Pasoł Ukrainy ŭ Hiermanii źbirajecca prasić prabačeńnia pierad kancleram Šolcam za paraŭnańnie ź liviernaj kaŭbasoj
Pasoł Ukrainy ŭ Hiermanii Andrej Mielnik choča paprasić prabačeńnia ŭ fiederalnaha kanclera Ołafa Šolca za svaju kolišniuju skandalnuju zajavu pra «liviernuju kaŭbasu». Pra heta jon skazaŭ vydańniu Bild, paviedamlaje «Ukrainskaja praŭda».
Andrej Mielnik
«Heta zajava, pra jakuju ja paśla peŭnaha času, viadoma, škaduju. Ja asabista paprašu ŭ jaho prabačeńnia», — skazaŭ Mielnik. Pasoł dadaŭ, što jahonaja zajava była «dypłamatyčna niedarečnaj» i «abraziła mnohich ludziej nie tolki ŭ Hiermanii».
U pačatku maja Mielnik raskrytykavaŭ admovu Šolca ad vizitu ŭ Kijeŭ u znak pratestu ad taho, što pierad hetym ukraincy admovilisia pryniać u siabie fiederalnaha prezidenta Franka-Valtera Štajnmajera.
«Stroić ź siabie pakryŭdžanuju liviernuju kaŭbasu — hučyć nie vielmi pa-dziaržaŭnamu… Havorka idzie pra vielmi žorstkuju vajnu na źniščeńnie z časoŭ napadu nacystaŭ na Ukrainie, heta nie dziciačy sadok», — pracytavali tady Mielnika niamieckija vydańni.
U niamieckaj movie vyraz «pakryŭdžanaja liviernaja kaŭbasa» ŭžyvajecca dla abaznačeńnia ludziej, jakija strojać ź siabie pakryŭdžanych bieź jakoj-niebudź važkaj na toje pryčyny.
Zvyčajna za takimi niedypłamatyčnymi vykazvańniami dypłamataŭ na adras kiraŭnictva krain, u jakich jany pradstaŭlajuć svaju dziaržavu, iduć noty pratestu i inšyja miery ŭździejańnia, ale ŭličvajučy ahulny kantekst niamieckaje kiraŭnictva nie stała z hetaha razdźmuvać vialiki skandał.
Ciapier ža situacyja ŭvohule źmianiłasia. Šolc niadaŭna pryjazdžaŭ u Kijeŭ razam ź lidarami Francyi, Italii i Rumynii. Jon aficyjna zajaviŭ pra padtrymku nadańnia Ukrainie statusu kandydata na ŭstupleńnie ŭ ES, a taksama paabiacaŭ dalejšuju vajskovuju dapamohu ŭ baraćbie z rasijskim uvarvańniem.
Ukraina taksama pačała narešcie atrymlivać ad Hiermanii ciažkoje ŭzbrajeńnie, takoje jak samachodnyja artyleryjskija ŭstanoŭki Panzerhaubitze 2000.
Čytajcie taksama:
Pasoł Ukrainy ŭ Hiermanii nazvaŭ kanclera Šolca «pakryŭdžanaj liviernaj kaŭbasoj»
