Ва Украіне адкрылі пункт ананімнай вакцынацыі для тых, хто купіў падробны сертыфікат
Такі пункт адчыніўся ў горадзе Ужгарад. Там змогуць ананімна прышчапіцца людзі, якія набылі падроблены сертыфікат, а таксама прышчапіцца тыя, хто раней не вакцынаваўся, але хоча зрабіць гэта ананімна, бо баіцца даваць пашпартныя звесткі.
Кабінет будзе працаваць кругласутачна, там будуць даступныя ўсе вакцыны, ухваленыя Міністэрствам аховы здароўя краіны: Pfizer, Moderna, Astrazeneca, Johnson & Johnson і Sinovac.
Для таго каб вакцынавацца, нават не трэба будзе паказваць свае асабістыя даныя. Каб можна было нейкім чынам весці медыцынскую дакументацыю, неабходна будзе прыдумаць альбо нумар, альбо імя і падпісаць згоду, якую трэба аддаць медыцынскаму работніку, каб ён меў юрыдычнае права ўвесці вакцыну.
Раней прэзідэнт Украіны Уладзімір Зяленскі заявіў, што прышчэпленым будуць плаціць па тысячы грыўняў (каля 90 беларускіх).
Усяго ў краіне хаця б адну дозу вакцыны ад каранавіруса атрымалі больш за 12,3 мільёна чалавек, з іх амаль 8,9 мільёна прайшлі поўны курс вакцынацыі.
