Jak nabyć patrymanaje aŭto i nie dać siabie padmanuć
Padborka parad i papularnych servisaŭ, jakija dapamohuć pravieryć aŭto pry kupli.
Ilustracyjny zdymak. Fota: «Naša Niva»
Važna viedać sapraŭdny numar kuzava
Na žal, natknucca na padman pry kupli aŭto vielmi prosta. Pryčym padmanvajuć nie tolki pierakupy i pierahonščyki, ale i šarahovyja aŭtaamatary.
Najlepšy sposab daviedacca pra historyju aŭtamabila — prabić jahony VIN-numar. Bolšaść pradaŭcoŭ paznačaje jaho ŭ admysłovym poli pry padačy abjavy, ale mnohija iduć na chitryki i pakidajuć pamyłkovy numar. Inšym prosta lanota ŭpisvać sapraŭdnyja litary i ličby, tamu jany biaruć ich z hałavy.
Praz heta pierad tym, jak vyjazdžać na ahlad, nie lišnim budzie paprasić pradaŭca vysłać zdymak techpašparta abo tablički vytvorcy, kab vy mahli ŭbačyć hetyja 17-simvałaŭ nie tolki ŭ abjavie.
Kali pradaviec admaŭlajecca heta zrabić, to heta ŭžo kiepski zvanočak. Asabliva, kali razmova idzie pra adnosna śviežyja aŭtamabili.
Prafiesijnyja handlary dobra viedajuć, što, majučy sapraŭdny VIN-numar mašyny, možna atrymać šmat infarmacyi pra jaje minułaje. Tamu mohuć nie prosta paznačyć u abjavie pamyłkovy numar, a adšukać pa bazach maksimalna padobny pa charaktarystykach aŭtamabil i paznačyć u abjavie jaho danyja. U pieršuju čarhu heta aktualna dla aŭto, jakija nabyvajuć na aŭkcyjonach Jeŭropy, ZŠA i Karei.
Google u dapamohu
Kab daviedacca, u jakim stanie i ź jakim prabieham aŭtamabil byŭ pradadzieny na zamiežnym aŭkcyjonie, dastatkova ŭvieści VIN u pošukavik. Heta asabliva aktualna dla aŭto sa Štataŭ. Kali pry ŭvodzie vinu numara ni zvyčajny pošuk, ni pošuk pa vyjavach nie daje vynikaŭ, to heta nie vielmi dobry znak, jaki moža pakazvać na toje, što pradaviec za hrošy vyčyściŭ historyju ź internetu, a značyć jamu jość, što chavać.
Ilustracyjny zdymak. Fota: «Naša Niva»
Kali mašyna sa Štataŭ nie prabivajecca praz pošukaviki, možna nabyć płatnuju spravazdaču Carfax. U joj niama fota aŭtamabila, ale tam zachoŭvajucca danyja ab najaŭnaści avaryjnaha minułaha i vizitach na STA z ukazańniem prabiehu. Patračanyja hrošy na Carfax dapamohuć vam nie nabyć aŭto paśla zatapleńnie. Takija mašyny čaściakom pradajuć pad vidam biezavaryjnych aŭto sa Štataŭ, papiarednie vydaliŭšy infarmacyju ź internetu.
Dla śviežych aŭto ź Jeŭropy prabiŭka pa VIN praz pošukavik taksama karysnaja reč, ale ŭ adroźnieńni ad mašyn z ZŠA daloka nie ŭsie mašyny ź ES pradajucca praz aŭkcyjony.
Kali zvyčajny «huhlož» nie daje vynikaŭ, možna pasprabavać uvieści vin u pošuk na takich sajtach, jak vf.vin, vinfax.site.
Za hrošy možna pravieryć mašynu praź biełaruski servis ka.by abo ahulnajeŭrapiejski Carvertical.
Ilustracyjny zdymak. Fota: «Naša Niva»
Daviedacca pra historyju absłuhoŭvańnia, a razam z hetym pravieryć praŭdzivaść pakazalnikaŭ prabiehu, možna, źviarnuŭšysia z płatnym zapytam da aficyjnaha dylera marki.
Viedać sapraŭdny VIN varta jašče i dla taho, kab upeŭnicca ŭ tym, jakaja kamplektacyja ŭ aŭtamabila, a taksama jaki ŭ jaho dakładny hod vypusku.
Pradaŭcy čaściakom pakazvajuć u abjavie nie sapraŭdny hod vypusku, jaki ŭkazany ŭ techpašparcie, a bolš śviežy. Taksama byvaje kali ŭ abjavie paznačany abjom ruchavika 2 litry, a na spravie ŭ mašyny pad kapotam ruchavik abjomam 1,6 litra.
Ilustracyjny zdymak. Fota: «Naša Niva»
Historyja ŭ Biełarusi
Dla pravierki historyi transpartu, jaki doŭha ekspłuatujuć u Biełarusi, dobra padychodzić płatny servis ad av.by. Taksama servis ad «Aŭtamalinaŭki» zachoŭvaje infarmacyju pra staryja abjavy ab prodažy aŭto na ich sajcie, heta dazvalaje ŭbačyć, ź jakim prabieham, u jakim stanie i za jakija hrošy mašynu pradavali raniej. Kaniešnie, pry ŭmovie, što ŭ papiarednich abjavach pradaŭcy pakazvali sapraŭdny numar kuzava. Aproč hetaha, u im budzie historyja DTZ na terytoryi Biełarusi, historyja prachodžańnia techahladaŭ z pakazańniem prabiehu i šmat inšaha.
