«Dachod byŭ 500 dalaraŭ, a ciapier 600 rubloŭ». Minčuki raskazali, jak zhubili pracu z-za vajny
Niekalki biełarusaŭ padzialilisia z «Našaj Nivaj» svaimi historyjami zvalnieńnia, pryčynaj jakich uskosna ci niepasredna stała vajna, i raskazali, ci ŭdałosia im znajści novuju pracu.
«Paprasili paćviardžeńnie ŭ kampanii, što jany nie buduć pieradavać abstalavańnie ŭ akupavany Danbas»
Valeryju 30 hadoŭ (imia źmienienaje), jon pracavaŭ mieniedžaram u firmie, jakaja zajmałasia handlem abstalavańniem dla miedycynskich ustanoŭ. Vytvorca — adna ź jeŭrapiejskich krain.
«Ja maju vyšejšuju adukacyju, navukovuju stupień. Čatyry hady tamu syšoŭ ź dziaržaŭnaj navukovaj ustanovy praź nizki zarobak. Atrymlivaŭ tam 200-250 dalaraŭ jak małady śpiecyjalist u halinie mikrabijałohii. Paśla ŭładkavaŭsia ŭ firmu, u jakoj zarobak vyras u piać razoŭ», — kaža jon.
Spačatku vytvorca paprasiŭ paćvierdzić, što ŭstanovy, kudy pradavali abstalavańnie, nie źviazanyja ź siłavymi strukturami, vajennymi. A taksama paprasiŭ paćviardžeńnie ŭ kampanii, što jany nie buduć pieradavać abstalavańnie ŭ akupavany Krym i Danbas.
«Ja chvalavaŭsia, ale byŭ upeŭnieny, što z hetym usio narmalna. Abstalavańnie hetaje dla prostych pacyjentaŭ, časta z redkimi chvarobami, zvyčajna na heta sankcyi nie raspaŭsiudžvajucca», — kaža jon.
Niahledziačy na namahańni kampanii, nijakich adhruzak, pačynajučy z 24 lutaha, nie było navat pa starych kantraktach.
«Bolš za toje, vytvorca prypyniŭ damovu ŭ adnabakovym paradku, spasyłajučysia na fors-mažornyja abstaviny. Zarobak jany, kaniečnie, vypłacili, plus jašče za try miesiacy napierad.
Sama firma pracuje. Francyja i Kitaj jašče pastaŭlajuć u Biełaruś, ale moj kirunak zakryty», — kaža mužčyna.
Novuju pracu Valeryj ciapier nie šukaje. Jon rychtujecca da pierajezdu va Ukrainu.
«Chaču tam žyć i pracavać. Mnie padajecca, što trapić tudy nie składana, prablemna budzie atrymać časovy vid na žycharstva. Ale ŭsie heta mienš składana, čym žyć u krainie, ź jakoj puskajuć rakiety», — padsumoŭvaje jon.
«Dachod byŭ 500 dalaraŭ, a ciapier 600 rubloŭ»
Alaksieju (imia źmienienaje) 23 hady. Da pačatku vajny chłopiec pracavaŭ na spartyŭnym sajcie, jaki finansavała bukmiekierskaja ŭkrainskaja kampanija FavBet. Alaksiej staviŭ naviny pra padziei ŭ biełaruskim sporcie.
«Adkryŭsia hety sajt u 2020 hodzie za try tydni da pačatku karanavirusa. Tady adrazu pryjšoŭ da ich na pracu. Padčas vybaraŭ u Biełarusi ŭ nas ukraincy pytalisia, što my źbirajemsia rabić u takich umovach, ci chočam źjazdžać. Ale tady takich achvotnych nie było, vyrašyli pracavać, pakul budzie internet. Źviazanaje niešta z palitykaj, viadoma, ničoha nie pisali ni pra adzin bok, ni pra druhi, kab nie pryciahvać uvahu. Tak my pratrymalisia da 24 lutaha», — kaža jon.
Amal što ŭsio kiraŭnictva sajta znachodziłasia va Ukrainie. Jany zmahli vyjści na suviaź z supracoŭnikami ź Biełarusi tolki praz try-čatyry dni paśla pačatku vajny.
«Častka ź ich była ŭžo tady ŭ terytaryjalnaj abaronie, a astatnija siadzieli ŭ kijeŭskim mietro, — raskazvaje Alaksiej. — Im, vidavočna, było nie da pracy, ale i što rabić z nami jany nie viedali, bo prajekt hublać nie chaciełasia.
Na pačatku sakavika kiraŭnictva pryniało rašeńnie, što ŭ suviazi z tym, što Rasija i Biełaruś ahresary, jany zakryvajuć bukmiekierskuju kantoru ŭ Biełarusi, a razam ź joj sajt. Naohuł, jany prapanoŭvali znajści sponsara dla sajta. Navat nie byli suprać, kali heta budzie niechta z Rasii. Ale my tak pastupać nie chacieli».
Pra toje, što buduć zakryvać sajt, supracoŭnikam skazali zahadzia. Zarobak, jaki pavinny byli vypłacić 25 lutaha, pieraličyli tolki praz dva miesiacy — u siaredzinie krasavika.
«My spadziavalisia, što ŭsio moža vyrašycca. Tady jašče pieramovy pačalisia pamiž Rasijaj i Ukrainaj. Ale, na žal, ničoha nie źmianiłasia», — dzielicca jon.
