Chto hetyja prapahandysty z telebačańnia, kamu ŭłady asabista vynieśli padziaki za pracu
Režym abviaściŭ padziaku šerahu prapahandystaŭ, siarod jakich try nie samyja viadomyja fihury. Adnak ich «uniosak» u prasoŭvańni praŭładnych naratyvaŭ i skažeńni infarmacyjnaha pola nielha pieramianšać. BAŽ raspaviadaje pra televizijščykaŭ, jakich adznačyli za zasłuhi «ŭ realizacyi dziaržaŭnaj infarmacyjnaj palityki».
Andrej Mochar, Kaciaryna Tumas-Ciškievič i Volha Koršun
Byłaja nastaŭnica, žonka supracoŭnika AAC, viadučaja ANT
Televiadučaja ANT Kaciaryna Tumas-Ciškievič, jakoj ciapier 41 hod, naradziłasia ŭ Słucku, skončyła himnaziju № 1, paśla pastupiła ŭ pieduniviersitet imia M. Tanka i navat vykładała ŭ adnoj ź siarednich škoł Minska.
Na dadzieny momant Kaciaryna Tumas-Ciškievič zajmaje pasadu zahadčycy adździeła viadučych infarmacyjna-analityčnych prahram ANT. Adnak mieniedžerskija zdolnaści prajavilisia nie adrazu, ab čym jana ščyra raspaviadała ŭ adnym ź intervju:
— Ja nastaŭnik-pradmietnik, ale nijak nie kłasny kiraŭnik. I kali ŭručyli kłas, zapanikavała. Była vielmi maładzieńkaj, da taho ž pa natury zusim nie «matula». Razmaŭlała ź dziećmi na roŭnych. Słovam, kłasnaje kiraŭnictva zdałosia niepasilnaj nošaj, i ja syšła sa škoły.
Paśla karjera dziaŭčyny raptam pajšła ŭharu. Jana sama śćviardžała, što skončyła kursy pa padrychtoŭcy televiadučych i atrymała zaprašeńnie na telebačańnie. Niekatory čas pracavała viadučaj rehijanalnych navinaŭ Minskaj vobłaści na BT, adnak, vidać, pryjšłosia zrabić pierapynak u suviazi z naradžeńniem dziciaci. Novy vitok karjera atrymała ŭ 2012 hodzie.
Kaciaryna Tumas-Ciškievič. Fota: skrynšot BT
— Na ANT mianie zaprasili zusim niečakana, — śćviardžała supracoŭnica telekanała. — Znachodziačysia ŭ dekretnym adpačynku, pracavała na paŭstaŭki, vychodziła ŭ efir tolki pa vychodnych. I zusim vypadkova mianie zaŭvažyli.
Chutčej za ŭsio, mieŭ miesca ščaślivy vypadak: u 2012 hodzie z ANT syšli niekalki supracoŭnikaŭ i treba było zakryvać pytańnie z kadrami. Kaciaryna Tumas-Ciškievič stała televiadučaj, nieadnarazova ŭdzielničała ŭ roznych akcyjach telekanała i niekalki razoŭ pradstaŭlała jaho na aficyjnych mierapryjemstvach.
Kaciaryna Tumas-Ciškievič. Vystava «ŚMI Biełarusi». Fota: skrynšot YouTube-kanała ANT
— Ciapier na pieršy płan vychodziać detali, — razvažała Kaciaryna Tumas-Ciškievič jašče da 2020 hoda. — Infarmacyja moža być adnolkavaja, i, zrazumieła, važna, chto pieršym jaje paviedamić. Ale potym pieravaha budzie ŭ taho, chto zdoleje bolš daviedacca pra situacyju. I tut nie ŭsie mohuć «kapać» adnolkava hłyboka.
Hledziačy pa ŭsim, padčas i paśla pratestaŭ prapahandystka, sapraŭdy, stała «kapać» hłyboka. Prajekt «Dzikaje palavańnie» ŭklučyŭ supracoŭnicu dziaržaŭnaha telekanała ŭ svoj śpis z farmuloŭkaj «tvar prapahandysckich siužetaŭ i filmaŭ na ANT pra biełaruskuju apazicyju, kandydataŭ u prezidenty, razhony mirnych akcyj, pra «ŭcioki» siabroŭ Kaardynacyjnaj rady za miažu i pra adsutnaść katavańniaŭ na Akreścina».
