Siońnia pačynajecca sud nad Iharam Lednikam: za artykuł u časopisie jamu pahražaje da 6 hod kałonii
U sudzie Leninskaha rajona Minska 2 vieraśnia pačynajecca razhlad kryminalnaj spravy palitźniavolenaha siabra BSDP z Barysava Ihara Lednika. Vieterana partyjnaha ruchu abvinavačvavajuć u paklopie na prezidenta (č.2 art. 367 Kryminalnaha kodeksa), paviedamlaje «Viasna».
Ihar Lednik
Spravu budzie razhladać sudździa Taćciana Šocik.
Ihar Lednik byŭ zatrymany 18 krasavika 2022 hoda. Napačatku jamu prysudzili 15 sutak administracyjnaha aryštu, ale paśla ich jon na volu nie vyjšaŭ — byŭ źmieščany ŭ Śledčuju turmu № 8 u Žodzina.
Ihar Lednik maje invalidnaść 2-j hrupy praz prablemy z sercam. U červieni 2022 h. advakatka paviedamiła, što stan zdaroŭja palitviaźnia pahoršyŭsia, Ihar znachodziŭsia ŭ sančastcy śledčaha izalatara ŭ lažačym stanie. U lipieni stała viadoma, što aktyvistu zrabili apieracyju na straŭnikava-kišačnym trakcie.
Zhodna z materyjałami spravy, Ihar Lednik z červienia pa śniežań 2020 hoda pradstaviŭ dla publikacyi ŭ adzin z časopisaŭ artykuł z zahałoŭkam «Mižnarodna pryznany niejtralitet Biełarusi — harantyja biaśpieki ŭ rehijenie ABSIE».
Nazvany materyjał apublikavany ŭ drukavanym vydańni «Pazicyja» 28 śniežnia 2020 hoda, a 7 červienia 2021 hoda raźmieščany na jaho sajcie ŭ sietcy Internet. Pavodle śledstva, u im ŭtrymlivalisia zahadzia iłžyvyja źviestki, jakija hańbiać i źnievažajuć honar i hodnaść kiraŭnika dziaržavy, złučanyja z abvinavačvańniem u asabliva ciažkich złačynstvach, u tym liku suprać biaśpieki čałaviectva.
18 lipienia 2022 h. sud Barysaŭskaha rajona pryznaŭ infarmacyjnuju pradukcyju Facebook-staronki Ihara Lednika «ekstremisckimi materyjałami».
