Łukašenka padpisaŭ novy represiŭny zakon. Siarod inšaha ŭvodziać adkaznaść za «dyskredytacyju Uzbrojenych sił i inšych vajenizavanych arhanizacyj»
Zakon «Ab źmianieńni kodeksaŭ pa pytańniach kryminalnaj adkaznaści» maje zajaŭlenaj metaj «uzmacnieńnie procidziejańnia złačynstvam ekstremisckaj (terarystyčnaj) i antydziaržaŭnaj nakiravanaści».
Hetym zakonam praduhledžvajecca raspaŭsiudžvańnie kryminalnaj adkaznaści za zdradu dziaržavie, ździejśnienuju słužbovaj asobaj, na ŭsich asob, jakija zajmajuć dziaržaŭnyja pasady. Pry hetym, kali «zdradzić dziaržavie» dziejnaja słužbovaja asoba ci vajskoviec, to jaho mohuć pakarać i śmierciu.
Za «šerah złačynstvaŭ antydziaržaŭnaj nakiravanaści» ciapier buduć spahaniać drakonaŭskija štrafy — u pamiery da 50 tys. bazavych vieličyń (heta da bolš za 700 tysiač dalaraŭ).
Pavodle rasijskaha ŭzoru ŭvodzicca kryminalnaja adkaznaść za «prapahandu teraryzmu, dyskredytacyju Uzbrojenych sił, inšych vojskaŭ i vajskovych farmavańniaŭ, vajenizavanych arhanizacyj», a taksama za «parušeńnie patrabavańniaŭ pa abaronie dziaržaŭnych sakretaŭ».
Termin zatrymańnia asob, jakija padazrajucca ŭ ździajśnieńni zdrady dziaržavie, zmovie ci inšych dziejańniach z metaj zachopu dziaržaŭnaj ułady, špijanažy i ahienturnaj dziejnaści, pavialičvajuć z troch da dziesiaci sutak.
U toj ža čas praduhledžvajecca vyzvaleńnie ad kryminalnaj adkaznaści asob, jakija «ažyćciaŭlali padrychtoŭku da napadu na ŭstanovy, jakija karystajucca mižnarodnaj abaronaj, abo da ździajśnieńnia dyviersii, ale jakija admovilisia ad svaich namieraŭ i jakija akazali sadziejničańnie ŭ praduchileńni nazvanych złačynstvaŭ».
Taksama, jak zajaŭlena, u Kryminalna-pracesualny kodeks unosiacca asobnyja karekciroŭki, abumoŭlenyja praktykaj jaho prymianieńnia.
