«Voziera NATA». Jak Zachad pieramoh Rasiju ŭ Bałtyjskim mory biez adzinaha strełu
Ustupleńnie Šviecyi ŭ NATA całkam zaviaršyć mazaiku, jakaja składałasia jašče z časoŭ Chałodnaj vajny i jakaja ciapier pakidaje Rasiju ŭ bałtyjskim rehijonie maksimalna ŭraźlivaj i samotnaj (navat z ulikam režymu Łukašenki). Raskazvajem, što ŭjaŭlaje saboj NATA razam sa Šviecyjaj i ŭ čym jaje hałoŭny kozyr.
Šviedski vajskoviec na fonie mapy bałtyjskaha rehijona, dzie ciapier z ulikam Šviecyi całkam daminuje NATA. Foty: Nato.int. Kałaž: «Naša Niva»
Praces ratyfikacyi siabroŭstva Šviecyi ŭ NATA paśpiachova skončany.
Vienhryja była apošniaj krainaj NATA, jakaja nie ŭzhadniała ŭstupleńnie Šviecyi ŭ Paŭnočnaatłantyčny aljans. Ratyfikacyja ŭ vienhierskim parłamiencie adbyłasia paźniej, čym navat u Turcyi, jakaja da apošniaha aktyŭna krytykavała Šviecyju za niedastatkovuju «baraćbu z teraryzmam».
Toje ž samaje było i ŭ vypadku ź Finlandyjaj, jakoj Turcyja i Vienhryja taksama zaminali chutka ŭstupić u NATA. Ale ŭ vyniku Finlandyja damahłasia členstva ŭ aljansie, što ciapier niepaźbiežna adbudziecca i sa Šviecyjaj.
Šviecyja i Finlandyja da niadaŭniaha času źjaŭlalisia apošnimi častkami pazła, jakich nie chapała dla kančatkovaha ŭmacavańnia NATA ŭ bałtyjskim rehijonie. Praces hety pačaŭsia jašče ŭ časy Chałodnaj vajny z ŭstupleńnia ŭ aljans Danii, pieršaj krainy NATA z pramym dostupam u Bałtyjskaje mora, jakoje na toj momant pieravažna kantralavałasia SSSR.
«Dapamahła» ŭzmacnieńniu NATA ŭ Bałtycy i sama Rasija, raspačaŭšy dva hady tamu vajnu suprać Ukrainy, što kančatkova pierakanała Finlandyju i Šviecyju admovicca ad niejtralitetu na karyść dałučeńnia da aljansa.
Toje, što niekali nazyvałasia «Vozieram Rasii», ciapier z ustupleńniem u aljans Šviecyi kančatkova stanovicca «Vozieram NATA».
«Vozieram Rasii» zvyčajna nazyvali Bałtyjskaje mora časoŭ Rasijskaj impieryi, kali taja vałodała sučasnymi Litvoj, Łatvijaj, Estonijaj i Finlandyjaj, a taksama časoŭ SSSR paśla Druhoj suśvietnaj vajny, kali pad uładaj Sajuza apynulisia krainy Bałtyi razam z HDR i Polščaj.
Pry hetym, jašče ŭ 17 stahodździ Bałtyjskaje mora nazyvali «Vozieram Šviecyi», bo kraina na toj momant vałodała terytoryjami sučasnych Narviehii, Finlandyi, Rasii, Estonii, Łatvii, Polščy i Hiermanii, a taksama ličyłasia adnoj z najmacniejšych dziaržaŭ u Jeŭropie.
Rehijon Bałtyjskaha mora ŭ roznyja časy pad uładaj Šviecyi (1658), Rasijskaj impieryi (1913), SSSR (1989) i NATA (2024). Foty: Wikimedia Commons. Kałaž: «Naša Niva»
Pra toje, u čym moc Finlandyi i jakija vyhody jana pryniesła NATA, my padrabiazna raśpisali raniej.
Čytajcie. Finlandyja ŭ NATA: voś čamu heta źmianiaje bałans siłaŭ i vakoł Biełarusi
Takim ža čynam razhledzim vajskovyja mahčymaści Šviecyi i raskažam, u čym jaje hałoŭny kozyr.
Vajskovaja moc Šviecyi
Jašče da padačy zajaŭki na ŭstupleńnie ŭ NATA Šviecyja amal całkam adpaviadała ŭsim standartam aljansu (akramia vydatkaŭ na abaronu). Kraina daŭno i aktyŭna ŭdzielničaje ŭ mierapryjemstvach i apieracyjach NATA, a ŭ apošnich bujnych vučeńniach aljansa Steadfast Defender udzielničała jak paŭnavartasny člen błoka.