Kaciaryna Tumas-Ciškievič padčas akcyi pa vykanańni aficyjnaha himna. Fota: skrynšot YouTube-kanała ANT
Pa źviestkach «Dzikaha palavańnia», muž televiadučaj — Siarhiej Tumas, supracoŭnik Apieratyŭna-analityčnaha centra. Hramadzianskija aktyvisty śćviardžajuć, što «jon adzin z tych, chto adkazvaje za adklučeńnie mabilnaha internetu i źnižeńnie patoku chatniaha internetu, uzłom i błakavańnie sajtaŭ, staronak u sacyjalnych sietkach, Telegram-kanałaŭ, a taksama daje navinavyja siužety i filmy ANT pra apazicyju, kandydataŭ u prezidenty, mirnyja akcyi i Kaardynacyjnuju radu».
Siarhiej Tumas, muž Kaciaryny Tumas-Ciškievič. Fota: «Dzikaje palavańnie»
Niahledziačy na prynaležnaść da publičnaj prafiesii, pra supracoŭnika ANT 46-hadovaha Andreja Mochara ŭ adkrytych krynicach nie tak šmat infarmacyi. Na sajcie telekanała, u pryvatnaści, paviedamlajecca, što ŭ prafiesiju pryjšoŭ pa śladach baćki. Havorka, vidać, pra Kastusia Mochara, jaki ŭsio žyćcio pracavaŭ u hancavickaj rajonnaj haziecie «Savieckaje Paleśsie».
U nulavyja Andrej Mochar byŭ viadomy jak kamientatar snukiera (raznavidnaść biljarda) na ANT, niekatory čas byŭ dydžejem, paśla ŭznačalvaŭ FM-radyjostancyju. U dadzieny momant zajmaje pasadu kiraŭnika dyrekcyi infarmacyjnaha viaščańnia ANT.
— Miarkuju, u našaj prafiesii niemahčyma stać kiraŭnikom i spynić zajmacca žurnalistykaj. Tak nie byvaje. Možna być dobrym mieniedžaram, kiraŭnikom. Ale kali ty nie praktykuješ, ničoha nie atrymajecca, — niejak adznačaŭ supracoŭnik dziaržkanała.
Andrej Mochar. Fota: sb.by
Cikava, što na sajcie telekanała fakt stažyroŭki ŭ ZŠA, Jeŭropie, Kitai i Rasii zhadvajecca jak pazityŭny momant. A kali ŭvažliva čytać intervju Andreja Mochara ŭ praŭładnaj haziecie «SB. Biełaruś siehodnia», to moža zakraścisia dumka: a ci nie dasyłaje supracoŭnik ANT vidavočnyja sihnały?
Uziać chacia b takija jaho słovy:
— Kazać siońnia davodzicca hučniej, choć by dla pryciahnieńnia ŭvahi. Nie ŭpeŭnieny, što ŭ hetaj bitvie moža być pieramožca. Kab vyjhrać, jak vy kažacie, infarmacyjnuju vajnu, treba kab chtości zmoŭk. Tak nie byvaje.
U tym ža tekście jon taksama trapna adznačaŭ, što mižnarodnaja paviestka sastupaje biełaruskaj, bo «ludziam cikava toje, što pobač». U adroźnieńnie ad adyjoznych prapahandystaŭ Andrej Mochar paźbiahaje rezkich acenak i abrazaŭ u dačynieńni da demakratyčnych palitykaŭ i niezaležnych miedyja, niahledziačy na dosyć pravakacyjnyja pytańni aŭtarki tekstu.
— I my siońnia kankurujem, pa sutnaści, sami z saboj. Što ja maju na ŭvazie? Na našym telerynku, dzie vialiki ŭpłyŭ rasijskich kanałaŭ, jakija vyrablajuć jakasny pradukt, my zmahajemsia za ŭvahu hledača ź imi. Nie z kalehami ź Biełarusi, a z kalehami ź vialikich rasijskich kanałaŭ. Ź biudžetami, vopytam i mahutnaj škołaj, — a ŭ hetaj cytacie ŭvohule možna pabačyć zaniepakojenaść rasijskim upłyvam.
Prapahandystka novaha pakaleńnia
Palityčnaja ahladalnica dyrekcyi infarmacyjnaha viaščańnia STB Volha Koršun ujaŭlaje saboj novuju farmacyju prapahandystaŭ, jakija nie pasaromielisia rabić karjeru na fonie padziejaŭ u 2020 hodzie. Stupieńki jaje słužbovaj leśvicy składajucca ź liślivych słoŭ na adras ułady, abureńnia Zachadam, paklopu ŭ bok «źbiehłych žurnalistaŭ».
