New York Times: Zachodniaja artyleryja, pastaŭlenaja Ukrainie, časta łamajecca z-za intensiŭnaści jaje vykarystańnia
Žurnalisty New York Times, spasyłajučysia na amierykanskija i ŭkrainskija krynicy, śćviardžajuć, što prykładna tracina z 350 zachodnich haŭbic, jakija adpravilisia va Ukrainu, pastajanna znachodzicca ŭ nieprydatnym dla viadzieńnia bajoŭ stanie.
Ukrainskija artylerysty pad Bachmutam. Fota: AP Photo/LIBKOS
Jość infarmacyja, što USU vykarystoŭvajuć ad dvuch da čatyroch tysiač snaradaŭ u dzień. Rasijskija vojski robiać jašče bolš artyleryjskich strełaŭ. Ale takija tempy vykarystańnia haŭbic pryvodziać da ich chutkaha znosu.
U publikacyi pryvodziacca ŭ prykład pastaŭlenyja ZŠA Ukrainie M-777. Dakładnaść i dalokaść ich stralby stanovicca nižejšaj, tamu davodzicca mianiać stvały. Na poli boju heta nie robicca, tamu haŭbicy pieravoziać na ramont u Polšču.
Aficyjnyja pradstaŭniki NATA admaŭlalisia kamientavać hetuju situacyju. Adnak jany paćviardžali, što zachodnija krainy robiać usio mahčymaje, kab padtrymać ukrainskuju zbroju ŭ bajazdolnym stanie.
Žurnalisty adznačajuć, što znos haŭbic zbolšaha tłumačycca asablivaściami ich kanstrukcyi. Pryłady zroblenyja ŭ asnoŭnym z tytanu. Jon značna lahčejšy za stal, adnak sastupaje joj pa tryvałaści. Zatoje takuju artyleryju našmat praściej pierasoŭvać i rychtavać da boju.
Kali Štaty vykarystoŭvali hetyja haŭbicy padčas kanfliktaŭ u Iraku i Afhanistanie ŭ pačatku nulavych, to kolkaść strełaŭ i intensiŭnaść stralby byli našmat mienšyja.