«Biełavija» źmianiła praviły pravozu ručnoj pakłažy i bahažu
Avijakampanija «Biełavija» źmianiła praviły pravozu ručnoj pakłažy, paviedamili ŭ pres-słužbie kampanii. U pryvatnaści, u samalotach zabaroniać pieravozić dadatkova da ručnoj pakłažy partpledy i tavary z mahazinaŭ biaspošlinnaha handlu djuci-fry.
Fota: belavia.by
Hetyja rečy pasažyr zaraz budzie abaviazany ci spakavać u najaŭnuju ručnuju pakłažu, ci zdać u bahaž. Tolki kali pasažyr lacić biez ručnoj pakłažy, to partpled možna budzie vieźci ŭ sałonie.
Akramia taho, u «Biełavija» pačnuć markiravać bahaž pasažyraŭ roznakalarovymi birkami, jakija vydaduć na rehistracyi abo pry vychadzie na pasadku. Birki buduć adroźnivacca pa typu raźmiaščeńnia ŭ sałonie.
Siniuju birku vydaduć dla čamadana na kołach abo bujnoj sumki (ručnoj pakłažy). Pry hetym norma ručnoj pakłažy nie pavinna pieravyšać 10 kiłahramaŭ, a habaryty — paramietry 55ch40ch25 santymietraŭ. Ručnaja pakłaža pavinna być raźmieščanaja na vierchnich bahažnych palicach u sałonie samalota.
Zialonyja birki paviesiać na zaplečniki i žanočyja sumki. Ich habaryty nie pavinny pieravyšać 40 na 30 na 10 santymietraŭ, a vaha — 10 kiłahramaŭ. Hetuju pakłažu raźmiaščajuć pad siadzieńniem kresła, jakoje znachodzicca pierad pasažyram.
Na bahažnych palicach sumki ź zialonymi birkami možna budzie raźmiaścić tolki tady, kali tam buduć volnyja miescy. U prachodach abo kala avaryjnych vychadaŭ ručnuju pakłažu ŭ samalocie raźmiaščać zabaroniena.
Jak adznačyli ŭ kampanii, źmieny źviazanyja ź mižnarodnymi patrabavańniami biaśpieki na borcie, a taksama dla kamfortu samich pasažyraŭ.
«Za pravilnym raźmiaščeńniem ručnoj pakłažy na borcie buduć sačyć bortpravadniki», — adznačyli ŭ pres-słužbie «Biełavija».
Novyja ŭmovy pravozu ručnoj pakłažy, zaćvierdžanyja «Biełavija», pačnuć dziejničać z 15 maja.
Čytajcie taksama:
Nas čakaje bolš stresaŭ u palotach: z-za źmieny klimatu turbulentnaść stanovicca bolš častaj źjavaj
