Minčuka asudzili za kamientary na «chatniuju chimiju». I jon pavinien vypłacić bolš za 10 000 rubloŭ
U sudzie Centralnaha rajona Minska ahučyli prysud 41-hadovamu Andreju Kaściukieviču. Bok dziaržabvinavačańnia padtrymaŭ prakuror Cimafiej Ničyparuk, paviedamlaje «Viasna».
Sudździa Viktoryja Šabunia pryznała minčuka vinavatym pavodle art. 369 Kryminalnaha kodeksa («Abraza pradstaŭnika ŭłady») za niekalki kamientaroŭ i asudziła da 2,5 hadoŭ abmiežavańnia voli biez nakiravańnia ŭ PUAT — «chatniaj chimii». Adnak razam z tym mužčyna musić vypłacić piaci paciarpiełym 9500 rubloŭ. Taksama — apłacić dziaržpošlinu ŭ pamiery 576 rubloŭ.
U Andreja dvoje dziaciej. Da suda jon znachodziŭsia na voli, mužčyna byŭ zatrymany z 5 pa 7 lipienia 2022 hoda.
Kaściukieviča pryznali vinavatym u tym, što ciaham kastryčnika-śniežnia 2020-ha i ŭ studzieni 2021 hoda jon pakinuŭ niekalki kamientaroŭ u bok słužbovych asobaŭ, jakija tyja rascanili jak abrazu. Jon pakidaŭ kamientary ŭ supołkach «Čat hruppy Karatieli», «Łuchtovikinhi», «Čat Elechtarata», «Tribuna.com Chat» pad zapisami sa źviestkami paciarpiełych.
Paciarpiełymi pa spravie prachodzili dzieviać čałaviek.
Zhodna z rašeńniem suda, abvinavačany musić kampiensavać maralnuju škodu ŭsim u vyznačanym pamierach. Milicyjantu AMAP Savienku jon musić vypłacić 1000 rubloŭ, sałdatu vajskovaj čaści 3032 MUS Kraŭčanku — 1500 rubloŭ, pieršamu namieśniku ministra MUS, načalniku kryminalnaj milicyi Kazakieviču — 2000 rubloŭ, inśpiektaru pa spravach niepaŭnaletnich u Bierazinie Sachančuku — 2000 rubloŭ, namieśnicy adździeła tyłavoha zabiaśpiečańnia «Turmy №8» Višnieŭskaj — 1000 rubloŭ, supracoŭniku Maładziečanskaha AUS Puzyrovu — 2000 rubloŭ. Kursant Vajennaj akademii Stadnik, inśpiektar pa spravie niepaŭnaletnich u Maładziečnie Vajtko, milicyjant AMAP Skaražonak nie vystaŭlali pazovy ab kampiensacyi maralnaj škody.
Kaściukievič całkam pryznaŭ vinu i raspavioŭ, što dziejničaŭ emacyjna i nieabdumana pad upłyvam sacsietak. Taksama jon padkreśliŭ, što nie mieŭ peŭnych metaŭ. Usie paciarpiełyja byli ŭpeŭnienyja, što kamientary źnievažajuć ich honar i hodnaść, a taksama padryvajuć siarod asobaŭ, jakija pračytajuć kamientary, ichni asabisty aŭtarytet i aŭtarytet orhanaŭ unutranych spraŭ ahułam.
Kožny kamientar prajšoŭ ekśpiertyzu, jakuju praviała dziaržaŭnaja śpiecyjalistka D. Tałałajeva. Zhodna ź jaje vysnovami, u kamientarach jość «nienarmatyŭnyja formy moŭnaha vykazvańnia».