Pasoł Ukrainy ŭ Hiermanii nazvaŭ kanclera Šolca «pakryŭdžanaj liviernaj kaŭbasoj»
Fiederalny kancler Hiermanii Ołaf Šolc zajaviŭ, što nie płanuje vizitu va Ukrainu ŭ najbližejšy čas, bo ličyć niapravilnaj admovu Kijeva pryniać prezidenta krainy Franka-Valtera Štajnmajera. Pasoł Ukrainy ŭ Hiermanii Andrej Mielnik adreahavaŭ na heta niedypłamatyčna, paviedamlaje Spiegel.
Andrej Mielnik
«Hulać u pakryŭdžanuju liviernuju kaŭbasu — hučyć nie vielmi pa-dziaržaŭnamu… Havorka idzie pra vielmi žorstkuju vajnu na źniščeńnie z časoŭ napadu nacystaŭ na Ukrainie, heta nie dziciačy sadok», — pracytavali Mielnika ŭ vydańni.
U niamieckaj movie vyraz «pakryŭdžanaja liviernaja kaŭbasa» ŭžyvajecca dla abaznačeńnia ludziej, jakija strojać ź siabie pakryŭdžanych bieź jakoj-niebudź važkaj na toje pryčyny.
Pierad hetym, kamientujučy svoj mahčymy vizit va Ukrainu, Šolc uspomniŭ pra admovu Administracyi Prezidenta Ukrainy Uładzimira Zialenskaha pryniać fiederalnaha prezidenta Niamieččyny Franka-Valtera Štajnmajera i adznačyŭ, što heta «pieraškadžaje spravie».
Nahadajem, 12 krasavika Frank-Valter Štajnmajer zajaviŭ, što va Ukrainie vystupili suprać jaho vizitu ŭ Kijeŭ razam z prezidentami Polščy, Łatvii, Litvy i Estonii. U adkaz prezident Ukrainy Uładzimir Zialenski zajaviŭ, što Ofis prezidenta Ukrainy nie atrymlivaŭ zvarot ad ofisa prezidenta Hiermanii adnosna vizitu niamieckaha prezidenta, i dadaŭ, što va ŭmovach vajny i štodzionnaj hibieli ludziej dziaržava maje prava dazvolić sabie «prymać i być siarod tych lidaraŭ krain, jakija realna jaje padtrymlivajuć».
