Byłaja televiadučaja ANT Lucyja Hieraščanka stała trenierkaj pa jozie dla tvaru
Paśla naradžeńnia syna letam 2020 hoda Lucyja Hieraščanka (viadomaja mnohim jak Lusia Łuščyk) maksimalna zahłybiłasia ŭ siamju i novy kłopat, zachapiłasia vyvučeńniem Viedaŭ i miedytacyjami.
Fota: sacyjalnyja sietki
Ciapier 42-hadovaja teledziva viadzie zaniatki pa jozie tvaru. Da hetaha jana pryjšła praz pracu viadučaj, kali treba było rabić artykulacyjnuju raźminku pierad efiram.
«Na mianie mocna paŭpłyvała vyvučeńnie Viedaŭ, zaniatki johaj, miedytacyjami, taksama ja śpiavaju mantry, — kazała jana ŭ adnym z intervju vosieńniu 2020-ha. — Niekalki razoŭ naviedvała śviatyja miescy ŭ Indyi, naprykład, była va Uryndavanie. Sychodziačy sa svajoj fiłasofii, naprykład, razumieju, što na dzicia treba tracić u dva razy mienš hrošaj i davać u dva razy bolš uvahi. I jašče ŭ 100 razoŭ bolš viesiałości! Heta recept ščaślivych dziaciej. U mianie jość mahčymaść naniać nianiu dla syna, ale ja nie chaču. Ja chaču sama dać dziciaci ŭsio, što mahu, padzialicca svajoj enierhijaj i luboŭju. Mnie zdajecca, dzicia pavinna samo abrać svoj šlach u žyćci, baćki tolki pravadyry ŭ hetym śviecie».
Teledziva karystajecca viedyčnym kalendarom Džjociša, kab stryhčy vałasy ŭ peŭnyja dni.
«Rablu dla vas post z hetymi spryjalnymi datami kožny miesiac. Bolš ničoha asablivaha z vałasami nie rablu, nie farbuju, šampuni-balzamy samyja zvyčajnyja», — pisała jana.
Fota: sacyjalnyja sietki
U jaje instahramie apošni hod časta źjaŭlajucca pasty z anonsami zaniatkaŭ, a taksama z praktykavańniami pa jozie tvaru. Dla Lucyi «joha — heta nie spartyŭnyja rekordy, a pryhožy i ŭśviadomleny šlach da harmonii z saboj i sa śvietam».
«Ja liču, što da svajho cieła treba stavicca bieražliva, tamu padčas praktyki nadaju šmat uvahi anatamičnaj adbudovie i dychańniu. Ja chaču, kab dziakujučy jozie vy atrymlivali nie tolki mocnaje i hnutkaje cieła, ale i spakojny rozum, upeŭnienaść u sabie i radaść žyć».
Naprykład, Lucyja raskazvaje, jak vizualna mahčyma nadtačyć šyju i całkam prybrać druhi padbarodak.
Viadzie zaniatki pa jozie tvaru Lucyja ŭ YogaStudio. Kaštuje poŭny kurs 490 rubloŭ, adzin zaniatak — 75.
Studyja piša ŭ sacsietkach, što «vy navučyciesia zachoŭvać svaju maładość i pryhažość naturalnym sposabam, bieź lišnich układańniaŭ i z pradkazalnym vynikam».
U kastryčniku Lucyja jeździła ŭ Indyju ŭ ajurviedyčnuju kliniku ŭ Kierale. Voś što jana pisała pra adpačynak tam:
«Joha piać razoŭ na dzień, padjom u piać ranicy. Ranišni kłas johi da śniadanku i da pryjomu aleju Hchi (asnoŭnaja pracedura Pančakarmy).
Chatcha-joha da abiedu. Heta 1,5 hadziny intensiŭnaj praktyki.
Naviedvać kłasy pa jozie abaviazkova, navat słabačydłam i tym, chto nie vyspaŭsia, nie hniecca ci nikoli ničym nie zajmaŭsia. Adłyńvać chacieli ŭsie pa roznych pryčynach. Čaściej za ŭsio adłyńvali navički ranicaj. Ale asabista ja adłyńvała ad Karma-johi. Mianie prosta łamała chadzić na sažałku i karmić maŭklivych ryb rysam.
Za mnoj zachodzili nastaŭniki johi, pravodzili z pakoja da sažałki, pakidali mnie talerku z rysam kala sažałki, kab jana mnie na vočy traplałasia. Potym praviali prafiłaktyčnuju razmovu. Hadzinu raskazvali, navošta ŭ hetym žyćci treba rabić niešta, za što mnie nikoli nie skažuć dziakuj. Karaciej, ja zdałasia».
Taksama Lucyja raskazvaje ŭ sacsietkach, što robić, kab adčuvać siabie ščaślivaj.
«Ja žyvu pa niekatorych pryncypach, jakija mnie dapamahajuć. Naprykład, kožny dzień adčuvać jak maha bolš radaści ad samych prostych rečaŭ i addavać jaje inšym, dzialicca.
Hulaju ź dziećmi, razmaŭlaju pra dobryja rečy z rodnymi i siabroŭkami. Jem narmalnuju ježu. Narmalnuju — heta značyć atrymanuju biez hvałtu. Jana daje siły, a nie zabiraje. Jem šmat małočnych praduktaŭ. Pryncypova.
Imknusia ničoha nie jeści na noč, nie zaŭsiody atrymlivajecca, ale idu ŭ hetym kirunku. Kładusia rana spać i rana ŭstaju, tut nie maja zasłuha, heta tamu što dzieci i šmathadovaja zvyčka.
Praktykuju johu. Časam ź inšymi instruktarami my pra heta havorym: jak naohuł ludzi žyvuć bieź johi? Zrazumieła, što žyvuć, ale jak?! Heta ž tak prosta, tak dastupna — u lubyja hady i ź luboj vahaj — najlepšy srodak dla dobraha samaadčuvańnia! I dla źniešniaha vyhladu taksama ničoha lepš nie prydumana», — dzialiłasia viadučaja.
Čytajcie taksama:
«Viedaju, što sustrenu svajo kachańnie, kali pryjdzie čas». Čym ciapier žyvie paet i televiadučaja Valaryna Kustava
Natalla Niemahaj z ANT vyrašyła asabista pahladzieć, jak dehradavała Jeŭropa FOTA
«Druhi muž čakaŭ mianie 17 hadoŭ». Kaciaryna Vadanosava raskazała pra šluby, razvod, abjuz i sprobu samahubstva
