U Hiermanii prajšła maštabnaja śpiecapieracyja suprać sietki, jakaja płanavała dziaržaŭny pieravarot. Ëść rasijski śled
U Niamieččynie śpiecyjalnyja palicejskija siły ŭ sieradu pravodziać śpiecapieracyju adnačasova ŭ 11 fiederalnych ziemlach suprać pravaekstremisckaj arhanizacyi, jakaja płanavała vykradać palitykaŭ i šturmavać Bundestah. Pra heta stała viadoma vydańniu Der Spiegel.
Pa daručeńni hienieralnaha prakurora i Fiederalnaha ŭpraŭleńnia kryminalnaj palicyi pravaachoŭniki zatrymali 25 mužčyn i žančyn, jakija, vierahodna, naležali da pravaj terarystyčnaj arhanizacyi abo padtrymlivali jaje.
Pieratrusy prachodziać u bolš čym 130 kvaterach, ofisach i składskich pamiaškańniach, uklučajučy kazarmy kamandavańnia sił śpiecyjalnaha pryznačeńnia ŭ Kalvi ŭ Baden-Viurtembierhu.
Uvohule 52 padazravanych znachodziacca pad śledstvam za členstva abo padtrymku terarystyčnaj arhanizacyi.
Heta adna z najbujniejšych palicejskich apieracyj takoha kštałtu, jakija kali-niebudź pravodzilisia ŭ Hiermanii.
Ranicaj u sieradu bolš za 3000 palicejskich pravodzili roznyja dziejańni ŭ Baden-Viurtembierhu, Bavaryi, Saksonii, Hiesenie i Ciurynhii. Aficery taksama byli nakiravanyja ŭ Aŭstryju i Italiju. Mierkavanaja pravaja terarystyčnaja hrupa nabirałasia pieravažna z pradstaŭnikoŭ arhanizacyi tak zvanych «hramadzian Rejcha».
«Hramadzianie Rejcha» nie pryznajuć isnujučy ŭ Hiermanii dziaržaŭny ład i chočuć zamianić jaho na niedemakratyčnuju sistemu. Vierahodna, što ŭ ich radykalizacyi adyhrała svaju rolu kanśpirałahičnaja ideałohija QAnon, jakuju padzialała častka tych, chto napadaŭ na Kapitolij ZŠA ŭ Vašynhtonie ŭ studzieni 2021 hoda.
Pavodle vysnovaŭ śledstva, padazravanyja ź listapada 2021 hoda płanavali ŭzbrojeny napad na Bundestah i zachop palitykaŭ. Ličycca, što napadniki raźličvali na pačatak biesparadkaŭ u vyniku ich dziejańniaŭ i na «pieravarot» u Hiermanii.
Pa słovach abvinavačvańnia, mužčyn i žančyn abjadnoŭvała hłybokaje nieprymańnie dziaržaŭnych instytutaŭ i demakratyi ŭ Hiermanii, tamu jany, vierahodna, płanavali ažyćciavić źmienu ŭłady siłaj.
Nahadajem, 2 śniežnia ŭ Niamieččynie śpiecsłužby papiaredzili pra ryzyku dyviersij na krytyčnaj infrastruktury.
