Eks-prezidenta Arhienciny Kryścinu Kiršnier asudzili na šeść hadoŭ turmy
Sud u Buenas-Ajresie pryznaŭ vice-prezidenta Arhienciny, byłoha prezidenta krainy (2007—2015) Kryścinu Fiernandes de Kiršnier vinavataj u machlarstvie i prysudziŭ jaje da šaści hadoŭ pazbaŭleńnia voli, paviedamlaje meduza.io. Joj taksama pažyćciova zabaranili zajmać dziaržaŭnyja pasady.
Jak adznačyli advakaty, u siłu svajoj pasady jana nie budzie ŭziataja pad vartu datul, pakul nie pierastanie być vice-prezidentam Arhienciny. Jak čakajecca, Kryścina de Kiršnier abskardzić prysud (hetak ža zrobić prakuratura). Pa acency advakataŭ, sudovy praces moža zaciahnucca na hady — i budzie praciahvacca nie mienš troch hadoŭ.
Vice-prezidenta Arhienciny abvinavačvali ŭ machlarstvie i złačynnaj zmovie pry arhanizacyi darožnych rabot u pravincyi Santa-Krus. Pa vyniku sud źniaŭ abvinavačvańni ŭ zmovie.
Pa viersii abvinavačvańnia, urad Arhienciny pad ciskam Kryściny Kiršnier zaklučyŭ kantrakty z kampanijami biznesmiena Łasara Bajesa, jaki pieradavaŭ hrošy Kiršnier i jaje niabožčyku mužu, Niestaru Kiršnieru, taksama byłomu prezidentu Arhienciny. Bajesa prysudzili da šaści hadoŭ pazbaŭleńnia voli.
Kryścina Fiernandes de Kiršnier, kamientujučy prysud, zajaviła ab «sudovaj mafii». Jana paabiacała, što ŭ 2023 hodzie, kali ŭ krainie projduć vybary, jana nie stanie ni na što pretendavać. Pavodle jaje słoŭ, jana sydzie ŭ adstaŭku, kali ŭ śniežni 2023-ha skončycca termin paŭnamoctvaŭ ciapierašniaha ŭrada.