Praz paru tydniaŭ Alaksiej pačaŭ šukać inšuju pracu. Znajšoŭ jaje davoli chutka ŭ hetaj ža śfiery. Ale zarobak tut akazaŭsia ŭ dva razy mienšym, čym na papiarednim miescy.
«Dachod byŭ kala 500 dalaraŭ, tam zarobak byŭ da valuty pryviazany. Ciapier — 600 rubloŭ», — raskazvaje jon.
Alaksiej nie škaduje, što tak atrymałasia, bo pierš za ŭsio jaho chvalavała nie toje, što hublaje jon, a što adbyvajecca va Ukrainie.
«Zvolnili amal połovu supracoŭnikaŭ, ale nie admoviłasia ad vydatkaŭ na śviaty»
Alaksandry 26 hadoŭ, jana pracavała markietołaham u pryvatnaj firmie. Dziaŭčyna zajmałasia arhanizacyjaj mierapryjemstvaŭ i ŭdziełu kampanii ŭ profilnych mižnarodnych forumach, vystavach, bolšaść jakich prachodziła va Ukrainie i Kazachstanie.
«Biznes isnavaŭ u troch rehijonach: u Biełarusi, Ukrainie i Kazachstanie. Paśla 24 lutaha my stracili nakirunak va Ukrainie całkam. A kiraŭnictva Kazachstana vyrašyła rabić całkam asobnuju kampaniju, sa svaim dyrektaram, markietołaham. Abaranić hety biznes ad vajennych ryzyk było niemahčyma. Na samym pačatku navat było niemahčyma zrazumieć, što budzie ź Biełaruśsiu», — zaŭvažaje jana.
U vyniku adbylisia vialikija skaračeńni. Zvolnili amal pałovu supracoŭnikaŭ kampanii.
«Pryčyna — «źmiena ŭmoŭ pracy». Pry hetym firma nie admoviłasia ad inšych vydatkaŭ, naprykład, na śviaty i mierapryjemstvy. Miesca było kłasnym, ale pavodziny kiraŭnictva paśla pačatku vajny maksimalna ździvili i zasmucili.
Zarobak vypłacili, a kampiensacyju, nakolki ja viedaju, tolki mnie za adzin miesiac. Ejčary ŭsim kazali, što kampiensacyi jany nie abaviazanyja płacić, chacia heta niapraŭda. U biahučych umovach, jak usio było ahučana, ludziam pavinny byli kampiensavać adzin miesiac. Zdajecca, hetaha ŭdałosia damahčysia tolki mnie, kali ja zhadała, što hetuju infarmacyju mnie paćvierdziła znajomaja jurystka», — kaža Alaksandra.
Ciapier dziaŭčyna šukaje vakansii ŭ toj ža śfiery. Prapanovy z takim ža zarobkam (jon byŭ siaredni) jość. Prablema ŭ inšym — ciapier vielmi šmat ludziej šukaje pracu.
«U dadatku bačna, naprykład, što napisała ja i jašče 60 čałaviek. Pracadaŭcy na sumoŭjach dadajuć dadatkovyja etapy, bo šmat kandydataŭ», — apisvaje jana.
«Zarobak za luty vypłacili, a kampiensacyju — nie»
Anhielinie (imia źmienienaje) 25 hadoŭ, dziaŭčyna pracavała ŭ pryvatnaj kampanii redaktaram-scenarystam. Paśla pačatku vajny kiraŭnictva paviedamiła supracoŭnikam, što dalej apłačvać ich pracu jany nie zmohuć.
«Hienieralny partnior pa etyčnych mierkavańniach admoviŭsia supracoŭničać z ofisami ŭ Rasii. A jany zamaŭlali ŭ nas prasoŭvańnie ŭ Biełarusi. Adpaviedna, navošta im štości prasoŭvać, kali šlachi pastaŭki kantentu zabłakavanyja?» — tłumačyć jana.
U vyniku ŭsiu pracu pastavili na paŭzu. Supracoŭnikaŭ adpravili na miesiac u adpačynak za svoj košt.
«Zarobak za luty vypłacili, a kampiensacyju — nie, — kaža Anhielina. — Ja była tady ŭ takim mocnym emacyjnym uzrušeńni ad taho, što pačałasia vajna, što situacyja z pracaj mianie ŭvohule nie chvalavała.
Vyrašyła, što hety miesiac — dobraja mahčymaść, kab pryjści ŭ siabie. Ad ŭśviedamleńnia, što ja žyvu ŭ krainie-ahresary, było drenna. Heta ŭsio vymušanaja miera, ja hatovaja achviaravać. Asabliva kali heta mahčymaść dla svabodnaj Biełarusi».
Praź miesiac Anhielinu paprasili viarnucca na pracu. Voś tolki prapanavali być fryłansieram.
«Za hety miesiac ja pryniała rašeńnie źjechać ź Biełarusi. Pracuju dystancyjna. Možna skazać, što aficyjnaje miesca pracy ja zhubiła. Viadoma, zarobak źmianiŭsia, staŭ mienšym. Ciapier mnie płaciać kankretna za kožny scenaryj, a nie za pracu ŭ štacie».
Čytajcie taksama:
«My «pavinny» dziaržavie? Tady i dziaržava mnie pavinna». Snycina — pra čynoŭnikaŭ, svaju kramu mierču i toje, čamu vieryć u pieramohu
Brytanski markietplejs kupiŭ startap biełarusaŭ Wannabe za 29,4 młn dalaraŭ
