Na Havajach pačaŭ vyviarhacca najbujniejšy ŭ śviecie dziejny vułkan
Pa źviestkach Hieałahičnaj słužby ZŠA, najbujniejšy ŭ śviecie dziejny vułkan Maŭna-Łoa vyviarhaje popieł i abłomki. Jak paviedamlaje Bi-bi-si, vyviaržeńnie pačałosia pozna ŭviečary ŭ niadzielu.
Hieałahičnaja słužba ZŠA ŭ paniadziełak paviedamiła, što płyni łavy znachodziacca ŭ rajonie viaršyni i nie pahražajuć blizkim nasielenym punktam. Adnak, pa słovach pradstaŭnika słužby Miela Korbieta, niemahčyma pradkazać, jak doŭha vułkan budzie vyviarhacca i ci moža łava paciačy na nasielenyja punkty vostrava.
Ahienctva hramadzianskaj abarony zajaviła, što adkryła prytułki z-za paviedamleńniaŭ pra samaevakuacyju ludziej uzdoŭž uźbiarežža Paŭdniovaj Kony.
Maŭna-Łoa — adzin ź piaci vułkanaŭ, jakija składajuć Vialiki vostraŭ Havai, što źjaŭlajecca samym paŭdniovym vostravam Havajskaha archipiełaha. Maŭna-Łoa ŭzvyšajecca na 4169 mietraŭ nad uzroŭniem mora i značna bujniejšy za susiedni vułkan Kiłaŭea, vyviaržeńnie jakoha adbyłosia ŭ žyłym rajonie i źniščyła 700 damoŭ u 2018 hodzie.
Niekatoryja sa schiłaŭ Maŭna-Łoa našmat bolš stromkija, čym u Kiłaŭea, tamu, kali jon vyviarhajecca, jahonaja łava moža ciačy našmat chutčej. Padčas vyviaržeńnia 1950 hoda łava pieramiaściłasia na 24 km da akijana mienš čym za try hadziny.
Apošni raz vułkan Maŭna-Łoa vyviarhaŭsia ŭ 1984 hodzie.
