Pahladzicie, jak u nacyjanalnych matyvach afarmlajuć adździaleńni Biełarusbanka
Arnamient z błakitnych vasilkoŭ moža ŭpryhožvać nie tolki biełaruskija nacyjanalnyja stroi, ale i formu bankaŭskich rabotnikaŭ. Tak, rabotnicy CBP № 413 Biełarusbanka ŭ Lidzie ciapier absłuhoŭvajuć klijentaŭ u stylizavanym pad nacyjanalnyja kaściumy adzieńni.
Darečy, źmianiŭsia nie tolki źniešni vyhlad ofisnych rabotnikaŭ, ale i dyzajn samoha centra bankaŭskich pasłuh: ścieny raźmieščanaha pa vulicy Savieckaj adździaleńnia ŭpryhožvajuć etnarośpisy. U adnoj zale «pasialiŭsia» simvał uradžajnaści Jaryła, u druhoj — dačka Sonca Zara, piša «Lidskaja hazieta».
— My vielmi radyja tamu, što naša adździaleńnie nabyło nacyjanalny kałaryt i stała druhim takim adździaleńniem u Hrodzienskaj vobłaści. Unikalny etnaprajekt, prymierkavany da 100-hodździa «Biełarusbanka», adlustroŭvaje nieparyŭnuju suviaź historyi krainy i finansavaj ustanovy. Mastacki rośpis nie tolki zrabiŭ ekskluziŭnym ofisnaje pamiaškańnie, ale i ŭpryhožyŭ naš cudoŭny horad. Pieraŭtvareńni pryjšlisia daspadoby i našym klijentam, jakija pa zasłuhach acanili nacyjanalny kałaryt i dziakujuć za stvareńnie niezvyčajnaj atmaśfiery ŭ etničnym styli, — adznačaje Taćciana Suchockaja, namieśnik dyrektara hetaha adździaleńnia.
Anałahičnyja etnanavacyi pryžylisia nie tolki ŭ lidskim, ale i ŭ niekatorych inšych padraździaleńniach banka. U kožnym horadzie ŭ asnovu mastackaha rośpisu pakładzieny svoj tematyčny siužet, jaki adlustroŭvaje asablivaści kankretnaha rehijona, jaho historyju.
U Hrodnie ścieny bankaŭskaha ofisa ŭpryhožvaje ansambl viadomych architekturnych zbudavańniaŭ — staraja płošča z Kafiedralnym kaściołam; taksama ŭ adździaleńni namalavany samy staražytny z zachavanych i dziejnych u Jeŭropie hadzińnikavy miechanizm.
Klijentaŭ adnaho z bresckich centraŭ bankaŭskich pasłuh raduje rośpis ź lichtarščykam, jaki zapalvaje śviatło na hałoŭnaj piešachodnaj vulicy abłasnoha centra.
U horadzie, jaki natchniaje na tvorčaść mastakoŭ i muzykaŭ, — Viciebsku — na ścienach vykananyja ŭ «akvarelnaj» stylistycy staryja vulicy horada.
U Mahilovie — vyjavy śviatkavańnia Kupalla, nu a ŭ Minsku — architekturny kompleks na Pryvakzalnaj płoščy: znakamityja 11-paviarchovyja viežy, jakija sustrakajuć usich, chto prybyvaje ŭ stalicu.
Etnaprajekt startavaŭ u 2022-m hodzie, jubilejnym dla «Biełarusbanka». Tady adna z hałoŭnych finansavych ustanoŭ krainy padaryła haradam Biełarusi sieryju jaskravych murałaŭ, napoŭnienych lehiendami i mifami. U Lidzie taki rośpis upryhožyŭ fasad žyłoj piacipaviarchoŭki pa vulicy Leninskaj, 17.
Čytajcie taksama:
U jakich restaranach adpačyvali minčuki ŭ 1980-ch — šmat nastalhičnych FOTA
Booking pierastaŭ prymać apłatu biełaruskich bankaŭ? I tak, i nie
Biełarusbank pačaŭ vydavać kredyty na ajčynnyja tavary pad 4%
Da astatnich prykładaŭ afarmleńnia ofisaŭ zaŭvah, z bolšaha, niama.