Šviedskaje vojska uvachodzić u 30-ku najlepšych armij śvietu (29 miesca pavodle rejtynhu Global Firepower 2024). Kraina maje vielizarnyja ekanamičnyja mahutnaści dla samastojnaj raspracoŭki zbroi i techniki (vajskovy biudžet składaje zvyš 11 miljardaŭ dalaraŭ).
U Šviecyi jość kala 25 tysiač prafiesijnych sałdat i kala 7 tysiač pryzyŭnikoŭ. Rezierv naličvaje 33 tysiačy čałaviek, a ŭ vypadku vajny pad strelbu mohuć stać 800 tysiač šviedaŭ (nasielnictva krainy — 10,5 miljona čałaviek).
Pa astatnich pakazčykach bajavaja moc Šviecyi na 2024 hod u mirny čas vyhladaje tak.
- Naziemnaja technika: 120 tankaŭ, 26 samachodak i amal 8 tysiač BMP, BTR i inšych transpartnych srodkaŭ.
- Avijacyja: 71 źniščalnik (pieravažna ŭłasnaj vytvorčaści), 53 viertaloty, 6 ciažkich transpartnikaŭ i 5 samalotaŭ dalokaha radyjołakacyjnaha vyjaŭleńnia (DRŁV).
- Marski fłot: 7 karvietaŭ, 5 padłodak, 8 minanoscaŭ i kala 300 patrulnych karabloŭ (u tym liku rakietnyja, supraćłodkavyja i desantnyja katary).
Z usich krain bałtyjskaha rehijona Šviecyja vałodaje samym vialikim fłotam, jaki navat bolšy za bałtyjski fłot Rasii i praktyčna supastaŭny ź im pa vajskovaj mocy (za košt pieravahi ŭ kolkaści i jakaści padłodak, karvietaŭ, minanoscaŭ i patrulnych karabloŭ).
Pa stanie na 2024 hod Rasija maje ŭ Bałtyjskim mory dźvie padłodki, a taksama 1 frehat, 1 minanosiec, 5 rakietnych eśmincaŭ, 4 karviety, 35 patrulnych karabloŭ i 13 desantnych kataraŭ.
Sumiesnyja vučeńni Šviecyi i ZŠA na šviedskim vostravie Hotłand. Foty: Nato.int
Źniščalnik Saab JAS 39 Gripen (ci prosta «Hryfon») — asnoŭny źniščalnik VPS Šviecyi 4-ha pakaleńnia ŭłasnaj vytvorčaści. Fota: Wikimedia Commons
I heta ŭsio tolki adna Šviecyja. Ale ž akramia jaje ŭ rehijonie jość i sajuznyja Finlandyja, Danija, Hiermanija, Polšča, Litva, Łatvija, Estonija, jakija taksama majuć sučasnyja karabli, avijacyju i ciažkuju naziemnuju techniku (nie kažučy ŭžo pra ZŠA i astatnich členaŭ NATA).
Usio heta ŭ sukupnaści nie pakidaje Rasii nijakaj prastory dla manieŭru ŭ Bałtyjskim mory i ŭ vypadku vajny asudžaje jaje fłot na harantavanaje źniščeńnie biez mahčymaści vyklikać dapamohu. Ciapier NATA ŭ luby momant moža całkam «zakryć» Bałtyku, izalavać Kalininhrad i adrezać ad mora Sankt-Pieciarburh.
I klučavuju rolu u hetym ŭsim zhulaje mienavita Šviecyja, bo tolki ŭ jaje jość važny instrumient kantrolu nad usim bałtyjskim rehijonam — vostraŭ Hotłand.
«Niepataplalny avijanosiec» i klučavy vuzieł suviazi
Jašče ŭ artykule pra mahčymaści Finlandyi my pisali, što paŭnavartasny kantrol nad Bałtyjskim moram mahčymy tolki z udziełam Šviecyi i jaje vostrava Hotłand.
Sam vostraŭ znachodzicca ŭ centry Bałtyjskaha mora za 330 kiłamietraŭ ad Kalininhrada.
Mapa bałtyjskaha rehijona, dzie sinim koleram adlustravany krainy NATA, zialonaj štrychoŭkaj paznačana Šviecyja, a čyrvonym koleram — šviedski vostraŭ Hotłand. Krynica: Nato.int
Takoje ŭdałaje raźmiaščeńnie dazvalaje haspadaru Hotłanda ažyćciaŭlać kantrol nad usimi marskimi pieravozkami ŭ rehijonie, a taksama pahražać stalicam i bujnym haradam usich prybiarežnych dziaržaŭ (asabliva pry raźmiaščeńni na vostravie dalnabojnaj zbroi, avijacyi i marskich baz).
