akcyja prymierkavanaja da dzion pamiaci piśmieńnika.
U chutkim časie na sajcie buduć dastupnyja astatnija piać tamoŭ — z šostaha pa dziasiaty — usie, jakija na dadzieny momant pabačyli śviet ź mierkavanych 14-ci.
Nahadajem, vydańnie Poŭnaha zboru tvoraŭ zapačatkavanaje ŭ 2005 hodzie HA «Sajuz biełaruskich piśmieńnikaŭ», Hramadzianskaj inicyjatyvaj «Ahulnanacyjanalny ruch Vola naroda», maskoŭskim vydaviectvam «Vriemia».
