Kolkaść achviar ziemlatrusu ŭ Turcyi i Siryi pieravysiła 4310 čałaviek
Na bolšaj častcy poŭdnia Turcyi i poŭnačy Siryi ŭsiu noč praciahvałasia ratavalnaja apieracyja paśla dvuch mahutnych ziemlatrusaŭ, u vyniku jakich zahinuła bolš za 4300 čałaviek.
Fota AP
Pieršy ziemlatrus mahnitudaj 7,8 bałaŭ adbyŭsia ŭ 04:17 pa miascovym časie, ačah zalahaŭ na hłybini 17,9 km pablizu horada Hazijantep na paŭdniovym uschodzie Turcyi. Za im było bolš za 40 afteršokaŭ.
Zatym prykładna ŭ 13:30 pa miascovym časie adbyŭsia druhi ziemlatrus mahnitudaj 7,5. Jaho epicentr znachodziŭsia ŭ rajonie Elbistan u paŭdniova-ŭschodnim tureckim rehijonie Kachramanmaraš.
Achviarami ziemlatrusu stali bolš za 4310 čałaviek. Tolki ŭ Turcyi paśla pieršaha ziemlatrusu zahinuła bolš za 2900 čałaviek, bolš za 15 000 atrymali ranieńni. U susiedniaj Siryi zahinuła bolš za 1400 čałaviek.
Usiu noč praciahvałasia ratavalnaja apieracyja pa pošuku ludziej, jakija apynulisia pad zavałami paśla abvalvańnia tysiač budynkaŭ u abiedźviuch krainach.
Krainy, uklučajučy ZŠA i Paŭdniovuju Kareju, adpraŭlajuć u rehijon dapamohu paśla taho, jak Turcyja źviarnułasia z zaklikam pra heta.
Prezident Čyrvonaha Paŭmiesiaca Kierem Kinik paprasiŭ ludziej nie jeździć na svaich aŭtamabilach u zony ziemlatrusu, kab achviaravać humanitarnuju dapamohu. Biaśpiečniej pryvozić koŭdry, ciopłuju vopratku i abutak u punkty zboru, adkul potym jany buduć dastaŭlenyja ŭ paciarpiełyja rehijony.
«Aŭtamabili pravalilisia ŭ 50-mietrovy razłom na darozie. Na darohach śnieh i hałalod», — papiaredziŭ jon.
Marazy, śnieh i doždž abciažarvajuć pošuk tych, chto vyžyŭ pad abłomkami pavalenych budynkaŭ. Sa słoŭ vidavočcaŭ, jany čujuć hałasy ludziej z-pad ruin.
