Расійскі генерал лічыць, што тэрарыстамі ў «Крокусе» кіравалі заходнія спецслужбы праз ушытыя чыпы
У якасці прыкладу дарадца міністра ўнутраных спраў Расіі прывёў эксперымент Ілана Маска.
Уладзімір Аўчынскі. Скрын відэа
Уладзімір Аўчынскі — дарадца міністра ўнутраных спраў Расіі, экс-кіраўнік Інтэрпола Расіі, экс-дарадца старшыні Канстытуцыйнага Суда РФ, генерал-маёр міліцыі ў адстаўцы, 30 сакавіка ў эфіры Першага канала распавёў сваю версію тэракта.
Аўчынскі ў ходзе абмеркавання ў студыі паведаміў, што тэрарысты не дзейнічалі самастойна, імі ажыццяўлялася «знешняе кіраванне» дыстанцыйна. А вынікі першых экспертыз, паводле яго, паказалі, што тыя, хто нападаў, былі пад уздзеяннем псіхатропнага рэчыва, якое яшчэ не вызначана.
«Гэтым вырадкам адключылі свядомасць. Хутчэй за ўсё, у комплексе дзейнічалі псіхатропныя рэчывы, нейропсіхалагічнае праграмаванне і, магчыма, гэта пакажа экспертыза, чыпы ўстаўленыя!» — заявіў Аўчынскі.
Нейрабіялогія дазваляе кіраваць чалавекам, упэўнены генерал-маёр. У якасці прыкладу ён прывёў эксперымент Ілана Маска, які «з свіней робіць людзей». «А тут наадварот», — дадаў вядучы.
«Гэта не нейкая група псеўда-ІДІЛа! А добра арганізаваны тэракт на ўзроўні заходніх спецслужбаў! Толькі ў іх ёсць такія сродкі ўздзеяння на людзей», — аргументаваў сваю версію Аўчынскі.
Кампанія бізнэсмена Ілана Маска Neuralink раней ужывіла паралізаванаму чалавеку нейрачып, які дазваляе кіраваць кампʼютарам сілай думкі.
Чытайце таксама:
У тэракце ў «Крокусе» загінуў палкоўнік спецназу ГРУ расійскай арміі — толькі прыехаў з Украіны
Пяскова спыталі, чаму Пуцін не паехаў на места трагедыі ў «Крокусе»
