Dzianis Znak, jaki skazaŭ Łukašenku pra niedavier naroda da dziaržaŭnaj prapahandy, raskazaŭ, dzie čytaje naviny sam
Student bijałahičnaha fakulteta Biełaruskaha dziaržaŭnaha ŭniviersiteta Dzianis Znak, jaki padčas adkrytaha ŭroka paviedamiŭ Łukašenku, što «bolšaja častka naroda admaŭlajecca słuchać praŭładnuju infarmacyju», u efiry «Biełaruś 1» raskazaŭ, jakija krynicy infarmacyi ŭ jaho samoha
Skrynšot ź videa
Pytańnie Dzianisu zadała ŭ efiry 4 vieraśnia ŭ siužecie, dzie apytvalisia niekalki ŭdzielnikaŭ toj sustrečy, prapahandystka Anastasija Bieniedzisiuk. Chłopiec adkazaŭ, što metanakiravana nibyta ničoha nie čytaje, a infarmacyju čerpaje z ałharytmaŭ Google.
«Prosta adkryvaju mabilny Chrome i jon mnie vydaje niejkija naviny, jakija mnie mohuć być cikavyja. Nu i časam źjaŭlajecca niešta pra palityčnuju situacyju ŭ śviecie», — skazaŭ Dzianis Znak.
Bieniedzisiuk tady zhadała, što Łukašenka padčas svajho adkazu zakranuŭ «mnohija temy» i zapytałasia, ci ŭziaŭsia Dzianis ich ciapier študziravać.
«Ščyra kažučy, było nie da hetaha. Tamu, što vielmi šmat ludziej pačało pisać i ŭrešcie było zanadta šmat adrenalinu, kab usprymać novuju infarmacyju», — adkazaŭ student.
Adnosna ž taho, ci budzie jon hetym zajmacca choć paźniej, paviedamiŭ, što płanuje heta rabić «u pierśpiektyvie, maleńkimi krokami».