Стала вядома, з якімі мінімальнымі баламі можна сёлета паступаць у ВНУ

Сталі вядомыя мінімальныя парогавыя балы, з якімі абітурыенты-2022 змогуць паступаць у ВНУ сёлета, піша «Зеркало». Так, калі чалавек не плануе быць філолагам, рускую ці беларускую яму дастаткова здаць усяго на 10 балаў.

У гэтым годзе ВНУ краіны плануюць прыняць каля 53 тысяч абітурыентаў. З іх крыху больш за 27,5 тысячы — на бюджэт. Гэта прыкладна столькі ж, як і ў 2021-м.

Не змяніліся і мінімальныя парогавыя балы, з якімі ў хлопцаў і дзяўчат будуць прымаць дакументы ў ВНУ і каледжы. Выглядаюць яны так:

ад 10 балаў па рускай ці беларускай мовах (для будучых філолагаў — ад 25);
ад 20 балаў па матэматыцы, фізіцы, хіміі і біялогіі;
ад 25 балаў па гісторыі, грамадазнаўстве, геаграфіі, замежных мовах;
ад 10 балаў па матэматыцы, фізіцы, хіміі, біялогіі, калі гэта другі профільны прадмет;
ад 15 балаў па гісторыі, грамадазнаўстве, геаграфіі, замежных мовах, калі гэта другі профільны прадмет.

Акрамя таго, па некаторых спецыяльнасцях у шэраг ВНУ абітурыенты змогуць падаваць сертыфікаты, нават калі набралі ад 7 балаў. Дакументы з такімі вынікамі прымуць камісіі Ваеннай акадэміі, Універсітэта МНС, Інстытута пагранічнай службы, ваенныя факультэты грамадзянскіх ВНУ.