Жыхару Гомеля далі тры гады калоніі за «гвалт» над міліцыянтам
17 верасня ў Гомелі вынеслі прысуд 46-гадоваму Віктару Прусаву. Яго прызналі вінаватым паводле арт. 364 Крымінальнага кодэкса і асудзілі да трох гадоў пазбаўлення волі ў калоніі агульнага рэжыму.
Віктар Прусаў у судзе
Таксама суддзя абавязала яго выплаціць 1500 рублёў на карысць пацярпеламу «Пятрову»: ягоная асоба залегендаваная. Таксама Віктар Прусаў мусіць выплаціць дзяржпошліну памерам 87 рублёў, паведамляе «Вясна».
Суд праходзіў у закрытым рэжыме праз хадайніцтва з боку абвінавачання, каб гарантаваць бяспеку пацярпелых супрацоўнікаў АМАП.
Віктар Прусаў падчас затрымання
Вядома, што Віктара Прусава затрымалі 27 верасня 2020 года падчас адной з пратэсных акцый у Гомелі, у ІЧУ яму паведамілі пра завядзенне крымінальнай справы за супраціў супрацоўнікам міліцыі (арт. 363 Крымінальнага кодэкса). Затым справу закрылі, аднак пракуратура вярнула яе на даследаванне, падчас якога эпізод перакваліфікавалі па арт. 364 КК. Віктара зноў узялі пад варту 17 чэрвеня 2021 года.