— U žurnalistyku ja pryjšła adrazu paśla zakančeńnia fakulteta žurnalistyki BDU, — raskazvała pra pačatak pracy na prapahandu Volha Koršun. — Moj adnakurśnik pracavaŭ na STB i padkazaŭ, što tam jak raz šukali čałavieka na miesca redaktara mižnarodnaj słužby. Nie było harantyj, što mianie voźmuć, ale vielmi chaciełasia pasprabavać.
Dziaŭčyna pryjšła na dziaržaŭny telekanał u sakaviku 2011 hoda i pracuje na im užo bolš za 10 hadoŭ.
— Pieršapačatkova maja zadača składałasia ŭ padrychtoŭcy mižnarodnych dajdžestaŭ, — spačatku prapahandystka była ŭ STB na druhich rolach. — Trochu paźniej padklučylisia i abaviazki redaktara rehijanalnaj słužby. Heta značyć pieršyja niekalki hadoŭ ja pracavała za kadram, mantavała čužyja siužety i manitoryła mižnarodnuju abstanoŭku.
Pavodle samoj Volhi Koršun, prasoŭvać uvierch jaje stali byłyja kiraŭniki telekanała Kirył Kazakoŭ i Ihar Słucki. Tak supracoŭnica STB stała viadučaj navinaŭ, paśla pracavała ŭ łukašenkaŭskim pule, viała prahramu «V ludiach». Ciapier vystupaje na pieršych rolach u aŭtarskim prajekcie «Niediela».
Volha Koršun. Fota: STB
— Našy apanienty časta paprakajuć dziaržaŭnyja ŚMI ŭ tym, što my nibyta pakazvajem dabratvornuju karcinku i nie havorym ab prablemach. Heta mierkavańnie absalutna anhažavanaje. My ŭ kožnym vypusku padymajem vostryja sacyjalnyja temy, — apraŭdvałasia Volha Koršun u intervju «SB. Biełaruś siehodnia».
Adnak kali jana pasprabavała źviarnucca da faktury, to zrabiła tolki horš, zhadaŭšy incydent u Mačuliščach (u lutym 2023 hoda tam byŭ paškodžany rasijski vajenny samalot, i niekatory čas prapahanda nie zaŭvažała hety vypadak):
— Nas paprakali ŭ tym, što ŭ čarhovym vypusku «Niedieli» my ničoha nie skazali pra toje, što zdaryłasia, nibyta ŭtaili. Ale my nie skazali, bo nie było nivodnaha aficyjnaha kamientara. Što kazać? Raspaŭsiudžvać čarhovyja čutki i zdahadki? Byŭ incydent ci nie było? Paŭtarusia, faktčekinh dla nas na pieršym miescy.
Kali surjozna čytać intervju Volhi Koršun, to mimavoli ŭźnikaje pytańnie: ci heta žyvy čałaviek, jaki pramaŭlaje svaje dumki? Chutčej aŭdyjozapis, jaki ŭklučyŭ prapahandysckija naratyvy: Amieryka dyktuje jak žyć Polščy, «źbiehłyja žurnalisty» pieravaročvajuć našyja naviny, kali ŭžo skončycca pieraśled pa prafiesijnym pryncypie (darečy, kali?).
— Situacyja 2020 hoda ŭsich nas, žurnalistaŭ u tym liku, źmianiła, — vidavočna, što Volha Koršun pamyłkova pryličvaje siabie da žurnalistaŭ. — My stali zubaściejšymi, śmialej adstojvajem svoj punkt hledžańnia i ŭžo nie majem iłžyvych iluzij u dačynieńni da našych apanientaŭ, jakija viaduć adkrytuju infarmacyjnuju vajnu z nami.
Viadoma, što žančyna zamužam. Jaje suženiec — kanaist Dźmitryj Traciakoŭ.
Dźmitryj Traciakoŭ, muž Volhi Koršun. Fota: skrynšot z YouTube-kanała BT
Čytajcie taksama:
«Biełarus biełarusu biełarus». Marzaluk u Azaronka cytavaŭ Vitolda Ašurka
EHU budzie pryznany «ekstremisckaj» arhanizacyjaj — ANT
Byłaja prapahandystka STB, jakaja šukała pracu ŭ IT, vydaliła svoj akaŭnt u Linkedin
Žurnalist zadavaŭ tupyja pytańni milicejskamu načalniku. Tamu daviałosia na ich adkazvać
