Džonsan raspavioŭ pra pahrozy z boku Pucina pierad pačatkam vajny
Były premjer-ministr Brytanii Borys Džonsan u dakumientalnym filmie Bi-bi-si raspavioŭ, što rasijski prezident Uładzimir Pucin pahražaŭ jamu rakietnym udaram padčas telefonnaj razmovy napiaredadni ŭvarvańnia Rasii va Ukrainu.
Fota: AP
Film, u jakim raspaviadajecca ab uzajemadziejańni Pucina z suśvietnymi lidarami pierad pačatkam vajny, vyjdzie ŭ efir u paniadziełak uviečary.
«U niejki momant jon jak by pryhraziŭ mnie i skazaŭ: «Borys, ja nie chaču pryčyniać tabie bol, ale z rakietaj heta zojmie ŭsiaho chvilinu», ci niešta ŭ hetym duchu», — pracytavaŭ Džonsan słovy Pucina.
Doŭhaja telefonnaja razmova adbyłasia ŭ lutym minułaha hoda, a kamientar Pucina prahučaŭ paśla papiaredžańnia Džonsana ab tym, što vajna va Ukrainie budzie mieć katastrafičnyja nastupstvy.
«Ja dumaju, što, miarkujučy pa jaho [Pucina] vielmi spakojnym tonie, pa tym admiežavańni, jakoje ŭ jaho było, jon prosta padyhryvaŭ maim sprobam schilić jaho da pieramoŭ», — skazaŭ eks-premjer.
Džonsan taksama sprabavaŭ danieści da rasijskaha prezidenta, što Ukraina ŭ najbližejšy čas nie ŭstupić u NATA, i papiaredziŭ jaho, što luboje ŭvarvańnie budzie aznačać «bolš NATA, a nie mienš NATA» la miežaŭ Rasii.
«Jon skazaŭ: «Borys, vy kažacie, što Ukraina nie źbirajecca ŭstupać u NATA ŭ najbližejšy čas. Što značyć u najbližejšy čas?» I ja skazaŭ: «Nu, jana nie źbirajecca ŭstupać u NATA ŭ ahladnaj budučyni. Vy heta vydatna viedajecie».
Nieviadoma, nakolki surjoznymi byli pahrozy z boku Pucina, ale, uličvajučy papiarednija napadki Rasii na Vialikabrytaniju, u tym liku atručvańnie Skrypaloŭ u Sołśbiery, lubaja pahroza z boku rasijskaha lidara, vierahodna, usprymałasia Džonsanam surjozna, adznačajuć karespandenty Bi-bi-si.
