«Jon zapomnicca ščyraj pracaj na dyktatara». Valer Kavaleŭski nazvaŭ Makieja častkaj represiŭnaha režymu
Pradstaŭnik pa mižnarodnych spravach Abjadnanaha pierachodnaha kabinieta Valer Kavaleŭski prakamientavaŭ «Biełsatu» paviedamleńnie pra śmierć kiraŭnika MZS Uładzimira Makieja. Kavaleŭski adznačyŭ, što ministr zapomnicca tolki ščyraj pracaj na Łukašenku, a sapraŭdnuju pryčynu śmierci čynoŭnika nichto nie skaža.
Pradstaŭnik pa mižnarodnych spravach Abjadnanaha pierachodnaha kabinieta, były dypłamat Valer Kavaleŭski zajaviŭ, što kiraŭnik MZS Biełarusi Uładzimir Makiej zastaniecca ŭ historyi «nieadjemnaj častkaj represiŭnaha režymu». Kavaleŭski miarkuje, što ŭsiu pracu ministra pierakreśliła toje, što ŭ 2020 hodzie jon nie pierajšoŭ na bok naroda.
«Makiej za ŭvieś čas pracy na Łukašenku, i asabliva za apošnija dva hady, zapomniŭsia tym, jak ščyra jon pracavaŭ na dyktatara, vielmi časta rabiŭ heta za košt biełaruskich nacyjanalnych intaresaŭ, za košt biełaruskaści, ludskich losaŭ. Toj pierałomny momant, jaki zrabiŭ jaho sapraŭdy antybiełaruskim palitykam, zdaryŭsia ŭ žniŭni 2020 hoda, kali jon zastaŭsia z dyktataram i praciahnuŭ jamu słužyć», — skazaŭ Valer Kavaleŭski ŭ intervju «Biełsatu».
Kavaleŭski ŭpeŭnieny, što pazicyjaniravańnie Makieja jak intelihientnaha prazachodniaha palityka, jaki zjaŭlaŭsia na publicy ŭ vyšyvancy, było hulnioju i manipulacyjaj z hramadskim mierkavańniem.
«Heta nie było ščyra, heta byli manipulacyi z hramadskim mierkavańniem. Kali čałaviek paśladoŭny, sapraŭdy vieryć u biełaruskaść, padtrymlivaje jaje, to jak jon moh tak kruta źmianić svaje mierkavańni ŭ 2020 hodzie, kali faktyčna ŭsio biełaruskaje pačało zabaraniacca?» — zaznačyŭ Kavaleŭski.
Pradstaŭnik Kabinieta źviarnuŭ uvahu na toje, što dla dziaržaŭnych miedyja śmierć ministra nie stała top-navinoj. Naprykład, na sajcie ahienctva BiełTA publikacyja pra Makieja staić pobač z prahnozam nadvorja, a dla Biełteleradyjokampanii jaje spačuvańni bolš važnyja, čym ułasna navina pra skon čynoŭnika.
«Narodnaja reakcyja trapnaja ŭ tym, što słužka režymu Łukašenki syšoŭ. My bačym, jak padajecca hetaja navina ŭ dziaržaŭnych krynicach: vielmi ścisła, vielmi strymana, biez detalaŭ. Heta hublajecca dzieści ŭ navinavych stužkach, nibyta heta takaja šarahovaja navina. Heta śviedčańnie taho, jak režym stavicca da ludziej, navat da tych, jakija vierna słužać dyktataru», — skazaŭ surazmoŭca «Biełsatu».
Jon upeŭnieny, što ciapier treba čakać kanśpirałahičnyja viersii zdareńnia, bo sapraŭdnyja pryčyny śmierci ŭłady nie raskryjuć.
«Naturalna, što nichto nie pavieryć aficyjnaj viersii, bo režym nikoli nie kazaŭ nam praŭdu. Apošnim časam hetaja niapraŭda stanovicca bolš vidavočnaj. Narmalna ŭsprymaju toje, što zaraz budzie šmat dumak pra toje, što adbyłosia, čamu adbyłosia i što heta moža aznačać. Zaŭsiody tak budzie, kali budzie niedachop infarmacyi. A ŭ hetym vypadku niedachop infarmacyi prosta praduhledžany», — adznačyŭ Kavaleŭski.
Na pytańnie pra toje, chto moža zamianić Makieja na pasadzie kiraŭnika ministerstva zamiežnych spraŭ, pradstaŭnik Kabinieta adkazaŭ, što proźvišča hetaj asoby niavažnaje, bo jana budzie pryznačanaja nielehitymnaj uładaj.
«Hetaja asoba nie budzie adstojvać intaresy biełaruskaha naroda, nacyjanalnyja intaresy dziaržavy. Heta budzie antybiełaruskaja asoba, antyhumanist. Hodnych asobaŭ, jakija piakucca pra Biełaruś, tam nie budzie. Heta budzie čarhovy haječny kluč u rukach Łukašenki, jaki budzie słužyć tolki jamu, a nie krainie», — padsumavaŭ Valer Kavaleŭski.
Pra skon Uładzimira Makieja ścisła paviedamiła ahienctva BiełTA. Pavodle infarmacyi «Našaj nivy», jon pamior ad infarktu ŭdoma ŭ Drazdach. Aficyjna pryčyna pakul nie ahučvałasia.
Makieju było 64 hady. Apošnija 10 hadoŭ uznačalvaŭ ministerstva zamiežnych spraŭ, dahetul 4 hady byŭ kiraŭnikom administracyi prezidenta.