I padobnaja infrastruktura tam užo jość. Paśla rasijskaj anieksii Kryma Šviecyja stała aktyŭna naroščvać svoj vajskovy patencyjał na Hotłandzie i pravodzić tam vučeńni z NATA, aścierahajučysia jaho zachopu z boku Rasii.
Vostraŭ jašče 10 hadoŭ tamu ličyŭsia samaj uraźlivaj dla ŭvarvańnia častkaj Šviecyi, jakaja ŭ vypadku vajny nie pratrymałasia b i pałovy dnia. Ale ciapier Hotłand z «achilesavaj piaty» chutka pieratvarajecca ŭ niepataplalny avijanosiec NATA, jaki surjozna pahražaje rasijskim siłam u Kalininhradzie.
Akramia hetaha, Paŭnočnaatłantyčny aljans atrymlivaje vydatnuju mahčymać sačyć za dziejnaściu rasijskich padvodnych łodak, jakija dla abychodu zachodnich hidrałakataraŭ zvyčajna płavajuć pa-za terytaryjalnymi vodami bałtyjskich krain-udzielnic NATA. Najaŭnaść u aljansie Finlandyi i Šviecyi razam z Hotłandam zvuzić hety svabodny prachod nastolki, što nivodnaja rasijskaja padłodka nie zmoža prajści niezaŭvažanaj.
Usie hetyja pieravahi žyćciova važnyja dla Zachadu, bo na Hotłandzie taksama znachodzicca hałoŭny vuzieł suviazi bolšaści padvodnych kabielaŭ, jakija złučajuć pamiž saboj bałtyjskija krainy NATA.
Kali Rasija jaho zachopić, to zmoža absiekčy ŭsiu kabielnuju suviaź aljansa ŭ bałtyjskim rehijonie (uklučna ź internetam), abo uziać hetuju suviaź pad poŭny kantrol i atrymać dostup da vielizarnaha masiva sakretnaj infarmacyi.
Hetaja pahroza nikudy nie źnikaje z ustupleńniem Šviecyi ŭ NATA, tamu aljans budzie vymušany nadavać pieršasnuju uvahu biaśpiecy Hotłanda.
Čym jašče moža adkazać Rasija?
Rasija adpracoŭvała na vučeńniach zachop Hotłanda jašče z momantu anieksii Kryma. Rasijski napad na terytoryju Šviecyi całkam mahčyma zastaŭsia b biez surjoznaha adkazu, kali b jon adbyŭsia jašče da vajny va Ukrainie i da ŭvachodžańnia Šviecyi ŭ NATA.
Hipatetyčna Rasija i ciapier maje mahčymaść zachapić Hotłand, pakul Šviecyja jašče aficyjna nie ŭ aljansie, adnak vajna va Ukrainie surjozna źniasiliła rasijski vajskovy patencyjał.
Padrychtoŭka ataki na Šviecyju ŭ hety momant zapatrabavała b vyvadu častki rasijskich sił z Ukrainy, što moža pryvieści da abvału jaje fronta i značnaha palapšeńnia stanovišča ŭkrainskaj armii, jakaja abaviazkova skarystajecca mahčymaściu pieravieści duch, dačakacca ŭzmacnieńnia pastavak z boku Zachada i zatym kontrnastupać.
Da taho ž małaimavierna, što u Rasii zaraz atrymajecca zachapić Hotłand. NATA i Zachad užo nie tyja, jakimi byli jašče 10 hadoŭ tamu.
Taksama nikudy nie źnik varyjant sa sprobaj zachopu Litvy, Łatvii, Estonii praz Suvałkski kalidor z terytoryi Biełarusi i Kalininhrada.
Ale va ŭmovach poŭnaha atačeńnia siłami NATA Rasija budzie mieć vielmi nizkija šansy na pośpiech, pry hetym mocna ryzykujučy całkam stracić Kalininhrad i haniebna adstupić u Biełaruś.
«Naša Niva» — bastyjon biełaruščyny
PADTRYMAĆČytajcie taksama:
Ci moža Rasija anieksavać Prydniastroŭje?
Skrynia Pandory. Jak Tajvań moža zładzić apakalipsis u Kitai?
NATA čakaje napadu Rasii praź Biełaruś užo ŭ pačatku 2025 — Bild
